ИЖТИМОИЙ ҲАМКОРЛИК САМАРА БЕРМОҚДА
Мамлакатимизда хотин-қизлар манфааатларини ҳимоя қилиш борасида амалга оширилаётган кенг кўламли саъй-ҳаракатлар натижасида бугунги кунда уларнинг жамиятимиз ҳаётидаги ўрни ва нуфузи тобора ошиб бормоқда. Бунда Ўзбекистон Республикаси Конституцияси ҳамда бошқа қонун ҳужжатларида аёллар ҳуқуқларининг кафолатлари ўз ифодасини топгани, қатор халқаро ҳужжатлар, чунончи, БМТнинг "Хотин-қизлар ҳуқуқлари камситилишининг барча шаклларига барҳам бериш тўғрисида”ги Конвенцияси ратификация қилингани муҳим омил бўлаётир.
Ҳар қайси жамиятнинг маданий даражаси ва маънавий баркамоллиги аёлларга бўлган муносабат билан белгиланади. Оқила, гўзал аёллар ўзларининг ғамхўрлиги, меҳрибонлиги билан нафақат оила, шу билан бирга, бутун жамиятда соғлом муҳитни сақлаб турадилар. Юртимизда хотин-қизларга бўлган эътибор ва ғамхўрлик янада юқори босқичга кўтарилгани бунинг ёрқин ифодасидир.
Давлат ҳамда жамоат ташкилотлари ҳамкорлигида хотин-қизларнинг ижтимоий-сиёсий фаоллигини ошириш, билим ва малакасини юксалтириш, оила, никоҳ муносабатларини тартибга солиш борасида бир қатор ишлар амалга оширилаётгани эътиборга молик. Жумладан, оилалар мустаҳкамлигига таъсир кўрсатаётган салбий ҳолатлар комплекс тарзда ўрганилиб, оилаларда ижтимоий-маънавий муҳитни соғломлаштириш, хотин-қизлар ҳуқуқларини ҳимоя қилиш, айниқса, қизларни касб-ҳунарга йўналтиришга қаратилган чора-тадбирлар изчил рўёбга чиқарилмоқда.
Шунингдек, ФҲДЁ бўлимлари ходимлари, хотин-қизлар қўмиталари, "Маҳалла” хайрия жамоат фонди, соғлиқни сақлаш муассасалари, фуқароларнинг ўзини ўзи бошқариш органлари ҳамда оммавий ахборот воситалари вакиллари билан ҳамкорликда жойларда ташкил этилаётган амалий учрашувлар, ҳуқуқий маърифат кунлари соғлом оилани шакллантириш, ёш оилалар тотувлигини асраш, йигит-қизларни оилавий ҳаётга тайёрлаш ишларини самарали йўлга қўйишда муҳим аҳамият касб этаяпти. Шунингдек, хотин-қизлар ўртасида кичик бизнес ва хусусий тадбиркорликни янада ривожлантириш, уларни касаначилик фаолиятига кенг жалб этиш, айниқса, баркамол авлодни вояга етказишда оиланинг ролини ошириш, бунда давлат ва нодавлат ташкилотлари ҳамкорлигини янада кучайтириш бўйича амалий ишлар қилинаётганини таъкидлаб ўтиш жоиз.
Фуқаролар йиғинларининг аҳоли, айниқса, ёшлар ўртасида олиб борилаётган маънавий-маърифий ишлари самарадорлигини оширишга ҳам алоҳида эътибор берилмоқда. Фонднинг туман бўлинмаси томонидан "Оила – маҳалла – таълим муассасаси ҳамкорлигини янада кучайтирайлик” номли қўлланма ишлаб чиқилди. Туман ХТМФМТТЭ бўлими билан биргаликда таълим муассасалари маънавиятчилари ҳамда маҳалла маслаҳатчилари иштирокида семинарлар ўтказилмоқда. Қисқа қилиб айтганда, эзгу мақсадлар йўлидаги ижтимоий шериклик – турмушимиз сифати ошишига хизмат қилмоқда.
Гавхар ЧИМБАЙЧИЕВА, "Маҳалла” хайрия жамоат фонди туман бўлинмаси бош мутахассиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
