Фаровон маҳалласида Наврўз сайли ўтказилди

Амударё туманининг барча овул ва маҳаллаларида “Ҳар кунинг Наврўз бўлсин, жонажон Ўзбекистоним!” деган бош ғоя асосида байрам тантаналари бўлиб ўтди. Умумхалқ сайиллари шаклида ўтказилган байрам тадбирлари амударёликларнинг кайфиятини кўтариш билан бирга, юртдошларимиз қалбида шукроналик, меҳр-оқибат, эзгулик, қадриятларимизга ҳурмат, она Ватанга муҳаббат туйғуларини янада мустаҳкамлашга хизмат қилди.

Фаровон маҳалласи аҳли ҳам Наврўз байрамини ўз маҳалласида кўтаринкилик, катта шодиёна билан нишонлади.

Кўкда қуёш чарақлайди, дарахтлар яшил тўн кийган. Она табиатнинг гўзал манзараси, Наврўзи олам тадбирлари барчага хуш кайфият улашди. Сумалак, кўк сомса, чучвара сингари баҳорий таомлар, миллий ва ҳунармандчилик маҳсулотлари кўргазмалари, театр жамоалари, турли ансамбллар, дорбозлар, аскиячилар, спортчилар, жажжи болажонларнинг чиқишлари байрам тантаналарига ўзгача файз киритди.

Наврўз сайлини маҳалла раиси Мадамин Казаков очиб берди. У ўз табрик нутқида она Ватанни севиш ва ардоқлаш, ҳаёт гултожи бўлмиш инсонни қадрлаш, Ватанга муҳаббат ва садоқат каби эзгу ғояларни ўзида мужассам этган Наврўз халқимизнинг энг қадимий байрами эканлигини, асрлар давомида эл-юртимизнинг олижаноб орзу-интилишларини ифода этиб келаётган Наврўз мустақиллик йилларида янгича маъно-мазмунга эга бўлиб, том маънода умумхалқ байрамига айлаганини, шунинг учун ҳам ушбу қутлуғ айёмни ҳар бир хонадон, ҳар бир оила катта орзу-ниятлар билан кутиб олишини таъкидлаб ўтди.

Маҳалланинг ёши улуғ отахон ва онахонлари, маҳалла тизими ходимларининг табрик сўзларидан кейин байрам дастури бошланди.

Маҳалланинг Кимёгарлар кўчасида бўлиб ўтган Наврўз сайли ҳақиқий байрамона сайлга айланди. Байрам тадбирлари доирасида ташкил этилган ҳунармандчилик маҳсулотлари, миллий либослар, шунингдек, миллий ва баҳорий таомлар кўргазмалари юртимиздаги тўкинлик, файзу бараканинг нишонаси бўлди. Маҳалланинг ёши улуғ онахонлари ва отахонлари, қиз-жувонлар, лапар, ёр-ёрлар айтишиб, рақсга тушдилар.

Наврўз шодиёналарида тинч ва фаровон ҳаётимиз, миллий қадрият ва анъаналаримиз тараннум этилди. Халқ ўйинлари, фольклор санъатининг энг яхши намуналари, шўх қўшиқ ва лапарлар баҳорни, Наврўзни соғинган дилларга хушнудлик бағишлади. Дошқозонларда сумалак тайёрланди. Наврўз сайлига ташриф буюрган фаровонликлар учун катта дастурхон ёзилиб, ош тортилди.

 Ўзбек, қорақалпоқ ва бошқа турли миллатларнинг миллий, баҳорий таомлари кўргазмалари, таниқли санъаткорлар, эстрада хонандалари ижросидаги куй-қўшиқлар иштирокчиларда унутилмас таассуротлар қолдирди.

Байрамда нуронийларга, кўп йиллардан буён оилалар мустаҳкамлигига ҳисса қўшиб келаётган маҳалла фидоийларига, жажжи болажонларга байрам совғалари улашилди.

Туман ҳокимлигининг Ахборот хизмати.