AMIR TEMUR NOMLI VA OQ OLTIN OVULLARIDA SUVNI ChUChUKLANTIRUVChI STANTsIYa IShGA TUShIRILDI
Soʻnggi yillarda butun yer yuzida suv muammosi nihoyatda dolzarb masalaga aylanmoqda. Ayrim hududlarda aholiga toza ichimlik suvini yetkazib berish qator qiyinchiliklar bilan amalga oshirilmoqda. Amudaryo tumanida ham bu boradagi mavjud muammolarni bartaraf etish va aholini toza ichimlik suvi bilan taʼminlash masalalariga alohida eʼtibor qaratilmoqda.
Yaqinda tumanning Amir Temur nomli ovuli aholisiga toza ichimlik suvini yetkazib berish maqsadida yer ostidan tortib olingan suvni chuchuklantiruvchi uskunalar oʻrnatilgan “EKOS” stantsiyasi ishga tushirildi. Ushbu qurilma orqali endilikda ovulda 242 ta xonadonga chuchuklashtirilgan suv yetkazib berilmoqda.
Tumanning Turkmaniston Respublikasi bilan chegaradosh hududidagi Amir Temur nomli ovul oqar suv yoʻllarining oxirgi qismida joylashgan. Chekka hududdagi mazkur ovul ichimlik suvi tarmogʻiga ham ulanmagan. Aholini toza ichimlik suvi bilan taʼminlash maqsadida oʻtgan yili ham tuman hokimligining tashabbusi bilan 5 mlrd. 300 mln. soʻm evaziga suv tozalash qurilmasi va maxsus inshoot bunyod etish boshlangan edi. Hozirgi kunda mazkur suv tozalash markazi orqali ovuldagi 244 ta xonadon toza ichimlik suvi bilan taʼminlanmoqda. Ushbu suv tozalash qurilmasi orqali yer osti suvlari 35 metr chuqurlikdan, diametri 300 millimetr boʻlgan 4 dona quvurlar orqali tortib olinib, keraksiz tuzlar va minerallardan tozalangan holda aholiga isteʼmol uchun yetkazib berilmoqda.
Oq oltin ovulida ham aholiga toza ichimlik suvini yetkazib berish maqsadida xuddi shunday suvni chuchuklantirish uskunalari oʻrnatilgan “EKOS” stantsiyasi foydalanishga topshirilgan. Mazkur stantsiya orqali ovulda 560 ta xonadon chuchuklashtirilgan suv bilan taʼminlash imkoniyati yaratildi.
Taʼkidlash joizki, fan-texnika taraqqiyoti davrida aholini chuchuk suv bilan taʼminlash masalasi jiddiy muammo sifatida eʼtirof etilmoqda. Yer kurrasidagi suv miqdori 1,4 mlrd. kub kilometrga teng boʻlib, shundan 98 foizi dengiz va okeanlarning shoʻr suvlariga toʻgʻri keladi. Chuchuk suv miqdori kam boʻlib, uning tanqisligi koʻp hududlarda kuzatiladi. Suv tanqisligi natijasida koʻp mintaqalarda aholi yuqori minerallashgan suvlarni isteʼmol qilishga majbur boʻlmoqda. Oʻrta Osiyo mamlakatlarida, xususan Oʻzbekistonda anchagina aholi shunday suvlardan foydalanadi. Minerallashgan suvlarni uzoq vaqt isteʼmol qilish ham inson salomatligiga salbiy taʼsir koʻrsatadi.
Keyingi yillarda Orol boʻyi hududida yashovchi aholi oʻrtasida buyrak, qovuq va oʻt qopi kasalliklarining koʻpayib ketayotgani, bolalar oʻrtasida oʻlimning tobora ortib borayotgani muntazam ravishda minerallashgan suvlarni isteʼmol qilish oqibatidir. Olimlarning fikricha, kelajakda chuchuk suvlar miqdori bundan ham kamayib ketadi, shu sababli asosiy suv manbai hisoblangan shoʻr suvlarni chuchuk suvga aylantirib, aholi talabini qondirish muammosi koʻndalang boʻlib turibdi. Suvni chuchuklashtirishda asosan elektroliz, distillyatsiya, muzlatish va yuqori filtrlash usullaridan foydalaniladi.
Amir Temur nomli va Oq oltin ovullari aholisi endilikda toza ichimlik suvidan foydalanish imkoniyati yaratilganidan nihoyatda mamnun va mazkur stantsiyani qurish tashabbusi bilan chiqqan, bosh-qosh boʻlgan tadbirkorga, masʼullarga va davlatimizga minnatdorchilik bildirmoqdalar.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
