GRANT LOYIHASI DOIRASIDA TADBIR OʻTKAZILDI

Hozirgi kunda mamlakatimiz taraqqiyotiga salbiy taʼsir koʻrsatuvchi va yoshlarni buzgʻunchi gʻoyalar taʼsiriga tortishga intilayotgan ekstremistik guruhlarga qarshi keskin kurash olib borilayotir. Shu bilan bir qatorda yoshlarni maʼnaviy va mafkuraviy xurujlardan asrash, ularga qarshi oʻz fikri va dunyoqarashiga ega boʻlgan barkamol avlodni tarbiyalashga eʼtibor kuchaytirilmoqda. Chunki yoshlar jamiyatning eng katta va harakatchan qismi hisoblanadi.

Buningdek maqsad-vazifalarni amalga oshirishda xalqimizning faqat oʻzigagina xos, avlodlardan avlodlarga oʻtib kelayotgan urf-odatlari, milliy qadriyatlarining ham munosib oʻrni bor. Chunki bu muqaddas qadriyatlar yoshlarni oʻz-oʻzligini anglashiga, milliy gʻururi yuksalishiga, oʻz millati, dinini qadrlashiga, Vatani taqdiriga daxldorligini anglashiga va kelajagiga yuksak orzular bilan intilishga undaydi.

Amudaryo tumanining chekka hududlaridan biri – Bobur nomli ovulda ham “bir bolaga yetti qoʻshni ota-ona” tamoyiliga amal qilgan holda yoshi ulugʻ nuroniy otaxonlar, onaxonlar oʻsib kelayotgan yosh avlodni barkamol qilib voyaga yetkazishga intilmoqdalar. Ovul ahli hech biri-birining farzandiga befarq qaramaydi, nooʻrin muomalasini yo qiligʻini koʻrib qolishsa, bolalarning koʻngliga ozor bermay, yaxshi soʻzi bilan yoʻlga solishadi.

Shuningdek, yoshlar oʻrtasida jinoyatchilik, huquqbuzarliklar sodir etilishining oldini olish, tartib buzishga moyil, hayotida oʻziga bogʻliq boʻlmagan holda muammoli vaziyatlarga duch kelib qolgan, ijtimoiy himoyaga muhtoj yoshlar bilan ishlashishda oʻziga xos tizim yaratilgan. Shu yoʻnalishdagi chora-tadbirlardan biri “Bir nuroniy – oʻn yoshga masʼul” tamoyili asosida olib borilayotgan ishlardir. Taʼlim faxriylari, ovulning oʻz hayoti bilan boshqalarga oʻrnak boʻlayotgan nuroniylari Abdurahmon Madatov, Murotboy Soburov va uzoq yillar oʻzini oʻzi boshqarish organlarida samarali mehnat qilgan ibratli onaxon Malika Shukurlayevalarga tabiatan tartibbuzarliklar sodir etishga moyil, hayotida turli muammoli vaziyatlarga duch kelgan va moddiy-maʼnaviy koʻmakka muhtoj yoshlar biriktirilib, muammolari hal qilinmoqda va hayotda oʻzlarini tiklab olishlariga koʻmak berilmoqda.

Bu borada olib borilayotgan ishlar, yoshlar tarbiyasida nuroniy otaxon, onaxonlarning roli, yoshlar orasida oʻzaro  doʻstlik, birodarlik, hamjihatlikni qaror toptirish borasidagi saʼy-harakatlar, erishilayotgan natijalarga bagʻishlangan yigʻilish oʻtkazildi.

Ovul fuqarolar yigʻini maʼmuriy binosida “Amudaryo televideniyesi” amalga oshirayotgan “Yuksak maʼnaviyatli va axloqli yoshlar – kelajak poydevori” nomli Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan grant loyihasi rejasiga koʻra tashkillashtirilgan yigʻilishga ovul fuqarolar yigʻini masʼullari, nuroniylari, yoshlar vakillari ishtirok etdilar.

Yigʻilishda ovul fuqarolar yigʻini raisi Gulbahor  Rayimova, loyiha ijrochilaridan Oygul Rajabova, ovul yoshlari yetakchisi Asilbek Rahimov, keksalar masalalari boʻyicha ovul fuqarorlar yigʻini raisi oʻrinbosari Murotboy Soburov, mehnat faxriylari Abdurahmon Madatov, Malika Shukurullayevalar mavzu doirasida oʻz fikr-mulohazalarini bildirdilar.

Yoshlar tarbiyasi – umumxalq ishi. Bu ibora bejizga tez-tez tilga olinmaydi. Chunki bola oilada ilk tarbiya olgach, bogʻchaga, maktabga boradi, ulgʻayib, turli jamoalarda mehnat qiladi, mahalla hayotiga aralashadi. Ushbu jarayonlarda yoshi ulugʻ insonlar  hamjihatlikda ularga beminnat murabbiylik qilib, yoʻl-yoʻriq koʻrsatib borsalar, oʻz  hayoti bilan ibrat boʻlsalar, albatta, bu oʻz natijasini beradi.

Mahmudjon Shomurodov