FAVQULODDA VAZIYaTLARNING OLDINI OLISh BOʻYIChA TADBIRLAR OʻTKAZILMOQDA

Qoraqalpogʻiston Respublikasi Vazirlar Kengashining 2023-yil 7-iyuldagi 137-13-0-F/13-sonli Farmoyishi ijrosini taʼminlash maqsadida joriy yilning 10-iyul – 10-avgust kunlari tuman hududida yongʻin xavfsizligini taʼminlash boʻyicha “Dolzarb 30 kun” tadbiri oʻtkazilmoqda. Bundan tashqari, Oʻzbekiston Respublikasi Favqulodda vaziyatlar Vazirligining 2023-yil 29-iyul kungi  shoshilinch koʻrsatmasida joriy yilning 29-iyul kuni Fargʻona shahridagi 4 qavatli turar joy binosining yer toʻlasida joylashgan “Karaoke” klubida 6 nafar fuqaroning vafotiga, bir necha kishining esa shifoxonaga yotqizilishiga olib kelgan yongʻin bilan bogʻliq baxtsiz hodisa jamoatchilik eʼtiborini tortib, aholi oʻrtasida katta shov-shuvlarga sabab boʻlganiga eʼtibor qaratilgan. Shu bois, yongʻin xavfsizligini taʼminlash boʻyicha “Dolzarb 30 kun” tadbiri doirasida Amudaryo tumani favqulodda vaziyatlar boʻlimi xodimlari, tegishli soha vakillari, tuman elektr tarmoqlari va “Amudaryotumangaz”gaz taʼminoti xizmati xodimlari bilan birgalikda bozor hududidagi savdo doʻkonlarida va yer toʻlasi bor boʻlgan ovqatlanish oʻrinlarida yongʻinning oldini olishga qaratilgan profilaktik tushuntirish ishlari olib borildi.

Yongʻin – tilsiz yov. Qoʻlsiz, oyoqsiz, hech kutilmaganda xavf soluvchi bu yov – olov bilan olishish qanchalik qiyin boʻlsa, undan omon qolish ehtimoli shunchalik kam. Fargʻona shahridagi 4 qavatli uy yer toʻlasida sodir boʻlgan yongʻin ham oʻzining qanchalik tajovuzkorligini, uning changalidan qutilib qolish naqadar mushkulligini, sanoqli daqiqalarda inson hayotini barbod qilishi mumkinligini yana bir bor koʻrsatdi. Demak, tilsiz yov – yongʻinga qarshi kurashish emas, bu kabi inson umriga tajovuz qilguvchi yongʻin hodisasi sodir boʻlishining oldini olish, xavfsizlik choralarini koʻrib qoʻyish har birimizning masʼuliyatli burchimizdir.

Inson hayotiga jiddiy xavf tugʻdiruvchi, hatto oʻlimga olib keluvchi yongʻin bilan bogʻliq favqulodda vaziyatlarning barvaqt oldini olish maqsadida tashkil etilgan “Dolzarb 30 kun” doirasidagi tadbirlarda koʻp qavatli binolarning yertoʻlalarida faoliyat yuritayotgan tadbirkorlarga elektr va gaz uskunalaridan foydalanishda ehtiyotkorlik bilan ish tutish, texnika va yongʻin xavfsizligi qoidalariga amal qilish yuzasidan tushuntirishlar hamda tavsiyalar berilib, foydalanishdagi nosoz uskuna va jihozlarni zudlik bilan taʼmirlash boʻyicha topshiriqlar berildi.

Soʻnggi kunlarda Respublikamizda sodir boʻlayotgan yongʻin hodisalari, kattalar va boshqalar orasida suvga choʻkish, yoʻl-transport hodisalari natijasida favqulodda holatlar koʻplab uchramoqda. Oʻtkazilayotgan “Dolzarb 30 kun” tadbiri doirasidagi profilaktik suhbatlarda bu kabi holatlar atroflicha muhokama etilib, yongʻin bilan bogʻliq favqulodda vaziyatlarning barvaqt oldini olish va ularni bartaraf etish boʻyicha tadbirkorlarga va aholiga zarur takliflar berildi.

Robiya YOʻLDOShEVA.