“YoShLAR RAQS FESTIVALI”NING AMUDARYo TUMANI GʻOLIBLARI ANIQLANDI

Mamlakatimizda yosh isteʼdod egalarini qoʻllab-quvvatlash, ularning alohida qobiliyatlarini yanada rivojlantirish maqsadida “Besh tashabbus oilmpiadasi” diorasida oʻtkazilayotgan “Yoshlar raqs festivali” koʻplab yosh sanʼat gʻunchalarini kashf etib, ularning katta sahnalarda oʻz sanʼatlarini namoyish etish imkonini bermoqda.

Joriy yilning 17-may sanasida Amudaryo tumanining sanʼatsevar isteʼdodli yoshlari ishtirokida boʻlib oʻtgan “Yoshlar raqs festivali”ning tuman bosqichida ham zamonaviy va milliy raqs sanʼati ixlosmandlari boʻlgan isteʼdodli yoshlar gʻoliblik uchun sahnaga chiqdilar.

Amudaryo tumani Madaniyat markazi binosida boʻlib oʻtgan mazkur festivalning tuman bosqichida festival Nizomiga koʻra, mahallalar va sektorlarda boʻlib oʻtgan dastlabki saralash bosqichlarida gʻoliblikni qoʻlga kiritgan raqs sanʼati havaskorlari ishtirok etishdi.

Avvalo, Amudaryo tumanining mahalla va qishloqlarida tashkil etilgan raqs toʻgaragi aʼzolariga masʼullar tomonidan festivalning Nizomi, ishtirokchilarga qoʻyiladigan talablar, qoidalar yuzasidan zarur tushunchalar berildi.

Festival turli yosh toifasidagi ishtirokchilar guruhlari oʻrtasida oʻtkazildi va nufuzli hakamlar hayʼati tarkibi tasdiqlanib, ijrochilarning mahoratlari ochiqlik va shaffoflik asosida baholab borildi.

Unga koʻra, 10-15 yoshli ishtirokchilar orasidagi yakka milliy raqs ijrochilaridan Chordara mahallasidan Dinoraxon Boltaboyeva faxrli 1-oʻringa loyiq koʻrildi. Ushbu yosh toifasidagi Olmazor mahallalik Dilraboxon Yermanova 2-oʻrin, qilichboylik Layloxon Matyoqubova 3-oʻrin sohibalari boʻldilar.

Shuningdek, 10-15 yoshli ijrochilar oʻrtasidagi zamonaviy yakkaxon raqs yoʻnalishida Qilichboy qishlogʻidan Ozoda Rajabboyeva faxrli 1-oʻrinni egallagan boʻlsa, Gulzor mahallasidan Salomat YOʻldosheva 2-oʻringa, Bobur nomli ovuldan Muniraxon Qodirova esa 3-oʻringa sazovor boʻldilar.

Festivalning 16-22 yosh toifasidagi ishtirokchilari ijrosidagi turfa raqslar yanada diltortar va jozibaliligi bilan tomoshabinlarga zavq-shavq bagʻishladi. Unga koʻra, yakkaxon milliy raqs yoʻnalishida Uyshin mahallasidan Gulruh Abdullayevaning mahorati yuqori baholandi va 1-oʻringa loyiq koʻrildi. Ushbu yoʻnalishda Chordara mahallasidan Gulnoza Gulmonova 2-oʻrinni, Toryop mahallasidan Kumushoy Rahimboyeva 3-oʻrinni egalladilar.

Tomoshabinlar tomonidan munosib olqishlarga sazovor boʻlgan yakkaxon zamonaviy raqs ijrochisi Jumurovul mahallalik Sarvinoz Erkaboyeva oʻz yoʻnalishi va yosh toifasida 1-oʻrin sohibasi boʻldi. Ushbu yoʻnalishda sahnaga chiqqan qilichboylik Yodgora Aminova 2-oʻrinni, Gulzor mahallalik Ruxshona Adamboyeva esa 3-oʻrinni zabt etishdi.

Festivalda 23-30 yoshlilar oʻrtasidagi yakkaxon milliy raqs ijrochiligi boʻyicha bahslar yanada qiziqarli taassurotlarga boy boʻldi. Unda Oʻrta qalʼadan Zuhraxon Shomurodova ijrosidagi zamonaviy milliy raqs barchaning olqishiga sazovor boʻldi va Zuhraxon Shomurodova oʻzining ma\orati hamda goʻzal ijrosi bilan oʻz yosh toifasidagi  barcha ijrochilarni ortda qoldirib, 1-oʻrin sohibasi  boʻldi.

Oʻz isteʼdodlarini mohirona namoyish etgan festivalning tuman bosqichi gʻoliblari “Yoshlar raqs festivali”ning Qoraqalpogʻiston Respublikasi bosqichiga yoʻllanmalarni qoʻlga kiritdilar.

Robiya YOʻLDOShEVA.