ФАВҚУЛОДДА ВАЗИЯТЛАРНИНГ ОЛДИНИ ОЛИШ БЎЙИЧА ТАДБИРЛАР ЎТКАЗИЛМОҚДА

Қорақалпоғистон Республикаси Вазирлар Кенгашининг 2023 йил 7 июлдаги 137-13-0-Ф/13-сонли Фармойиши ижросини таъминлаш мақсадида жорий йилнинг 10 июль – 10 август кунлари туман ҳудудида ёнғин хавфсизлигини таъминлаш бўйича “Долзарб 30 кун” тадбири ўтказилмоқда. Бундан ташқари, Ўзбекистон Республикаси Фавқулодда вазиятлар Вазирлигининг 2023 йил 29 июль кунги  шошилинч кўрсатмасида жорий йилнинг 29 июль куни Фарғона шаҳридаги 4 қаватли турар жой биносининг ер тўласида жойлашган “Караоке” клубида 6 нафар фуқаронинг вафотига, бир неча кишининг эса шифохонага ётқизилишига олиб келган ёнғин билан боғлиқ бахтсиз ҳодиса жамоатчилик эътиборини тортиб, аҳоли ўртасида катта шов-шувларга сабаб бўлганига эътибор қаратилган. Шу боис, ёнғин хавфсизлигини таъминлаш бўйича “Долзарб 30 кун” тадбири доирасида Амударё тумани фавқулодда вазиятлар бўлими ходимлари, тегишли соҳа вакиллари, туман электр тармоқлари ва “Амударётумангаз”газ таъминоти хизмати ходимлари билан биргаликда бозор ҳудудидаги савдо дўконларида ва ер тўласи бор бўлган овқатланиш ўринларида ёнғиннинг олдини олишга қаратилган профилактик тушунтириш ишлари олиб борилди.

Ёнғин – тилсиз ёв. Қўлсиз, оёқсиз, ҳеч кутилмаганда хавф солувчи бу ёв – олов билан олишиш қанчалик қийин бўлса, ундан омон қолиш эҳтимоли шунчалик кам. Фарғона шаҳридаги 4 қаватли уй ер тўласида содир бўлган ёнғин ҳам ўзининг қанчалик тажовузкорлигини, унинг чангалидан қутилиб қолиш нақадар мушкуллигини, саноқли дақиқаларда инсон ҳаётини барбод қилиши мумкинлигини яна бир бор кўрсатди. Демак, тилсиз ёв – ёнғинга қарши курашиш эмас, бу каби инсон умрига тажовуз қилгувчи ёнғин ҳодисаси содир бўлишининг олдини олиш, хавфсизлик чораларини кўриб қўйиш ҳар биримизнинг масъулиятли бурчимиздир.

Инсон ҳаётига жиддий хавф туғдирувчи, ҳатто ўлимга олиб келувчи ёнғин билан боғлиқ фавқулодда вазиятларнинг барвақт олдини олиш мақсадида ташкил этилган “Долзарб 30 кун” доирасидаги тадбирларда кўп қаватли биноларнинг ертўлаларида фаолият юритаётган тадбиркорларга электр ва газ ускуналаридан фойдаланишда эҳтиёткорлик билан иш тутиш, техника ва ёнғин хавфсизлиги қоидаларига амал қилиш юзасидан тушунтиришлар ҳамда тавсиялар берилиб, фойдаланишдаги носоз ускуна ва жиҳозларни зудлик билан таъмирлаш бўйича топшириқлар берилди.

Сўнгги кунларда Республикамизда содир бўлаётган ёнғин ҳодисалари, катталар ва бошқалар орасида сувга чўкиш, йўл-транспорт ҳодисалари натижасида фавқулодда ҳолатлар кўплаб учрамоқда. Ўтказилаётган “Долзарб 30 кун” тадбири доирасидаги профилактик суҳбатларда бу каби ҳолатлар атрофлича муҳокама этилиб, ёнғин билан боғлиқ фавқулодда вазиятларнинг барвақт олдини олиш ва уларни бартараф этиш бўйича тадбиркорларга ва аҳолига зарур таклифлар берилди.

Робия ЙЎЛДОШЕВА.