ГРАНТ ЛОЙИҲАСИ ДОИРАСИДА ТАДБИР ЎТКАЗИЛДИ

Ҳозирги кунда мамлакатимиз тараққиётига салбий таъсир кўрсатувчи ва ёшларни бузғунчи ғоялар таъсирига тортишга интилаётган экстремистик гуруҳларга қарши кескин кураш олиб борилаётир. Шу билан бир қаторда ёшларни маънавий ва мафкуравий хуружлардан асраш, уларга қарши ўз фикри ва дунёқарашига эга бўлган баркамол авлодни тарбиялашга эътибор кучайтирилмоқда. Чунки ёшлар жамиятнинг энг катта ва ҳаракатчан қисми ҳисобланади.

Бунингдек мақсад-вазифаларни амалга оширишда халқимизнинг фақат ўзигагина хос, авлодлардан авлодларга ўтиб келаётган урф-одатлари, миллий қадриятларининг ҳам муносиб ўрни бор. Чунки бу муқаддас қадриятлар ёшларни ўз-ўзлигини англашига, миллий ғурури юксалишига, ўз миллати, динини қадрлашига, Ватани тақдирига дахлдорлигини англашига ва келажагига юксак орзулар билан интилишга ундайди.

Амударё туманининг чекка ҳудудларидан бири – Бобур номли овулда ҳам “бир болага етти қўшни ота-она” тамойилига амал қилган ҳолда ёши улуғ нуроний отахонлар, онахонлар ўсиб келаётган ёш авлодни баркамол қилиб вояга етказишга интилмоқдалар. Овул аҳли ҳеч бири-бирининг фарзандига бефарқ қарамайди, ноўрин муомаласини ё қилиғини кўриб қолишса, болаларнинг кўнглига озор бермай, яхши сўзи билан йўлга солишади.

Шунингдек, ёшлар ўртасида жиноятчилик, ҳуқуқбузарликлар содир этилишининг олдини олиш, тартиб бузишга мойил, ҳаётида ўзига боғлиқ бўлмаган ҳолда муаммоли вазиятларга дуч келиб қолган, ижтимоий ҳимояга муҳтож ёшлар билан ишлашишда ўзига хос тизим яратилган. Шу йўналишдаги чора-тадбирлардан бири “Бир нуроний – ўн ёшга масъул” тамойили асосида олиб борилаётган ишлардир. Таълим фахрийлари, овулнинг ўз ҳаёти билан бошқаларга ўрнак бўлаётган нуронийлари Абдураҳмон Мадатов, Муротбой Собуров ва узоқ йиллар ўзини ўзи бошқариш органларида самарали меҳнат қилган ибратли онахон Малика Шукурлаеваларга табиатан тартиббузарликлар содир этишга мойил, ҳаётида турли муаммоли вазиятларга дуч келган ва моддий-маънавий кўмакка муҳтож ёшлар бириктирилиб, муаммолари ҳал қилинмоқда ва ҳаётда ўзларини тиклаб олишларига кўмак берилмоқда.

Бу борада олиб борилаётган ишлар, ёшлар тарбиясида нуроний отахон, онахонларнинг роли, ёшлар орасида ўзаро  дўстлик, биродарлик, ҳамжиҳатликни қарор топтириш борасидаги саъй-ҳаракатлар, эришилаётган натижаларга бағишланган йиғилиш ўтказилди.

Овул фуқаролар йиғини маъмурий биносида “Амударё телевидениеси” амалга ошираётган “Юксак маънавиятли ва ахлоқли ёшлар – келажак пойдевори” номли Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган грант лойиҳаси режасига кўра ташкиллаштирилган йиғилишга овул фуқаролар йиғини масъуллари, нуронийлари, ёшлар вакиллари иштирок этдилар.

Йиғилишда овул фуқаролар йиғини раиси Гулбаҳор  Райимова, лойиҳа ижрочиларидан Ойгул Ражабова, овул ёшлари етакчиси Асилбек Раҳимов, кексалар масалалари бўйича овул фуқарорлар йиғини раиси ўринбосари Муротбой Собуров, меҳнат фахрийлари Абдураҳмон Мадатов, Малика Шукуруллаевалар мавзу доирасида ўз фикр-мулоҳазаларини билдирдилар.

Ёшлар тарбияси – умумхалқ иши. Бу ибора бежизга тез-тез тилга олинмайди. Чунки бола оилада илк тарбия олгач, боғчага, мактабга боради, улғайиб, турли жамоаларда меҳнат қилади, маҳалла ҳаётига аралашади. Ушбу жараёнларда ёши улуғ инсонлар  ҳамжиҳатликда уларга беминнат мураббийлик қилиб, йўл-йўриқ кўрсатиб борсалар, ўз  ҳаёти билан ибрат бўлсалар, албатта, бу ўз натижасини беради.

Маҳмуджон Шомуродов