ДЎРМАН ОВУЛИДА “АССАЛОМ НАВРЎЗ!” ДЕБ НОМЛАНГАН НАВРЎЗ САЙЛИ ЎТКАЗИЛДИ

Ўлкамизда сўлим баҳор. Ҳаммаёқда гўзаллик, янгиланиш, яшариш. Ёшу-қари, барча-барчанинг қалбида шодлик, байрамона қувонч. Юртимизнинг ҳар бир гўшасида, ҳар бир овул ва маҳалла, хонадонларда Наврўз шукуҳи. Шундай шодиёна кунларда шўх куй ва қўшиқлар янада авжида.

Барча жойларда бўлгани каби Амударё туманининг чекка ҳудудларидан бўлган Дўрман овулидаги 20-сонли мактабда ҳам “Ассалом, Наврўз!” деб номланган катта байрам сайли ўтказилди. Сайилга мактаб ўқитувчи ва ўқувчилари, фахрийлар, овул аҳолиси ташриф буюришди.

Тадбирни мактаб директори Жаҳонгир Матназаров очиб берди ва дўрманликларни байрам билан муборакбод этди. У ўз сўзида Наврўз тарихи ҳақида гапириб, форс тожик тилидан олинган Наврўз сўзи янги кун, деган маънони англатишини, Ўрта Осиё ва Яқин шарқ халқларининг қадимий анъанавий янги йил байрами ҳисобланишини айтиб ўтди.

Таъкидланганидек, Наврўз жуда қадимдан нишонлана бошлаган. Наврўз баҳорги тун ва куннинг тенглигига, яъни 21-22 мартга тўгри келади. Шарқ халқларининг азалий ва миллий байрами бўлган Наврўз 4 минг йилик тарихга эга. Наврўзнинг келиб чиқиши ва шаклланишига оид қимматли манбалар Зардуштийлик муқаддас китоби ҳисобланган “Авeсто”, машҳур қомусий олим Абу Райҳон Беруний, Умар Хайём, Абдулқосим Фирдавсий, Насириддин Рабғузий, Юсуф Хос Ҳожиб, Алишер Навоий каби мутафаккирларимизнинг қимматли маълумотларда келтирилган. Наврўз – муҳаббат, дўстлик, поклик ва инсонпарварлик айёми сифатида улуғланади.

Дўрман овулида ўтказилган Наврўз тантанасида мактаб ўқувчилари томонидан тайёрланган мусиқий дастур намойиш этилди. Баҳорий либослар кийган қизлар ижросидаги рақслар, куй ва қўшиқлар байрамга файз киритди. Дастур давомида даврага Наврўзойнинг кириб келгани томошабинларни янада қувончга тўлдирди. У ҳар баҳорда Наврўз тантана қилишини айтиб, яшнаш, яшариш байрами табиатнинг уйғониши билан боғлиқ ушбу янги куннинг бошланиши билан барчани муборакбод этди. Шу билан бирга баҳордаги бу анъана халқимизни ҳеч қачон тарк этмаганини, аксинча Наврўз сайли йил сайин такомиллашиб, сайқалланиб, бойиб борганини эътироф этди.

Навбат адрас-у атласлар макони Марғилон жойлашган водийга хос миллий оҳанглар, куй ва қўшиқларга берилганида томошабинларнинг ҳам завқи ошди, сайилга келганлар даврани тўлдириб, рақсга тушишди. Бу ҳаммага янада кўтаринки ва байрамона руҳ бахш этди.

Байрам тадбири давомида халқимизда келаётган қадимий удумлар ҳам кўрсатиб берилди. Бешик билан боғлиқ бўлган халқимиз анъаналари, бешик тўйи, чақалоқни бешикка белаш маросими намойиш қилинди. Келинчакларнинг ял-ял ёниб турган либослари, бувижонлар кийган қадимий кийимлар, қизларга ярашган қирқ кокиллар бу қадимий байрам кўркига кўрк қўшди. Янграган аллалар, лапарлар ва ёр-ёрлар, йигит-қизлар айтишувлари миллатимиз навқиронлигини ўзида акс эттирди.

Сайилга келганларга байрамона безатилган дастурхонлардаги миллий таомлардан, Наврўзнинг шоҳ таоми – сумалаклар улашилди. Овул аҳли бирдамлик, ҳамжиҳатликда ва кўтаринки руҳда қадимий байрамни нишонлади. Дўрмандаги ушбу сайилда бутун эл баҳор ташрифини, Наврўз шукуҳини бирдек ҳис қилди.

О.Худойберганова.