“ЮКСАК МАЪНАВИЯТЛИ ВА АХЛОҚЛИ ЁШЛАР – КЕЛАЖАК ПОЙДЕВОРИ” ГРАНТ ЛОЙИҲАСИ ДОИРАСИДА ТАДБИР БЎЛИБ ЎТДИ

Турли мафкуравий хуружлар авж олган бугунги давр ёшлар тарбиясини қатъий назоратга олган ҳолда уларнинг маънавиятини юксалтириш, ёш авлод онгида Ватанга муҳаббат, миллий ва умуминсоний қадриятларга садоқат руҳини шакллантиришни тақозо этмоқда. Шу боис, ёшларнинг бўш вақтларини мазмунли ўтказиш, уларни мафкура майдонининг хатарли хуружларидан ҳимоя қилиш, маънавий дунёсини бойитишга қаратилган турли тадбирлар, кўрик-танловлар ўтказишга, бепул кутубхоналар ташкил этишга алоҳида эътибор қаратилмоқда. Бу борада Амударё телевидениеси томонидан “Жаҳолатга қарши - маърифат” тамойили асосида ижтимоий-маънавий муҳитни соғломлаштириш ва ижтимоий шерикликни кучайтириш мақсадида “Юксак маънавиятли ва ахлоқли ёшлар – жамият пойдевори” лойиҳаси доирасида амалга оширилаётган тадбирлар муҳим аҳамият касб этмоқда.

15 август санасида Янгиобод маҳалла фуқаролар йиғини билан ҳамкорликда маҳалла фаол аёллари, ибратли оила бекалари, кўча бошчи онахонлар ва пробация таркибида рўйхатда турган, ҳимоя ордерига эга аёл-қизлар иштирокида ўтказилган тадбирда ҳам ёшлар маънавиятини юксалтириш, жиноятчиликнинг олдини олиш борасида МФЙда амалга оширилаётган ишлар атрофлича муҳокама этилди.

Ёшлар ўртасида жиноятчиликнинг олдини олиш, жиноят содир қилишга мойил, муқаддам судланган ва жиноят қилган шахслар билан ишлашиш, айнан шундай тоифадаги шахсларни соғлом ҳаётга қайтариш борасида амалга оширилаётган чора-тадбирлар туфайли 2023 йилнинг апрель ва июнь ойлари оралиғида оилавий низолар туфайли ажрашиш ҳолатига келиб қолган иккита ёш оила яраштирилди. Шунингдек, ҳудудий профилактика инспектори, МФЙ раиси ва йиғин Кенгаши аъзоларининг саъй-ҳаракатлари, МФЙ ҳузуридаги оилавий қадриятларни мустаҳкамлаш комиссияси аъзоларининг фидойиликлари туфайли оилаларда соғлом турмуш тарзини қарор топтириш мақсадида Амударё туман Тиббиёт бирлашмаси шифокорлари билан ҳамкорликда “Гиёҳвандлик – умр кушандаси”, “Соғлом турмуш тарзи билан соғлом келажак сари”, “Соғлом она – соғлом фарзанд ва соғлом оила” мавзуларида ўтказилаётган маънавий-маърифий тиббий суҳбат тарзидаги тадбирларга аҳолининг барча қатламлари қамраб олинаётгани муҳим аҳамият касб этмоқда.

Тадбирда Янгиобод маҳалла фуқаролар йиғини хотин-қизлар фаоли Моҳира Ўрозбоева хотин-қизлар ўртасида жиноятчиликнинг олдини олиш, тазйиқ ва зўравонлик туфайли қийин аҳволга тушиб қолган аёл-қизларни ҳимоялаш, уларни ижтимоий қўллаб-қувватлаш, жиноят қилишга мойил ва муқаддам судланган аёл-қизлар билан ишлашишда Амударё туман ИИБ хотин-қизлар масалалари бўйича катта инспектори Инобат Ўрозматова билан ҳамкорликда амалга оширилаётган профилактик чора-тадбирлар ўзининг ижобий самарасини бераётгани хусусида батафсил тўхталди.

Шундан сўнг, ИИБ хотин-қизлар масалалари бўйича инспектори Инобатхон Ўрозматова Янгиобод маҳалласи фуқаролари орасида жиноят қилишга мойил ва пробация таркибида рўйхатга олинган шахслар билан ишлашиш яхши йўлга қўйилгани, шундай бўлса-да, “ўз уйингни ўзинг асра” тамойили асосида иш тутиш, ҳар бир ота-она фарзандининг юриш-туришига эътиборли бўлишлари зарурлигини таъкидлади. Маҳаллада ҳимоя ордерига эга аёл-қизлар ҳолидан хабар олиш, улар ҳаётига оид муаммоларни ижобий ҳал этишда яқиндан кўмаклашиш ҳар бир онгли инсоннинг одамийлик бурчи эканлигини қайд этди.

Айниқса, ҳудудий профилактика инспектори томонидан мунтазам равишда ўтказилаётган “Тиғ”, “Хавфсиз тун” профилактик тарбиявий тадбирлар туфайли янгиободликлар ҳаёти тинч, осойишта эканлиги алоҳида эътироф этилди.

Тадбир давомида “Юксак маънавиятли ва ахлоқли ёшлар – келажак пойдевори” лойиҳаси координатори, журналист Робия Йўлдошева ҳар қандай соғлом жамият, соғлом ҳаётнинг асоси юксак маънавиятли ва ахлоқли ёшлар эканлигини алоҳида қайд этиб, мазкур лойиҳани амалга оширишдан кутилаётган провард натижалар ва бу лойиҳада халқнинг иштироки хусусида батафсил тўхталди.

Тадбирда Янгиобод МФЙ фаоли Зиёда Халиллаева сўзга чиқиб, маҳалладошларини ёш авлодни оила қадриятлари, миллий-маънавий урф-одат ва анъаналар руҳида тарбиялаш борасида доимий ҳамжиҳатликда иш тутишга даъват этди. Шу билан бирга бирдамлик халқ учун жуда катта куч, енгилмас ирода эканлигини таъкидлади.

Тадбир ёшлар ўртасида жиноятчиликнинг олдини олиш, жиноят содир қилишга мойил, муқаддам судланган, шахслар билан ишлашишда маҳалла аҳлини янада бирдам, жипс бўлишга давъат этувчи фикр алмашувлар асосида, самимий ва ошкора вазиятда ўтгани билан муҳим аҳамият касб этди.

Робия ЙЎЛДОШЕВА.