НАВОИЙ НОМЛИ МАҲАЛЛА “ҚИЗИЛ” ТОИФАГА КИРИТИЛГАН, НЕГА?

Амударё тумани Ички ишлар бўлими жамоат хавфсизлиги хизмати ҳуқуқбузарликлар профилактикаси бўлинмаси инспекторларининг саъй-ҳаракатлари туфайли тез-тез туман ҳудудида майда безориликлар, ҳуқуқбузарликлар, вояга етмаганларнинг ота-оналари ёки уларнинг ўрнини босувчи васийларсиз тунги пайтлари турли кўнгилочар масканларида юришлари, шунингдек, узрсиз дарс қолдиришларининг олдини олишга қаратилган тезкор тарбиявий тарғибот-ташвиқот тадбирлари ўтказилиб келинмоқда. Айниқса, бу борада “қизил” тоифадаги рўйхатга киритилган маҳалла аҳолиси билан баҳамжиҳат, бевосита халқ орасига кириб бориб амалга оширилаётган чора-тадбирлар муҳим аҳамият касб этмоқда.

Манғит шаҳридаги Навоий номли маҳалла ҳам “қизил” тоифадаги маҳалла ҳисобланади. Умумий ер майдони 2,7 квадрат километр бўлган мазкур маҳаллада 17 та кўча бўлиб, ҳудуд аҳолиси ўзлари истиқомат қиладиган кўчаларни ободонлаштириш, кўчалар бўйларидаги ариқларни тозалаш, турли мевали ва манзарали дарахтлар, гул кўчатлари экишга алоҳида эътибор қаратишади. Маҳалла ҳудудида 145та турли объектлар, хусусан, корхона ва ташкилотлар, туман тиббиёт бирлашмаси, кўплаб савдо ва маиший хизмат кўрсатиш шохобчалари, Деҳқон бозорининг мавжудлиги маҳаллага бириктирилган профилактика инспектори зиммасига катта масъулият юклайди.

Шуни алоҳида қайд этиш керакки, ҳудудда 751та хонадон бўлиб, шундан 693таси якка тартибдаги ҳовлилар, 3таси кўп қаватли уйлар бўлиб, улардаги хонадонлар сони 40тани ташкил этади. Ушбу хонадонлар таркибидаги оилаларда 4580 нафар аҳоли истиқомат қилишади. Аҳолининг ярмидан кўпи, яъни 2391 нафари 30 ёшгача бўлган ёшлар ҳисобланади.

Шаҳарнинг қоқ марказида, асосий маданий-маиший, инфратузилма объектлари жойлашган маҳалла ҳаётининг осойишталигини таъминлаш, турли кўринишдаги ҳуқуқбузарликларнинг, майда безориликларнинг олдини олиш мақсадида профилактика инспектори, капитан Алишер Худойберганов томонидан йиғин Кенгаши аъзолари, шунингдек, ҳудудда фаолият олиб борувчи ҳоким ёрдамчиси Санжар Муродов, хотин-қизлар фаоли Гулбаҳор Хидирова, ёшлар етакчиси Қувват Есамуродовлар билан ҳамкорликда хонадонбай ишлаш тизими орқали фуқаролар билан учрашиб, уларни қийнаб келаётган муаммоларни ўрганиш, камчиликларни биргаликда бартараф этиш, ҳуқуқбузарлик ва жиноятчиликнинг олдини олишга қаратилган профилактик тадбирлар ўтказиб келмоқда. Айниқса, ҳудуддаги корхона ва ташкилотларда, кўчаларда, таълим-тарбия муассасаларида ҳафтанинг ҳар пайшанба кунида ўтказиладиган ҳуқуқбузарликлар профилактикаси кунида маҳалла аҳолисининг осойишталигини таъминлаш борасидаги масалалар маҳалла фаоллари иштирокида муҳокама этилади.

Шундай бўлса-да, 2023 йилнинг ўтган 8 ойи давомида маҳалла ҳудудида 17та жиноят ҳолати рўйхатга олинди. Шундан 2таси маҳалланинг ўзида аниқланиши лозим бўлган жиноятлар ҳисобланади. Шунингдек, 105та ҳуқуқбузарлик ҳолатлари аниқланиб, барчасига маъмурий баённомалар расмийлаштирилди. Булар жамоат жойида спиртли ичимлик истеъмол қилиш, паспорт тизими қоидаларини бузиш майда безорилик, баданга енгил жароҳат етказиш, шахсни ҳақоратлаш, туҳмат қилиш, жамоат жойларида тамаки чекиш, тунги пайтларда фуқароларнинг осойишталигини бузиш, маиший шовқин кўтариш каби ҳуқуқбузарликлар бўлиб, барчасига тезкор тегишли ҳужжатлар расмийлаштирилиб, зарур чоралар кўрилди.

