МАҲАЛЛА ЁШЛАРИ ТАРБИЯСИГА ЖОНКУЯР ОНАХОН

Пиру-бадавлат кексалар нафақат оилалар, балки мамлакат, юрт файзидир. Уларнинг бой ҳаётий тажрибалари, олтинга тенг ўгитлари, панду-насиҳатлари фарзандлар, ёшлар тарбиясида, уларнинг ҳаётда ўз ўринларини топишида муҳим ўрин тутади.

Шу боис Амударё телевидениеси таҳририяти томонидан амалга оширилаётган “Жаҳолатга қарши маърифат” номли давлат гранти лойиҳаси доирасида таҳририят, “Нуроний” жамғармаси туман бўлими ва бошқа ташкилотлар билан ҳамкорликда “Кексалар – хонадонимиз файзи ва фариштаси” шиори остида тадбирлар ташкил этилмоқда. Кексаларни эъзозлаш, уларнинг панд-насиҳатларини ёшларга етказиш орқали жамиятда ўзаро ҳурмат ва меҳр-муҳаббат, юксак ахлоқий ва маънавий қадриятлар муҳитини шакллантириш борасида амалга оширилаётган ишлар ҳудудларда аҳоли, айниқса, ёшлар ўртасида намуна, ўрнак қилиб кўрсатилмоқда.

Туманнинг Бўзсолма маҳалласида яшовчи онахон Саломат Мадаминова ҳам жамият ҳаётида фаол иштирок этиб, ёшларга тўғри йўл кўрсатиб келаётган нуронийлардан бири. У 1963 йилда Амударё туманида таваллуд топган. Тошкент давлат университетининг математика факультетини 1986 йилда тугатиб, иш фаолиятини 30-сонли мактабда математика фани ўқитувчиси бўлиб ишлашдан бошлаган. Нафақага чиққунга қадар 20- ва 70-сонли мактабларда ёш авлод таълим-тарбиясига муносиб ҳисса қўшган. Таълим фахрийси соҳадаги фидойилиги, фаолияти давомидаги сидқидилдан қилган меҳнатлари, интилувчанлиги, таълим ривожига қўшган муносиб ҳиссаси учун “Қорақалпоғистон халқ таълими аълочиси” кўкрак нишони ва қатор фахрий ёрлиқлар билан тақдирланган.

Фидойи онахон ҳозир ҳам ҳудуддаги ёшлар билан бирга, уларнинг яқин маслакдоши. Ҳар бирига керакли маслаҳатлар беришдан, умр сўқмоқларидан ўз йўлларини топиб кетишларига кўмак беришдан асло чарчамайди. Фуқаролар йиғини масъуллари ҳам аҳоли ўртасидаги оилавий муаммолар, можароларни ҳал қилишда бой ҳаётий тажрибага эга бўлган онахоннинг маслаҳатлари, тавсияларидан унумли фойдаланишади. Мурожаат билан келган маҳалладошларни бирга тинглашади, суҳбатлашишади. Ҳар бир масала бўйича ечим топишга, мурожаатни ҳал қилишга, оилалардаги, элдаги тинчлик, осойишталикни сақлашга ҳаракат қилишади.

Саломат опа Мадаминовага “Бир нуроний ўн ёшга маъсул” лойиҳаси асосида 10 нафар маҳалла йигит-қизлари бириктирилган. Опа уларга ҳам қўлидан келганча ёрдам кўрсатиб келмоқда. Фуқаролар йиғинидаги ёшлар етакчиси Фаррух Мадраҳимов ва хотин-қизлар фаоли Наргиза Юсупова билан биргаликда тушунтириш ишлари олиб боришади, ҳаёти билан яқиндан танишиб, йўл-йўриқлар кўрсатишади. Маҳалладаги олий ўқув юртига кириш истаги бўлган ёшлардан Чинор Аразмуродова, Шодия Собирова, Сабоҳат Абдуллаева, Хуршида Эркабоеваларга Хотин-қизлар қўмитасининг тавсияномалар олишига кўмаклашишди. Эҳтиёжманд бўлган Зуҳра Жумабоевага бир марталик моддий ёрдам берилди ва ҳозирги кунда уни доимий иш билан таъминлаш масаласи ҳал қилинмоқда.

Ундан ташқари, оғир касал бўлган Шерхон Самандаровга тиббий кўрик ва жарроҳлик операцияси учун ҳомийлардан 15 млн. сўм пул маблағи ўтказиб берилди. Қўлидан тикиш-бичиш келадиган Ўрозгул Сафарбоевага субсидия асосида тикув машинасини олиб беришга ҳаракат қилмоқда. Пробация назоратида турган Сардорбек Ўрозбоевга субсидия асосида пайвандлаш ускуналари олиб берилди ва иш билан бандлиги таьминланиб, пробация назоратидан чиқарилди. Лайло Жумановага эса ўз томорқасида деҳқончилик билан шуғулланиши учун субсидия асосида сув насоси олишига кўмаклашилди.

Маҳалла ёшларининг тарбиясига масъул бўлган, ҳар бирини ўз фарзандидек кўриб, тақдири учун жонкуярлик кўрсатиб келаётган онахон Саломат Мадаминованинг оиласи ҳам намунали. Бир умр ўқитувчилик қилган умр йўлдоши Тоҳир ака Раҳимбоев билан бирга 2 ўғил, 2 қизни комил инсонлар қилиб тарбиялашди, касбу-корли қилиб, эл-юрт хизматига қўшишди. Ҳозирги кунда улар келинлари, 16 нафар неваралар қуршовида саодатли умр кечиришмоқда.

Бўз солма маҳалласида ёшларни тарбиялашда Саломат Мадаминова каби катта авлод вакилларининг билим ва тажрибаларидан самарали фойдаланилиб келинмоқда. Нуроний, кўпни кўрган отахон-онахонлар ҳалол меҳнат ва мустаҳкам ирода билан жамиятимизнинг ҳақиқий фидойиларига айланганини ёшларга, айниқса, махсус ҳисобдан чиқарилган ва нотинч оилаларнинг фарзандлари, уюшмаган ёшларга ибрат намунаси сифатида кўрсатишга ҳаракат қилинмоқда. Бу эса ўз навбатида, жамиятимизда ўзаро ҳурмат, меҳр-оқибат ва ҳамжиҳатлик муҳитини шакллантиришда, миллий ва умуминсоний қадриятларни асраб-авайлаш ва қадрлашда муҳим аҳамият касб этмоқда.

Озода Худойберганова.