АЁЛ БАХТИ

Инсоннинг келажагига илк қадам болалигиданоқ бошланади, дейишади. Чунки ўз ҳаёти давомида бирон касб-корни пухта эгаллаб, ана шу касб-кори туфайли умр саҳифаларини ўзгалар ҳавас қиларли даражада маъно-мазмун билан бойитиб яшаётган инсонларнинг аксарияти ўзи севган машғулотлари, орзу-ниятлари ҳақида сўз очганларида, албатта, болалик хотираларини тилга олишади.

Тумандаги 21-сонли БМСМнинг амалий санъат йўналиши тўгарак раҳбари Хонимжон Исмоилова амалий санъатнинг каштачилик, зардўзлик, гиламдўзлик, палос тўқиш сирларига ошно бўлганида ҳали жуда ёш, жамалак сочли қизалоқ эди. Бу ҳунарларга илк кўникмани онасидан олган Хонимжон ўз интилишлари, миллий ҳунармандчилик соҳасига бўлган қизиқишлари туфайли улғайган сари ушбу соҳага меҳр қўйиб, қўли гул зардўз, гиламдўз, каштачилик ва палос, кийим-кечаклар тўқиш, ҳатто уйларга ислимий нақшлар солиш, рассомлик бўйича  моҳир ҳунармандга айланди.

Мактабни тугатганидан сўнг, Беруний шаҳридаги техника лицейида тўқимачилик йўналишида таҳсил олиб, халқ ҳунармандчилигининг ноёб сирларини мукаммал ўрганди.

Хонимжон илк меҳнат фаолиятини Амударё агробизнес касб-ҳунар коллежида лаборант бўлиб ишлашдан бошлади. 2013 йилдан 21-сонли БМСМда амалий санъат йўналиши бўйича тўгарак раҳбари сифатида фаолиятини давом эттирди.

Мана 10 йилдирки, Х.Исмоилова ўқувчи-ёшларга каштачилик, зардўзлик, гиламдўзлик, палос ва кийим-кечаклар тўқиш, рассомлик, ислимий нақшлар солиш, ранг-баранг гуллар ясаш сирларидан сабоқ бериб келмоқда.

Мактабнинг амалий санъат йўналишида 10 нафар ўқувчи таълим-тарбия олишади. Уларнинг қизиқиш ва интилишларини қўллаб-қувватлаш, ўз иқтидорларини намоён этишлари учун имкониятлар яратиш эса ўқитувчининг тажриба ва маҳоратига боғлиқ.

У айни пайтда ўз соҳаси бўйича билим ва малакасини ошириш мақсадида Ажиниёз номидаги НДПИнинг тасвирий санъат факультетида таҳсил олмоқда. Бир вақтнинг ўзида “Гулруҳ” оилавий корхонасини бошқариш, ўқувчи-ёшларга тасвирий санъат йўналишида таълим бериш учун инсонга қанчалик куч, маънавий руҳ керак бўлишини ҳисобга олсак, Х.Исмоилованинг уддабурон, ўз олдига қўйган орзу-ниятлари йўлида тиниб-тинчимас, фидойи аёл эканлигини англаш қийин эмас.

ТТБнинг тез тиббий ёрдам бўлимида ҳайдовчи бўлиб ишловчи умр йўлдоши Фарҳод Исмоилов ва фарзандлари барча ишларида Хонимжонга яқин маслакдош ва кўмакдош. “Гулруҳ” оилавий корхонасида 5 нафар қипчоқлик ёшларнинг доимий иш билан бандлиги таъминланган.

Хонимжон эришган ютуқлари  ҳақида “мақтаниш бўлади”, деган маънода гапиришни истамайди. Лекин унинг шахсий ҳужжатлари тўпламида ўз фаолият йўналиши бўйича соҳа вазирликлари, туман ҳокимлиги томонидан тақдим этилган ташаккурномалар, Фахрий ёрлиқлар, қимматбаҳо совғалар бир талай.

Хонимжоннинг халққа  етказаётган манфаатидан эли, маҳалладошлари рози. Бир аёл учун бундан улуғроқ бахт бўлмаса керак. Хонимжон ана шундай бахт соҳибаси.

Робия ЙЎЛДОШЕВА.