ЕР МУНОСАБАТЛАРИДА ТЕНГЛИК ВА ШАФФОФЛИК ТАЪМИНЛАНАДИ

Ер участкаларини ажратишнинг барча учун тенг, шаффоф ва бозор тамойилларига асосланган тартибини жорий этиш, ерга оид мулкий ва ҳуқуқий муносабатларда барқарорликни таъминлаш, ерларни муҳофаза қилиш, ер эгаларининг мулкий ҳуқуқларини кафолатлаш, шунингдек, ернинг иқтисодий қийматини белгилаш орқали уни фуқаролик ҳуқуқий муносабатлар объекти сифатида эркин муомалага киритишга қаратилган қатор ислоҳотлар амалга ошириб келинмоқда.

Президентимизнинг “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги Фармонига кўра, 2021 йил 1 августдан бошлаб, ер участкалари хусусий секторга мулк ва ижара ҳуқуқи асосида, давлат органлари, муассасалари, корхоналари, фуқароларнинг ўзини ўзи бошқариш органларига доимий фойдаланиш ҳуқуқи асосида ажратилиши йўлга қўйилди.

Фармонга мувофиқ, мерос қилиб қолдириладиган умрбод эгалик, доимий эгалик, вақтинча фойдаланиш ҳуқуқи билан ер ажратиш тартиби бекор қилинди. Бунда илгари ажратилган ер участкаларига бўлган бундай ҳуқуқлар уларнинг эгаларида амалдаги тартибда сақланиб қолинди. Ижарага олинган ер участкасида қонунчиликда кўрсатилган тартибда қурилган кўчмас мулк объектига мулк ҳуқуқи бошқа шахсга ўтган тақдирда, ушбу объектга мулк ҳуқуқи билан биргаликда у жойлашган ер участкасига бўлган ижара ҳуқуқи ҳам янги мулкдорга ўтиши белгиланди.

Мазкур Фармон ердан оқилона фойдаланиш орқали халқимизнинг турмуш фаровонлигини ошириш борасида бошланган ислоҳотларни янги босқичга олиб чиқишда муҳим асос бўлади. Шунингдек, ер билан боғлиқ муносабатлардаги коррупцион ҳолатларнинг олди олинади ҳамда ердан фойдаланиш борасида барча учун шаффоф бўлган тизим йўлга қўйилади. Қонунчиликдаги бу каби нормаларни мукаммаллаштириш, фуқароларнинг ҳуқуқ ва манфаатларини янада кучли муҳофаза этиш, қонун устуворлигини таъминлашга хизмат қилади.

Қ.Атамурадов, Фуқаролик ишлари бўйича Амударё тумани суди раиси.