Yongʻin xavfsizligi – “Dolzarb 30 kun”davom etmoqda: QURUVChI-IShChILARGA YoNGʻIN XAVFSIZLIGINI TAʼMINLASh YuZASIDAN TUShUNChALAR BERILDI

Yongʻin – tilsiz yov. Uning xavflilik darajasi shu qadar yuqoriki, hech qanday shovqin-suronsiz paydo boʻlib, tushgan joyini lahzalar ichida vayronaga aylantiradi. Bekorga xalqimiz “oʻt balosidan saqlasin”, deyishmaydi. Shuning uchun ham favqulodda vaziyatlar va yongʻin xavfsizligi boʻyicha masʼul xodimlar yongʻin kelib chiqishining oldini olish, aholi yashash xonadonlarida, idora va tashkilotlarda, ishlab chiqarish korxonalari hamda tadbirkorlik obʼektlarida tez-tez boʻlishib, favqulodda holatlarning oldini olish yuzasidan zarur tushuntirish ishlari olib borishmoqda.

Ayni paytda esa Yongʻin xavfsizligini taʼminlash maqsadida joriy yilning 10-iyul – 10-avgust kunlari oraligʻida tashkil etilgan “Dolzarb 30 kun” tadbirlari har bir ovul va mahallada, taʼlim-tarbiya muassasalarida oʻtkazilib, unda keng aholi vakillari faol ishtirok etishmoqda.

Ana shunday tadbirlardan biri Amudaryo tumanining Jumurovul mahallasi hududidagi 45-sonli umumtaʼlim maktabi binosida qurish-taʼmirlash ishlarini olib borayotgan “Koʻna qalʼa” MChJ ishchilari ishtirokida ham oʻtkazildi.

Tadbirda, avvalo mazkur maktabda qurish-taʼmirlash ishlarini olib borayotgan muhandis-texnik xodimlar, texnika xavfsizligi boʻyicha masʼullar bilan birgalikda obʼekt hududining yongʻinga qarshi vositalar bilan jihozlanganlik holati koʻzdan kechirildi. Xususan, 500 kubometr suv sigʻimiga ega hovuz, yongʻinga qarshi qalqon, quruvchi-ishchilarning yongʻinga qarshi choralar boʻyicha tushunchalari oʻrganildi.

Shundan soʻng, quruvchi-ishchilar uchun oʻt oʻchirish avtomobili va yongʻinni bartaraf etishda zarur boʻladigan asbob-anjomlar koʻrgazmasi tashkil etilib, yongʻin hodisasi roʻy berganda qanday harakat qilish kerakligi, fuqaro yongʻin sodir boʻlgan obʼekt ichida qolib ketgan taqdirda uni qutqarish, xavfsiz hududga olib chiqish va birinchi yordam koʻrsatish choralari haqida kerakli maʼlumotlar va tushunchalar berildi.

Bundan tashqari, yongʻin hodisasi sodir boʻlganda chaqiruv boʻyicha ketayotgan oʻt oʻchirish avtomobilining koʻchalarda erkin harakatlanishiga sharoit yaratish, yongʻin oʻchirish xizmati xodimlariga fuqarolar tomonidan bilib-bilmay xalaqit berilmaslik toʻgʻrisida tushuntirishlar olib borildi. Shu bilan birga, 45-sonli maktab hududida qurish-taʼmirlash ishlarini olib borayotgan quruvchilar tomonidan elektr energiyasi bilan bogʻliq ishlarni amalga oshirishda, qora saqich moddasini eritish jarayonida olovdan foydalanishda ehtiyotkorlik bilan ish yuritish boʻyicha tavsiyalar ham berildi.

Boʻlib oʻtgan yongʻin xavfsizligi “Dolzarb 30 kun” doirasidagi koʻrgazmali tadbir “Koʻna qalʼa” MChJ muhandis-texnik xodimlari va quruvchi ishchilarining favqulodda vaziyatlarda amal qilishi zarur boʻlgan bilim va koʻnikmalarini yanada mustahkamladi.

Robiya YOʻLDOShEVA.