Сўранг, жавоб берамиз!
Савол: Меҳнат таътили бўйича қонунчиликдаги меъёрлар ҳақида маълумот берсангиз. Йиллик меҳнат таътилининг давомийлиги қанча? Қандай ходимларга узайтирилган ёки қўшимча таътиллар берилади? Йиллик меҳнат таътили қандай ҳисобланади? Янги ишга кирган ходим қанча муддатдан кейин меҳнат таътили олиши мумкин?
Жавоб: Дам олиш ва ишлаш қобилиятини тиклаш учун ходимнинг ёзма аризаси билан ҳар йили меҳнат таътили берилади. Таътил давомида ўртача иш ҳақи ва лавозим сақланади. Барча ходим, шу жумладан, ўриндошлик асосида ишлайдиган ходимлар ҳам йиллик меҳнат таътилига чиқиш ҳуқуқига эга. Йиллик меҳнат таътилининг энг кам давомийлиги 21 календарь кунни (илгари 15 иш куни эди) ташкил этади. 18 ёшгача бўлган шахсларга ҳамда I ва II гуруҳ ногиронлиги бўлган ходимларга — 30 календарь кун, давлат органлари ходимларига – 27 календарь кун миқдорида меҳнат таътили берилади. Хусусан, бир ташкилотда ишлаган ҳар 5 йил учун ходим таътилига 2 календарь кун қўшилади. Аммо қўшиладиган кунлар сони 8 календарь кундан ошиб кетмаслиги керак.
Таътиллар аввалгидек иш кунларида эмас, балки календарь кунларида ҳисоблаб чиқарилади. Бу таътил муддатини ҳисоблашда дам олиш кунлари, шу жумладан, якшанба кунлари ҳам киритилишини англатади. Иккинчи ва кейинги иш йиллари учун таътил иш берувчи ва ходим учун мажбурий таътиллар жадвали асосида берилади.
Ходимлар вақтинча меҳнатга қобилиятсизлик даврида, ҳомиладорлик ва туғиш таътилининг муддати бошланганда, таътил ўқув таътилига тўғри келиб қолганда, давлат ёки жамоат мажбуриятларини бажараётганда, жамоа келишувлари ёки шартномасида назарда тутилган бошқа ҳолларда меҳнат таътили узайтирилади.
Меҳнат таътили ҳар йили, ушбу таътил берилаётган иш йили тугагунча берилади. Ишлаб чиқариш заруратига кўра, таътилни тўлиқ бериш имкони бўлмаса, ходимнинг розилиги билан таътилнинг 14 календар кундан ортиқ қисми кейинги иш йилига кўчирилади. Иш берувчи исталган вақтда ходимни фақат унинг розилиги билан ишга чақириб олиши мумкин. Бундай ҳолатда таътилнинг фойдаланилмай қолган қисми шу йилнинг бошқа қисмига ёки кейинги йилга кўчирилади.
Меҳнат шартномаси бекор қилинганда ходимга барча фойдаланилмаган меҳнат таътиллари учун компенсация тўланади. Ходим ёзма аризаси билан меҳнат таътилига чиқиши ва ундан сўнг ишдан кетиши мумкин.
Саволларга туман Адлия бўлими бош маслаҳатчиси Нилуфар Жуманиёзова жавоб берди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
