ДУРУНКИ МАҲАЛЛАСИДА ЁШЛАР ТАРБИЯСИДА “ОИЛА, МАҲАЛЛА, МАКТАБ” ҲАМКОРЛИГИДА САМАРАЛИ НАТИЖАЛАРГА ЭРИШИЛМОҚДА

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” грант лойиҳаси доирасида Дурунки маҳалласи ва унинг ҳудудидаги 56-сонли мактабда таълим-тарбия борасида эришилаётган ютуқларни бошқаларга намуна қилиб кўрсатиш, таълим маскани ва фуқаролар йиғинининг бу борадаги тажрибаларини оммалаштириш, вояга етмаганлар ўртасида ҳуқуқбузарликларнинг олдини олиш, ўқувчилар давоматини яхшилаш борасида йўлга қўйилган ишлар билан танишиш мақсадида тегишли ташкилотлар масъулларини жалб қилган ҳолда тадбир ташкил этилди.

19 сентябрь куни бўлиб ўтган ушбу тадбирда Амударё телевидениеси таҳририяти ходимлари, туман Ички ишлар бўлимининг ёшлар ва вояга етмаганлар бўйича катта инспектори Сирож Уснатдинов, хотин-қизлар масалалари бўйича инспектори Инобат Ўрозматова, жиноят-қидирув бўлими тезкор вакили Улуғбек Абдуллаев, фуқаролар йиғини масъуллари ҳамда бошқалар иштирок этишди. Дастлаб мактаб раҳбарияти, устозлар ҳамда ўқувчилар билан учрашув ўтказилиб, ушбу масканда таълим ва тарбия сифатини ошириш борасида амалга оширилаётган ишлар хусусида суҳбатлашишди.

Телевидение ходимлари грант лойиҳаси мақсади, унинг доирасида ўтказилаётган тадбирлар тўғрисида маълумотлар бериб, бу тадбирларнинг ёшларнинг маънавий-руҳий ва интеллектуал салоҳиятини оширишдаги, жамиятда ижтимоий-маънавий муҳитни соғломлаштириш борасидаги аҳамияти ҳақида сўзлашди. Шундан сўнг, Ички ишлар бўлими ходимлари вояга етмаганлар ўртасида туманда ўтган 8 ой мобайнида 7 та жиноят содир этилгани, ушбу маҳалла ҳудудида бундай ҳолатлар қайд этилмаганини маълум қилишди. Шунингдек, фуқаролар йиғини, оила ва мактаб ёшлар тарбияси борасидаги ишларни ҳамжиҳатликда олиб боришаётгани туфайли самарали натижаларга эришилаётгани эътироф этилди. Ёшларнинг бўш вақтларини мазмунли ташкил этишга алоҳида эътибор қаратилаётгани, уларнинг тунги вақтларда беҳуда вақт ўтказишларига, узрли сабабларсиз дарс қолдиришларига йўл қўйилмаётгани, ўқувчи-ёшлар фан ва спорт тўгаракларга жалб этилиб, касб-ҳунарга йўналтирилаётгани ижобий самара бераётгани тўғрисида сўз юритилди.

Таъкидланганидек, тарбия – энг мураккаб ва масъулиятли масалалардан бири бўлиб, бунда оила, маҳалла, мактаб ва кенг жамоатчиликнинг ўзаро ҳамкорлиги муҳим саналади. Ўқитувчилар, ота-оналар ва маҳалла фаоллари ўз вазифалари, масъулиятларини унутмаган ҳолда тарбиявий ишларни тенг олиб борса, самарали натижаларга эришилади. Бу жараёнда энг асосий вазифа соғлом муҳитни яратиш, ёшларнинг маърифатли, маънавиятли бўлиб етишишларини таъминлаш, уларга тўғри касб-ҳунар танлашни ўргатишдан иборатдир.

Амударё туманидаги Дурунки маҳалласида ва ҳудуддаги 56-сонли мактабда ҳам бу борада қатор чора-тадбирлар йўлга қўйилган. Таълим сифати яхшилиги ва кўрсаткичлари юқорилиги бўйича нафақат туманда, балки Қорақалпоғистонда энг биринчилар қаторидан жой олган ушбу мактабда “Оила, маҳалла, мактаб” ҳамкорлигидаги ишлар туфайли самарали натижаларга эришилмоқда.

Мазкур ўқув даргоҳида бугунги кунда 570 нафар ўқувчига 56 нафар билимли ва тажрибали ўқитувчилар таълим-тарбия беришмоқда. Мактабда 24 та синф бўлиб, 15 та юқори синфлар, 2 та вариатив синфлар мавжуд. Таълим масканини 72 нафар ўқувчилар битирган бўлса, уларнинг 53 нафари, яъни 73,6 фоизи олий таълим масканлари талабалари бўлишди. Ушбу мактабнинг вариатив синф битирувчилари эса барчалари талаба бўлиб, 100 фоиз натижага эришилди.

Тадбир давомида маҳалла фаоллари, ота-оналар билан ҳам суҳбат ўтказилиб, бугунги шиддаткор замонда ёш авлод камолотида оиланинг тутган ўрни тобора ортиб бораётгани, ота-оналар ўғил-қизларига таълим-тарбия беришларидан аввал, уларнинг ўзлари кенг дунёқарашли, мулоҳазали, билимли, саводхонлик даражаси юқори бўлиши кераклиги кенг талқин этилди. Маҳалла фаоли, нуроний онахон Раъно Эшимбетова ҳамда мактабнинг ота-оналар қўмитаси раиси Омонгул Қаюпова ва бошқалар ёшлар тарбияси борасида оила, таълим муассасаси, маҳалла ҳамжиҳатликда иш олиб борса, самарали натижаларга эришиш мумкинлигини айтиб, бу бўйича ўз таклиф ва тавсияларини беришди.

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” грант лойиҳаси доирасида ўтказилган тадбир барчага бирдек манзур бўлди. Ёшлар тарбияси борасидаги тажрибаларни оммалаштириш мақсадида бошқа ҳудудларда ҳам шу каби тадбирларни ҳамкор ташкилотлар иштирокида мунтазам равишда ўтказиб боришга келишиб олинди.

О.Худойберганова