“ЁШЛАР РАҚС ФЕСТИВАЛИ”НИНГ АМУДАРЁ ТУМАНИ ҒОЛИБЛАРИ АНИҚЛАНДИ

Мамлакатимизда ёш истеъдод эгаларини қўллаб-қувватлаш, уларнинг алоҳида қобилиятларини янада ривожлантириш мақсадида “Беш ташаббус оилмпиадаси” диорасида ўтказилаётган “Ёшлар рақс фестивали” кўплаб ёш санъат ғунчаларини кашф этиб, уларнинг катта саҳналарда ўз санъатларини намойиш этиш имконини бермоқда.

Жорий йилнинг 17 май санасида Амударё туманининг санъатсевар истеъдодли ёшлари иштирокида бўлиб ўтган “Ёшлар рақс фестивали”нинг туман босқичида ҳам замонавий ва миллий рақс санъати ихлосмандлари бўлган истеъдодли ёшлар ғолиблик учун саҳнага чиқдилар.

Амударё тумани Маданият маркази биносида бўлиб ўтган мазкур фестивалнинг туман босқичида фестиваль Низомига кўра, маҳаллалар ва секторларда бўлиб ўтган дастлабки саралаш босқичларида ғолибликни қўлга киритган рақс санъати ҳаваскорлари иштирок этишди.

Аввало, Амударё туманининг маҳалла ва қишлоқларида ташкил этилган рақс тўгараги аъзоларига масъуллар томонидан фестивалнинг Низоми, иштирокчиларга қўйиладиган талаблар, қоидалар юзасидан зарур тушунчалар берилди.

Фестиваль турли ёш тоифасидаги иштирокчилар гуруҳлари ўртасида ўтказилди ва нуфузли ҳакамлар ҳайъати таркиби тасдиқланиб, ижрочиларнинг маҳоратлари очиқлик ва шаффофлик асосида баҳолаб борилди.

Унга кўра, 10-15 ёшли иштирокчилар орасидаги якка миллий рақс ижрочиларидан Чордара маҳалласидан Динорахон Болтабоева фахрли 1-ўринга лойиқ кўрилди. Ушбу ёш тоифасидаги Олмазор маҳаллалик Дилрабохон Ерманова 2-ўрин, қиличбойлик Лайлохон Матёқубова 3-ўрин соҳибалари бўлдилар.

Шунингдек, 10-15 ёшли ижрочилар ўртасидаги замонавий яккахон рақс йўналишида Қиличбой қишлоғидан Озода Ражаббоева фахрли 1-ўринни эгаллаган бўлса, Гулзор маҳалласидан Саломат ЙЎлдошева 2-ўринга, Бобур номли овулдан Мунирахон Қодирова эса 3-ўринга сазовор бўлдилар.

Фестивалнинг 16-22 ёш тоифасидаги иштирокчилари ижросидаги турфа рақслар янада дилтортар ва жозибалилиги билан томошабинларга завқ-шавқ бағишлади. Унга кўра, яккахон миллий рақс йўналишида Уйшин маҳалласидан Гулруҳ Абдуллаеванинг маҳорати юқори баҳоланди ва 1-ўринга лойиқ кўрилди. Ушбу йўналишда Чордара маҳалласидан Гулноза Гулмонова 2-ўринни, Торёп маҳалласидан Кумушой Раҳимбоева 3-ўринни эгалладилар.

Томошабинлар томонидан муносиб олқишларга сазовор бўлган яккахон замонавий рақс ижрочиси Жумуровул маҳаллалик Сарвиноз Эркабоева ўз йўналиши ва ёш тоифасида 1-ўрин соҳибаси бўлди. Ушбу йўналишда саҳнага чиққан қиличбойлик Ёдгора Аминова 2-ўринни, Гулзор маҳаллалик Рухшона Адамбоева эса 3-ўринни забт этишди.

Фестивалда 23-30 ёшлилар ўртасидаги яккахон миллий рақс ижрочилиги бўйича баҳслар янада қизиқарли таассуротларга бой бўлди. Унда Ўрта қалъадан Зуҳрахон Шомуродова ижросидаги замонавий миллий рақс барчанинг олқишига сазовор бўлди ва Зуҳрахон Шомуродова ўзининг ма\орати ҳамда гўзал ижроси билан ўз ёш тоифасидаги  барча ижрочиларни ортда қолдириб, 1-ўрин соҳибаси  бўлди.

Ўз истеъдодларини моҳирона намойиш этган фестивалнинг туман босқичи ғолиблари “Ёшлар рақс фестивали”нинг Қорақалпоғистон Республикаси босқичига йўлланмаларни қўлга киритдилар.

Робия ЙЎЛДОШЕВА.