“YuKSAK MAʼNAVIYaTLI VA AXLOQLI YoShLAR – KELAJAK POYDEVORI” GRANT LOYIHASI DOIRASIDA TADBIR BOʻLIB OʻTDI

Turli mafkuraviy xurujlar avj olgan bugungi davr yoshlar tarbiyasini qatʼiy nazoratga olgan holda ularning maʼnaviyatini yuksaltirish, yosh avlod ongida Vatanga muhabbat, milliy va umuminsoniy qadriyatlarga sadoqat ruhini shakllantirishni taqozo etmoqda. Shu bois, yoshlarning boʻsh vaqtlarini mazmunli oʻtkazish, ularni mafkura maydonining xatarli xurujlaridan himoya qilish, maʼnaviy dunyosini boyitishga qaratilgan turli tadbirlar, koʻrik-tanlovlar oʻtkazishga, bepul kutubxonalar tashkil etishga alohida eʼtibor qaratilmoqda. Bu borada Amudaryo televideniyesi tomonidan “Jaholatga qarshi - maʼrifat” tamoyili asosida ijtimoiy-maʼnaviy muhitni sogʻlomlashtirish va ijtimoiy sheriklikni kuchaytirish maqsadida “Yuksak maʼnaviyatli va axloqli yoshlar – jamiyat poydevori” loyihasi doirasida amalga oshirilayotgan tadbirlar muhim ahamiyat kasb etmoqda.

15-avgust sanasida Yangiobod mahalla fuqarolar yigʻini bilan hamkorlikda mahalla faol ayollari, ibratli oila bekalari, koʻcha boshchi onaxonlar va probatsiya tarkibida roʻyxatda turgan, himoya orderiga ega ayol-qizlar ishtirokida oʻtkazilgan tadbirda ham yoshlar maʼnaviyatini yuksaltirish, jinoyatchilikning oldini olish borasida MFYda amalga oshirilayotgan ishlar atroflicha muhokama etildi.

Yoshlar oʻrtasida jinoyatchilikning oldini olish, jinoyat sodir qilishga moyil, muqaddam sudlangan va jinoyat qilgan shaxslar bilan ishlashish, aynan shunday toifadagi shaxslarni sogʻlom hayotga qaytarish borasida amalga oshirilayotgan chora-tadbirlar tufayli 2023-yilning aprel va iyun oylari oraligʻida oilaviy nizolar tufayli ajrashish holatiga kelib qolgan ikkita yosh oila yarashtirildi. Shuningdek, hududiy profilaktika inspektori, MFY raisi va yigʻin Kengashi aʼzolarining saʼy-harakatlari, MFY huzuridagi oilaviy qadriyatlarni mustahkamlash komissiyasi aʼzolarining fidoyiliklari tufayli oilalarda sogʻlom turmush tarzini qaror toptirish maqsadida Amudaryo tuman Tibbiyot birlashmasi shifokorlari bilan hamkorlikda “Giyohvandlik – umr kushandasi”, “Sogʻlom turmush tarzi bilan sogʻlom kelajak sari”, “Sogʻlom ona – sogʻlom farzand va sogʻlom oila” mavzularida oʻtkazilayotgan maʼnaviy-maʼrifiy tibbiy suhbat tarzidagi tadbirlarga aholining barcha qatlamlari qamrab olinayotgani muhim ahamiyat kasb etmoqda.

Tadbirda Yangiobod mahalla fuqarolar yigʻini xotin-qizlar faoli Mohira Oʻrozboyeva xotin-qizlar oʻrtasida jinoyatchilikning oldini olish, tazyiq va zoʻravonlik tufayli qiyin ahvolga tushib qolgan ayol-qizlarni himoyalash, ularni ijtimoiy qoʻllab-quvvatlash, jinoyat qilishga moyil va muqaddam sudlangan ayol-qizlar bilan ishlashishda Amudaryo tuman IIB xotin-qizlar masalalari boʻyicha katta inspektori Inobat Oʻrozmatova bilan hamkorlikda amalga oshirilayotgan profilaktik chora-tadbirlar oʻzining ijobiy samarasini berayotgani xususida batafsil toʻxtaldi.

Shundan soʻng, IIB xotin-qizlar masalalari boʻyicha inspektori Inobatxon Oʻrozmatova Yangiobod mahallasi fuqarolari orasida jinoyat qilishga moyil va probatsiya tarkibida roʻyxatga olingan shaxslar bilan ishlashish yaxshi yoʻlga qoʻyilgani, shunday boʻlsa-da, “oʻz uyingni oʻzing asra” tamoyili asosida ish tutish, har bir ota-ona farzandining yurish-turishiga eʼtiborli boʻlishlari zarurligini taʼkidladi. Mahallada himoya orderiga ega ayol-qizlar holidan xabar olish, ular hayotiga oid muammolarni ijobiy hal etishda yaqindan koʻmaklashish har bir ongli insonning odamiylik burchi ekanligini qayd etdi.

Ayniqsa, hududiy profilaktika inspektori tomonidan muntazam ravishda oʻtkazilayotgan “Tigʻ”, “Xavfsiz tun” profilaktik tarbiyaviy tadbirlar tufayli yangiobodliklar hayoti tinch, osoyishta ekanligi alohida eʼtirof etildi.

Tadbir davomida “Yuksak maʼnaviyatli va axloqli yoshlar – kelajak poydevori” loyihasi koordinatori, jurnalist Robiya Yoʻldosheva har qanday sogʻlom jamiyat, sogʻlom hayotning asosi yuksak maʼnaviyatli va axloqli yoshlar ekanligini alohida qayd etib, mazkur loyihani amalga oshirishdan kutilayotgan provard natijalar va bu loyihada xalqning ishtiroki xususida batafsil toʻxtaldi.

Tadbirda Yangiobod MFY faoli Ziyoda Xalillayeva soʻzga chiqib, mahalladoshlarini yosh avlodni oila qadriyatlari, milliy-maʼnaviy urf-odat va anʼanalar ruhida tarbiyalash borasida doimiy hamjihatlikda ish tutishga daʼvat etdi. Shu bilan birga birdamlik xalq uchun juda katta kuch, yengilmas iroda ekanligini taʼkidladi.

Tadbir yoshlar oʻrtasida jinoyatchilikning oldini olish, jinoyat sodir qilishga moyil, muqaddam sudlangan, shaxslar bilan ishlashishda mahalla ahlini yanada birdam, jips boʻlishga davʼat etuvchi fikr almashuvlar asosida, samimiy va oshkora vaziyatda oʻtgani bilan muhim ahamiyat kasb etdi.

Robiya YOʻLDOShEVA.