BOShLANGʻICh SINFLARDA YaNGI AVLOD DARSLIKLARINI AMALIYoTGA JORIY ETISh YuZASIDAN OʻQUV SEMINARI BOʻLIB OʻTDI

Oʻzbekiston Respublikasi Maktabgacha va maktab taʼlimi vazirligi tomonidan mamlakatimizning barcha hududlarida “Boshlangʻich sinflarda oʻqitishning zamonaviy metodikasi” mavzusida seminar-treninglar oʻtkazilmoqda. Mazkur seminar-treninglar ilgʻor tajribalar asosida yaratilgan oʻquv dasturi va darsliklarni amaliyotga joriy etishda boshlangʻich sinf oʻqituvchilarining bilim va koʻnikmalarini shakllantirishga qaratilgani bilan nihoyatda ahamiyatlidir.

7-oktyabr kuni Qoraqalpogʻiston Respublikasi pedagoglarni yangi metodikalarga oʻrgatish milliy Markazi va Amudaryo tumani Maktabgacha va maktab taʼlimi boʻlimi bilan hamkorlikda tumandagi 40-sonli umumiy oʻrta taʼlim maktabida ham boshlangʻich sinf oʻqituvchilari uchun oʻquv-seminari boʻlib oʻtdi. Unda tumandagi 85 ta maktabning har biridan 1-, 2-, 3-, 4-sinflarning boshlangʻich sinf oʻqituvchilari jalb qilindi.

Seminarni tuman Maktabgacha va maktab taʼlimi boʻlimi mudiri Saida Sadikova ochdi va bu yil boshlangʻich sinflar uchun yaratilgan yangi darsliklarni amaliyotga joriy etishda bugungi kun boshlangʻich sinf oʻqituvchilaridan katta mahorat, zamonaviy yondashuv va masʼuliyat talab qilinishini taʼkidladi.

Shuningdek, seminarda Qoraqalpogʻiston Respublikasi pedagoglarni yangi metodikalarga oʻrgatish milliy Markazi maktabgacha, boshlangʻich va maxsus taʼlim metodikalari kafedrasi mudiri Bayram Oʻtemuratov, kafedra professor oʻqituvchilari Zevar Tajekbayeva, Perdexan Saliyeva, Gulchehra Yusupovalar ishtirok etishib, “Yangi darsliklar orqali boshlangʻich sinf oʻquvchilarida kommunikativ kompetentsiyani shakllantirish metodlari”, “Yangi oʻquv dasturi asosida boshlangʻich sinf matematika darslarini tashkil etish” kabi mavzularda maʼruza qilishdi va boshlangich sinf oʻqituvchilarini qiziqtirgan savollarga javob berishib, kasbiy mahoratidan tavsiyalar berishdi.

Shundan soʻng, tuman maktablarining boshlangʻich sinflarda maʼsul trener oʻqituvchilaridan Mehribon Bekbergenova, Malohat Matmuratova 1-sinf oʻqituvchilariga, Nasiba Babajanova, Nasiba Qurbonboyeva 2-sinf oʻqituvchilariga, Dildora Karimboyeva, Shohida Yuldasheva 3-sinf oʻqituvchilariga, Aymira Upayeva va Aziza Toʻrayevalar esa 4-sinf oʻqituvchilariga boshlangʻich sinflarda oʻqitishning zamonaviy metodikasi, tanqidiy fikrlash, jamoaviy ishlash, ijodkorlik va muloqot qilish koʻnikmalarini rivojlantirish modelini oʻquvchilarda shakllantirishda metodlardan foydalanish orqali samarali natijalarga erishish toʻgʻrisidagi maʼruzalari bilan ishtirok qildilar.

Bundan tashqari, boshlangʻich taʼlim oʻqituvchilari “Yozuvga oʻrgatish metodikasi”, “Bingo”, “Ven diagrammasi”, “Dekart”, “Shaxmat taxtasi” kabi metodlarni qoʻllagan holda amaliy mashgʻulotlarda ishtirok qilishdi. Bu metodlar bugungi kunda oʻquvchilarimizni qiziqarli bilim olishda, har bir muammoni turli yoʻllar bilan hal etishda, ularni qiyin vaziyatlardan olib chiqishda, darslikdan olgan bilimlarini kundalik hayotda qoʻllay olishlarida yordam beradi.

Ushbu oʻquv-seminaridan kutilayotgan maksad maktabda boshlangich taʼlim sifatini oshirish, oʻquvchilarning qiziqishlarini inobatga olgan holda samarali oʻquv-tarbiya jarayonini tashkil etishdir. Bu kabi tadbirlar oʻquv yili davomida amalga oshiriladi. Zero, bugungi kunda boshlangʻich sinflar oʻqituvchilarining vazifasi yangi darsliklar orqali oʻsib kelayotgan yosh avlod ongida XXI asr talabi darajasidagi bilim koʻnikmalarini shakllantirishdan iboratdir.

Rayhon YaKUBOVA, Amudaryo tumani MMTB maktablar faoliyatini muvofiqlashtirish boʻlimi metodisti.