БИЗ ЁШЛАР – ЮРТИМИЗ РАВНАҚИГА ХИЗМАТ ҚИЛАМИЗ

Мустақиллик – халқимиз асрлар бўйи интилиб яшаган ва курашган, қадр-қиммати бебаҳо неъматдир. Мустақилликкина кишиларга эркин яшаши, меҳнат қилиши, иқтидорини юзага чиқаришига имкон берганини биз ёшлар чуқур англаймиз, шундай дориломон даврда туғилиб, вояга етаётганимиздан фахрланамиз.

Мен ҳозир 26 ёшдаман. Тўлқин овулида яшайман. 33-сонли мактабда умумий таълим олганман. Мактабдаги, дорулфунундаги устозларимизнинг сабоқлари орқали халқимизнинг ўтган давр мобайнида босиб ўтган оғир ва машаққатли йўли, истиқлол туфайли барча соҳаларда амалга оширилаётган ислоҳотлар, эришилаётган ютуқлар туб моҳияти хусусида  тасаввурга эгаман, дея оламан. Шунинг учун ҳам бугунгидай обод ва фаровон ҳаётнинг қадрига етиш, интилиб, курашиб, юртимизни янада равнақ топтиришга ҳисса қўшишни ўзимнинг бурчим, деб биламан.

Мен бу орзуларимни Қорақалпоқ давлат университетида ўқиб, 2022-2023  ўқув йилида  эгаллаган мутахассислигим – ўқитувчилик касбим орқали амалга оширмоқчиман. Мен талабалик пайтимда  овулимиз ёшлари орасида фаол бўлишга, ёшлар иқтидорини юзага чиқариш учун ўтказилаётган спорт мусобақаларида иштирок этишга ҳам интилардим ва кўпгина ютуқларни қўлга киритишга эришдим. Хусусан, 2022 йилда “Беш ташаббус олимпиадаси” спорт мусобақаларида гуруҳ сардори сифатида жамоамиз аъзоларини ҳамжиҳатликда ғолиблик учун курашишга рағбатлантирдим ва астойдил машқ қилиб, спортнинг стритбол туридан туманда ғолиб бўлдик.

Мусобақанинг Қорақалпоғистон босқичида эса иккинчи ўринни эгалладик ҳамда Чирчиқ шаҳрида ўтказилган мамлакат босқичида иккинчи ўрин учун курашиб, ғолиб бўлдик. Бу ютуғимиз учун давлатимиз томонидан овулимизга спорт майдончаси қуриб берилди. Шунингдек, жорий йилда Давлат хавфсизлик хизмати Раиси кубоги учун ўтказилган футбол мусобақасида туман ғолиби, Қорақалпоғистон босқичида эса учинчи ўрин соҳиби бўлдик. Бизнинг бунингдек натижаларимиз юксак қадрланиб, туман ҳокимлигининг, Давлат хавфсизлик хизматининг қимматбаҳо совғалари билан тақдирландик.

Булардан ташқари, менга  Қорақалпоғистон Республикаси Жўқорғи Кенгеси Раиси  яқинда амударёлик ёшлар билан учрашуви чоғида “Үмит ушқыны” кўкрак нишонини топширгани жамоамиз аъзоларини янада олдинга интилишга чорлади.

Шу ўринда бизнинг эришаётган натижаларимизда бири талаба, бири ишсиз, бири ўқувчи бўлган ёшларни спортга жалб этиб, жамоа шакллантириб, мунтазам машғулотлар ташкил этиб,  ютуқларга  эришишимизга шароит яратаётган  овулимиз ёшлар етакчиси Фозилбек Қурбонбоевнинг ҳам муносиб ҳиссаси борлигини айтиб ўтишим жоиз.

Айни кунларда жамоамиз билан бир ота-она фарзандларидай аҳилликда янада чиниқиш, маҳоратимизни ошириш учун машғулотларни давом эттираяпмиз. Биламизки, биз ёшлар катта кучмиз, бутун салоҳиятимизни, билимимизни юртимизни янада равнақ топтиришга сарфлаймиз.

Хурсандбек ТИЛОВМУРОДОВ, Тўлқин овули.