MAHALLA YoShLARI TARBIYaSIGA JONKUYaR ONAXON

Piru-badavlat keksalar nafaqat oilalar, balki mamlakat, yurt fayzidir. Ularning boy hayotiy tajribalari, oltinga teng oʻgitlari, pandu-nasihatlari farzandlar, yoshlar tarbiyasida, ularning hayotda oʻz oʻrinlarini topishida muhim oʻrin tutadi.

Shu bois Amudaryo televideniyesi tahririyati tomonidan amalga oshirilayotgan “Jaholatga qarshi maʼrifat” nomli davlat granti loyihasi doirasida tahririyat, “Nuroniy” jamgʻarmasi tuman boʻlimi va boshqa tashkilotlar bilan hamkorlikda “Keksalar – xonadonimiz fayzi va farishtasi” shiori ostida tadbirlar tashkil etilmoqda. Keksalarni eʼzozlash, ularning pand-nasihatlarini yoshlarga yetkazish orqali jamiyatda oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish borasida amalga oshirilayotgan ishlar hududlarda aholi, ayniqsa, yoshlar oʻrtasida namuna, oʻrnak qilib koʻrsatilmoqda.

Tumanning Boʻzsolma mahallasida yashovchi onaxon Salomat Madaminova ham jamiyat hayotida faol ishtirok etib, yoshlarga toʻgʻri yoʻl koʻrsatib kelayotgan nuroniylardan biri. U 1963-yilda Amudaryo tumanida tavallud topgan. Toshkent davlat universitetining matematika fakultetini 1986-yilda tugatib, ish faoliyatini 30-sonli maktabda matematika fani oʻqituvchisi boʻlib ishlashdan boshlagan. Nafaqaga chiqqunga qadar 20- va 70-sonli maktablarda yosh avlod taʼlim-tarbiyasiga munosib hissa qoʻshgan. Taʼlim faxriysi sohadagi fidoyiligi, faoliyati davomidagi sidqidildan qilgan mehnatlari, intiluvchanligi, taʼlim rivojiga qoʻshgan munosib hissasi uchun “Qoraqalpogʻiston xalq taʼlimi aʼlochisi” koʻkrak nishoni va qator faxriy yorliqlar bilan taqdirlangan.

Fidoyi onaxon hozir ham hududdagi yoshlar bilan birga, ularning yaqin maslakdoshi. Har biriga kerakli maslahatlar berishdan, umr soʻqmoqlaridan oʻz yoʻllarini topib ketishlariga koʻmak berishdan aslo charchamaydi. Fuqarolar yigʻini masʼullari ham aholi oʻrtasidagi oilaviy muammolar, mojarolarni hal qilishda boy hayotiy tajribaga ega boʻlgan onaxonning maslahatlari, tavsiyalaridan unumli foydalanishadi. Murojaat bilan kelgan mahalladoshlarni birga tinglashadi, suhbatlashishadi. Har bir masala boʻyicha yechim topishga, murojaatni hal qilishga, oilalardagi, eldagi tinchlik, osoyishtalikni saqlashga harakat qilishadi.

Salomat opa Madaminovaga “Bir nuroniy oʻn yoshga maʼsul” loyihasi asosida 10 nafar mahalla yigit-qizlari biriktirilgan. Opa ularga ham qoʻlidan kelgancha yordam koʻrsatib kelmoqda. Fuqarolar yigʻinidagi yoshlar yetakchisi Farrux Madrahimov va xotin-qizlar faoli Nargiza Yusupova bilan birgalikda tushuntirish ishlari olib borishadi, hayoti bilan yaqindan tanishib, yoʻl-yoʻriqlar koʻrsatishadi. Mahalladagi oliy oʻquv yurtiga kirish istagi boʻlgan yoshlardan Chinor Arazmurodova, Shodiya Sobirova, Sabohat Abdullayeva, Xurshida Erkaboyevalarga Xotin-qizlar qoʻmitasining tavsiyanomalar olishiga koʻmaklashishdi. Ehtiyojmand boʻlgan Zuhra Jumaboyevaga bir martalik moddiy yordam berildi va hozirgi kunda uni doimiy ish bilan taʼminlash masalasi hal qilinmoqda.

Undan tashqari, ogʻir kasal boʻlgan Sherxon Samandarovga tibbiy koʻrik va jarrohlik operatsiyasi uchun homiylardan 15 mln. soʻm pul mablagʻi oʻtkazib berildi. Qoʻlidan tikish-bichish keladigan Oʻrozgul Safarboyevaga subsidiya asosida tikuv mashinasini olib berishga harakat qilmoqda. Probatsiya nazoratida turgan Sardorbek Oʻrozboyevga subsidiya asosida payvandlash uskunalari olib berildi va ish bilan bandligi taminlanib, probatsiya nazoratidan chiqarildi. Laylo Jumanovaga esa oʻz tomorqasida dehqonchilik bilan shugʻullanishi uchun subsidiya asosida suv nasosi olishiga koʻmaklashildi.

Mahalla yoshlarining tarbiyasiga masʼul boʻlgan, har birini oʻz farzandidek koʻrib, taqdiri uchun jonkuyarlik koʻrsatib kelayotgan onaxon Salomat Madaminovaning oilasi ham namunali. Bir umr oʻqituvchilik qilgan umr yoʻldoshi Tohir aka Rahimboyev bilan birga 2 oʻgʻil, 2 qizni komil insonlar qilib tarbiyalashdi, kasbu-korli qilib, el-yurt xizmatiga qoʻshishdi. Hozirgi kunda ular kelinlari, 16 nafar nevaralar qurshovida saodatli umr kechirishmoqda.

Boʻz solma mahallasida yoshlarni tarbiyalashda Salomat Madaminova kabi katta avlod vakillarining bilim va tajribalaridan samarali foydalanilib kelinmoqda. Nuroniy, koʻpni koʻrgan otaxon-onaxonlar halol mehnat va mustahkam iroda bilan jamiyatimizning haqiqiy fidoyilariga aylanganini yoshlarga, ayniqsa, maxsus hisobdan chiqarilgan va notinch oilalarning farzandlari, uyushmagan yoshlarga ibrat namunasi sifatida koʻrsatishga harakat qilinmoqda. Bu esa oʻz navbatida, jamiyatimizda oʻzaro hurmat, mehr-oqibat va hamjihatlik muhitini shakllantirishda, milliy va umuminsoniy qadriyatlarni asrab-avaylash va qadrlashda muhim ahamiyat kasb etmoqda.

Ozoda Xudoyberganova.