Ёнғин хавфсизлиги – “Долзарб 30 кун”давом этмоқда: ҚУРУВЧИ-ИШЧИЛАРГА ЁНҒИН ХАВФСИЗЛИГИНИ ТАЪМИНЛАШ ЮЗАСИДАН ТУШУНЧАЛАР БЕРИЛДИ

Ёнғин – тилсиз ёв. Унинг хавфлилик даражаси шу қадар юқорики, ҳеч қандай шовқин-суронсиз пайдо бўлиб, тушган жойини лаҳзалар ичида вайронага айлантиради. Бекорга халқимиз “ўт балосидан сақласин”, дейишмайди. Шунинг учун ҳам фавқулодда вазиятлар ва ёнғин хавфсизлиги бўйича масъул ходимлар ёнғин келиб чиқишининг олдини олиш, аҳоли яшаш хонадонларида, идора ва ташкилотларда, ишлаб чиқариш корхоналари ҳамда тадбиркорлик объектларида тез-тез бўлишиб, фавқулодда ҳолатларнинг олдини олиш юзасидан зарур тушунтириш ишлари олиб боришмоқда.

Айни пайтда эса Ёнғин хавфсизлигини таъминлаш мақсадида жорий йилнинг 10 июль – 10 август кунлари оралиғида ташкил этилган “Долзарб 30 кун” тадбирлари ҳар бир овул ва маҳаллада, таълим-тарбия муассасаларида ўтказилиб, унда кенг аҳоли вакиллари фаол иштирок этишмоқда.

Ана шундай тадбирлардан бири Амударё туманининг Жумуровул маҳалласи ҳудудидаги 45-сонли умумтаълим мактаби биносида қуриш-таъмирлаш ишларини олиб бораётган “Кўна қалъа” МЧЖ ишчилари иштирокида ҳам ўтказилди.

Тадбирда, аввало мазкур мактабда қуриш-таъмирлаш ишларини олиб бораётган муҳандис-техник ходимлар, техника хавфсизлиги бўйича масъуллар билан биргаликда объект ҳудудининг ёнғинга қарши воситалар билан жиҳозланганлик ҳолати кўздан кечирилди. Хусусан, 500 кубометр сув сиғимига эга ҳовуз, ёнғинга қарши қалқон, қурувчи-ишчиларнинг ёнғинга қарши чоралар бўйича тушунчалари ўрганилди.

Шундан сўнг, қурувчи-ишчилар учун ўт ўчириш автомобили ва ёнғинни бартараф этишда зарур бўладиган асбоб-анжомлар кўргазмаси ташкил этилиб, ёнғин ҳодисаси рўй берганда қандай ҳаракат қилиш кераклиги, фуқаро ёнғин содир бўлган объект ичида қолиб кетган тақдирда уни қутқариш, хавфсиз ҳудудга олиб чиқиш ва биринчи ёрдам кўрсатиш чоралари ҳақида керакли маълумотлар ва тушунчалар берилди.

Бундан ташқари, ёнғин ҳодисаси содир бўлганда чақирув бўйича кетаётган ўт ўчириш автомобилининг кўчаларда эркин ҳаракатланишига шароит яратиш, ёнғин ўчириш хизмати ходимларига фуқаролар томонидан билиб-билмай халақит берилмаслик тўғрисида тушунтиришлар олиб борилди. Шу билан бирга, 45-сонли мактаб ҳудудида қуриш-таъмирлаш ишларини олиб бораётган қурувчилар томонидан электр энергияси билан боғлиқ ишларни амалга оширишда, қора сақич моддасини эритиш жараёнида оловдан фойдаланишда эҳтиёткорлик билан иш юритиш бўйича тавсиялар ҳам берилди.

Бўлиб ўтган ёнғин хавфсизлиги “Долзарб 30 кун” доирасидаги кўргазмали тадбир “Кўна қалъа” МЧЖ муҳандис-техник ходимлари ва қурувчи ишчиларининг фавқулодда вазиятларда амал қилиши зарур бўлган билим ва кўникмаларини янада мустаҳкамлади.

Робия ЙЎЛДОШЕВА.