АМИР ТЕМУР НОМЛИ ВА ОҚ ОЛТИН ОВУЛЛАРИДА СУВНИ ЧУЧУКЛАНТИРУВЧИ СТАНЦИЯ ИШГА ТУШИРИЛДИ
Сўнгги йилларда бутун ер юзида сув муаммоси ниҳоятда долзарб масалага айланмоқда. Айрим ҳудудларда аҳолига тоза ичимлик сувини етказиб бериш қатор қийинчиликлар билан амалга оширилмоқда. Амударё туманида ҳам бу борадаги мавжуд муаммоларни бартараф этиш ва аҳолини тоза ичимлик суви билан таъминлаш масалаларига алоҳида эътибор қаратилмоқда.
Яқинда туманнинг Амир Темур номли овули аҳолисига тоза ичимлик сувини етказиб бериш мақсадида ер остидан тортиб олинган сувни чучуклантирувчи ускуналар ўрнатилган “ЭКОС” станцияси ишга туширилди. Ушбу қурилма орқали эндиликда овулда 242 та хонадонга чучуклаштирилган сув етказиб берилмоқда.
Туманнинг Туркманистон Республикаси билан чегарадош ҳудудидаги Амир Темур номли овул оқар сув йўлларининг охирги қисмида жойлашган. Чекка ҳудуддаги мазкур овул ичимлик суви тармоғига ҳам уланмаган. Аҳолини тоза ичимлик суви билан таъминлаш мақсадида ўтган йили ҳам туман ҳокимлигининг ташаббуси билан 5 млрд. 300 млн. сўм эвазига сув тозалаш қурилмаси ва махсус иншоот бунёд этиш бошланган эди. Ҳозирги кунда мазкур сув тозалаш маркази орқали овулдаги 244 та хонадон тоза ичимлик суви билан таъминланмоқда. Ушбу сув тозалаш қурилмаси орқали ер ости сувлари 35 метр чуқурликдан, диаметри 300 миллиметр бўлган 4 дона қувурлар орқали тортиб олиниб, кераксиз тузлар ва минераллардан тозаланган ҳолда аҳолига истеъмол учун етказиб берилмоқда.
Оқ олтин овулида ҳам аҳолига тоза ичимлик сувини етказиб бериш мақсадида худди шундай сувни чучуклантириш ускуналари ўрнатилган “ЭКОС” станцияси фойдаланишга топширилган. Мазкур станция орқали овулда 560 та хонадон чучуклаштирилган сув билан таъминлаш имконияти яратилди.
Таъкидлаш жоизки, фан-техника тараққиёти даврида аҳолини чучук сув билан таъминлаш масаласи жиддий муаммо сифатида эътироф этилмоқда. Ер куррасидаги сув миқдори 1,4 млрд. куб километрга тенг бўлиб, шундан 98 фоизи денгиз ва океанларнинг шўр сувларига тўғри келади. Чучук сув миқдори кам бўлиб, унинг танқислиги кўп ҳудудларда кузатилади. Сув танқислиги натижасида кўп минтақаларда аҳоли юқори минераллашган сувларни истеъмол қилишга мажбур бўлмоқда. Ўрта Осиё мамлакатларида, хусусан Ўзбекистонда анчагина аҳоли шундай сувлардан фойдаланади. Минераллашган сувларни узоқ вақт истеъмол қилиш ҳам инсон саломатлигига салбий таъсир кўрсатади.
Кейинги йилларда Орол бўйи ҳудудида яшовчи аҳоли ўртасида буйрак, қовуқ ва ўт қопи касалликларининг кўпайиб кетаётгани, болалар ўртасида ўлимнинг тобора ортиб бораётгани мунтазам равишда минераллашган сувларни истеъмол қилиш оқибатидир. Олимларнинг фикрича, келажакда чучук сувлар миқдори бундан ҳам камайиб кетади, шу сабабли асосий сув манбаи ҳисобланган шўр сувларни чучук сувга айлантириб, аҳоли талабини қондириш муаммоси кўндаланг бўлиб турибди. Сувни чучуклаштиришда асосан электролиз, дистилляция, музлатиш ва юқори фильтрлаш усулларидан фойдаланилади.
Амир Темур номли ва Оқ олтин овуллари аҳолиси эндиликда тоза ичимлик сувидан фойдаланиш имконияти яратилганидан ниҳоятда мамнун ва мазкур станцияни қуриш ташаббуси билан чиққан, бош-қош бўлган тадбиркорга, масъулларга ва давлатимизга миннатдорчилик билдирмоқдалар.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
