Халқ депутатлари Амударё туман Кенгашининг 59-сессияси тўғрисида ахборот

2023 йил 31 март куни Халқ депутатлари Амударё туман Кенгашининг 59-сессияси бўлиб ўтди.

Сессия ишида туман Кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этди.

Сессияни туман ҳокими – Халқ депутатлари туман Кенгаши раиси Султонбой Йўлдашев очди ва олиб борди.

Сессия котиблигига 2-Чордара сайлов округидан депутат Муяссар Рахматуллаева сайланди.

Сессияда дастлаб маҳаллий бюджетнинг 2023 йил 1 январь ҳолатига аниқланган эркин қолдиқ маблағлари ҳисобидан ажратиладиган маблағлар тўғрисида туман ҳокимининг биринчи ўринбосари Рашид Салаевнинг ҳисоботи тингланди.

Келтириб ўтилганидек, эркин қолдиқ маблағлари ҳисобидан “Аёллар дафтари”  ва “Ёшлар дафтари” жамғармасининг ҳар бирига 22 млн. сўм, “Фуқаролар ташаббуси” жамғармасига 44 млн. сўм сарфланиши белгиланган. Депутатлар туман ҳокими ўринбосарининг таклифини атрофлича муҳокама қилиб, бир овоздан мақулладилар.

Сессия ишида маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича келиб тушаётган мурожаатларни таҳлил қилган ҳолда, ҳоким ёрдамчилари фаолиятининг натижадорлигини ўрганиш тўғрисида туман Халқ қабулхонаси бўлими мудири Эркин Ражабовнинг ахбороти тингланди.

 Кун тартибидаги масала юзасидан ахборотда ҳоким ёрдамчиларининг мурожаатлар билан ишлаш самарадорлиги бўйича маълумотлар берилди. Қайд қилинганидек, 2023 йил февраль ойида ҳоким ёрдамчилари томонидан 499 нафар шахснинг бандлиги таъминланган бўлиб, шундан 34 нафари доимий иш билан, 86 нафари ҳақ тўланадиган жамоат ишларига жалб этилган бўлса, 940 нафари ўзини-ўзи банд этган.

Сессия ишида “Ўзбекистон Республикаси   Президентининг “Бирламчи тиббий-санитария ёрдамини аҳолига якинлаштириш ва тиббий хизматлар самарадорлигини ошириш бўйича қўшимча чора-тадбирлар тўғрисида”ги қарори ижроси бўйича туман Тиббиёт бирлашмаси бошлиғи ўринбосари Ҳакимжон Собировнинг ҳисоботи тингланди.

Ҳисоботда келтириб ўтилганидек, 2022 йил давомида туманда 18-40 ёшдаги аҳоли сони 38 463 нафарни ташкил этди. Шундан тармоқ режа бўйича 37 477 нафар фуқаро профилактик тиббий кўрикдан ўтказилган. Ўтказилган тиббий кўрик натижасида 4081 нафар фуқарода касаллик аниқланган. Шуларнинг 406 нафари стационар шароитда 3675  нафари амбулатор шароитда соғломлаштирилган.

Сессия давомида Ўзбекистон Республикаси Президентининг “Деҳқон хўжаликлари ташкил этишни қўллаб-қувватлаш орқали аҳоли даромадларини ошириш бўйича қўшимча чора-тадбирлар тўғрисида”ги  қарори ижроси юзасидан туман Фермер, деҳқон хўжаликлари ва томорқа ер эгалари Кенгаши раиси Илҳом Палвонов ҳисобот берди.

Ҳисоботда деҳқон хўжаликларини ташкил этиш, чорвачилик, пахта-ғаллачиликни ривожлантириш мақсадида заҳира ер майдонларини очиқ электрон танловга қўйиш бўйича таклиф берилди. Таклиф депутатлар томонидан бир овоздан маъқулланди.

Сессия ишида “Ўзбекистон Республикасининг Референдуми тўғрисида”ги Ўзбекистон Республикасининг Қонунига мувофиқ, тумандаги 64 та референдум ўтказувчи участка комиссияси аъзолигига номзодлар рўйхатини тасдиқлаш масаласи ҳам кўриб чиқилди ва мазкур масала юзасидан Кенгаш қарори қабул қилинди.

Сессия ишида кун тартибига киритилган барча масалалар атрофлича кўриб чиқилиб, туман Кенгашининг тегишли қарорлари қабул қилинди. Шунинг билан сессия ўз ишини якунлади.

Туман ҳокимлигининг Ахборот хизмати.