Шунингдек, ўтган 8 ой давомида маҳалла аҳолиси ва маиший объектлар, хусусан, ошхоналар, Деҳқон бозори ва бозор атрофидаги савдо шохобчалари масъуллари томонидан маъмурий ҳудудда юз берган ҳуқуқбузарликлар, майда безориликлар бўйича келиб тушган 122та мурожаатлар атрофлича ўрганилиб, белгиланган тартибда терговга қадар суриштирув ҳаракатлари олиб борилди ва мурожаат эгаларига тегишли жавоблар қайтарилди.

Ҳеч ким ота-онадан жиноятчи бўлиб туғилмайди. Кимдир қизиққонлиги туфайли, яна кимдир ҳақорат ва туҳматга чидай олмай, жиноятга қўл урганини билмай қолади. Бу тоифа шахслар билан профилактик суҳбатлар ўтказиш орқали уларни соғлом ҳаётга қайтариш мумкин. Лекин яна бир тоифа шахслар борки, улар ҳар доим ўзига яшаш учун осон ва енгил йўлни қидиради. Меҳнат қилишдан кўра, кўпроқ майда ташмачилик, ўғирлик қилишни осон, деб билишади. Бу тоифа инсонларнинг соғлом фикрли, ҳалол, фидойи инсонлар сафига қайтиши анчагина мураккаб. Шу боис, профилактика инспектори бу борада маҳалла аҳлига, фаолларга суянади.

Навоий номли МФЙ ҳудудида 12 нафар муқаддам судланганлар бор. улардан 3 нафари доимий маъмурий назоратга олинган бўлиб, Алишер Худойберганов МФЙ Кенгаши аъзолари билан биргаликда назоратдаги шахсларнинг юриш туриши, жамиятда ўзини тутиши, қизиқишларидан деярли ҳар куни хабардор бўлиб туради. Муқаддам судланган, маъмурий назорат ўрнатилган шахслар билан қайта жиноят содир этишларининг олдини олиш мақсадида профилактик суҳбатлар ўтказиб боради. Айниқса, масъуллар билан ҳамкорликдаги “Қора дори”, “Хавфсиз тун”, “Спитамен”, “Турмуш ”. “Қурол” тадбирларининг тизимли равишда ўтказилиши натижасида ҳудуддаги жиноятчилик, ҳуқуқбузарликлар ўтган йилга нисбатан анча камайишига эришилди.

Маҳалла аҳолиси йил сайин ошиб бормоқда. Айни пайтда салкам 5000 нафарга яқин аҳоли истиқомат қиладиган маҳалла аҳли азалдан меҳнаткаш, аҳил-иноқ ҳаёт кечиришади. Юқорида айтганимиздай маҳалланинг маъмурий ҳудудида кўплаб маданий-маиший ва савдо шохобчалари, Деҳқон бозорининг мавжудлиги, қолаверса, ҳафтанинг деярли ҳар бир куни ушбу объектлар атрофи одамлар билан гавжум бўлиши ўз-ўзидан фуқаролар ўртасида турли келишмовчиликларнинг келиб чиқишига сабаб бўлиши оддий ҳолга айланиб қолган. Тўғрисини айтиш керак, арзимаган баҳс, тортишувлар ҳуқуқбузарликлар юзага келишига сабаб бўлаётган сир эмас. Шу нуқтаи назардан келиб чиқиб айтиш мумкинки, капитан Алишер Худойбергановнинг фаолият кўлами ҳам анча кенг. Маҳалла фаоллари, МФЙ Кенгаши аъзолари, хотин-қизлар фаоли, ҳоким ёрдамчиси ва ёшлар етакчиси, кўча бошчилар билан доимий ҳамкорликда маҳаллани “қизил” рўйхатдан чиқариш имконини излашдан асло чарчамайдиган профилактика инспектори:

– Биз албатта бунга эришамиз, – дейди қатъият билан.

Амалга оширилаётган чора-тадбирлар эса маҳаллада маънавий-тарбиявий ишлар яхши томонга ўзгараётганидан далолат.

Робия ЙЎЛДОШЕВА.