ФУҚАРО МУҲОФАЗАСИ КУНИ МУНОСАБАТИ БИЛАН АМАЛИЙ МАХСУС-ТАКТИК ЎҚУВ МАШҚИ ТАШКИЛ ЭТИЛДИ

Амударё тумани ҳудудида 1 март кунидан 1 апрелга қадар “Фавқулодда вазиятлардан муҳофаза қилиш ва фуқаро муҳофазаси ойлиги” деб эълон қилинган бўлиб, ойлик доирасидаги тадбирлар давом этмоқда. Ойлик доирасида жойларда амалий махсус-тактик ўқув машқи ва тарғибот тадбирлари ўтказилмоқда.

Жорий йилнинг 11 март куни тумандаги 1-сонли мактабда “Фуқаро муҳофазаси куни” мавзусида бўлиб ўтган амалий махсус-тактик ўқув машқида туман Фавқулодда вазиятлар бўлими ходимлари Бекзод Тажибоев, Бекзод Аллабергенов ҳамда Санитария эпидемиология осойишталик ва жамоатчилик саломатлиги бўлими санитария шифокори Мунаввар Кошкаровалар қатнашишди. Шунингдек, мактаб директори Дилрабо Шербоева, Чақириққа қадар бошланғич тайёргарлик раҳбари Хуршид Ишниязов ва мактаб ўқувчилари иштирок этишди.

Туман фуқаро муҳофазаси хизматларининг ҳамкорликдаги ҳаракатларини такомиллаштириш, уларнинг кечиктириб бўлмайдиган авария ва қутқарув ишларига тайёргарлигини кучайтириш ҳамда фавқулодда вазиятлар юзага келганда ўз мажбуриятларини аниқ, тўғри бажаришини амалиётда синаш ва ўрганиш каби мақсадлар кўзланган ушбу махсус-тактик ўқув-машқи икки босқичда ўтказилди.

Ўқув машқининг биринчи босқичи, яъни назарий қисмида 1-сонли мактабда “Мактабда юзага келиши мумкин бўлган фавқулодда вазиятларда фуқаро муҳофазаси гуруҳлари ва мактаб раҳбариятининг ҳаракатлари” мавзусида тушунчалар берилди. Ўқувчиларга табиий ва техноген тусдаги фавқулодда вазиятлар юзага келганда эвакуация чиқиш йўлларида тўғри ҳаракат қилиш кўрсатиб берилиб, кўникмалар шакллантирилди. Шундан сўнг, улар гуруҳларга бўлинган ҳолда мактаб ҳовлисига олиб чиқилди.

Иккинчи босқичда эса мактаб биносида фавқулодда авария ҳолати содир бўлиши натижасида мактаб фуқаро муҳофазаси гуруҳлари, туман Ёнғин-қутқарув қисмларининг ҳамда тез тиббий ёрдамнинг жабрланганларни қутқариш ва уларга биринчи тиббий ёрдам кўрсатиш кабиларни бажариш ишлари амалда кўрсатиб берилди. Жабрланган фуқароларга тезда биринчи ёрдам кўрсатиш тартиби амалий бажариб кўрсатилди.

Ўқув машқига мактаб раҳбарлар таркиби ва фуқаро муҳофазаси тузилмасидан 32 нафар ўқувчи, туман Фавқулодда вазиятлар бўлимидан 7 нафар ходим ва 1 та махсус техника, Тез тиббий ёрдам бўлимидан 3 нафар ходим ва 1 та махсус техника жалб этилди. Тадбир якунида 1-сонли мактабнинг раҳбарлар таркиби ва фуқаро муҳофазаси тузилмалари гуруҳлари шахсий таркиби фавқулодда вазиятларда ҳаракат қилишга «Чекланган тайёр» деб баҳоланди. Шунингдек, иштирокчиларнинг камчиликлари кўрсатилиб, келгусида бундай камчиликларга йўл қўймаслик кераклиги тушунтирилди.

Шу куни туман Фавқулодда вазиятлар бўлими ходимлари “Фавқулодда вазиятларнинг олдини олиш ва фуқаро муҳофазаси” ойлиги доирасида Навоий номли маҳалладаги янги туғруқ комплекси биносида қурилиш ишларини олиб бораётган “Темир Бетон” масъулияти чекланган жамияти ишчиларига тушунтириш-тарғибот ишларини ўтказишди.

Ушбу янги туғруқ комплекси биносининг қурилиш лойиҳаси “Пайтахт мега проект” масъулияти чекланган жамияти томонидан ишлаб чиқилган. Лойиҳада ёнғиндан ва тутундан хабар берувчи сигнализацияларни ўрнатиш кўрсатилган. Ҳозирги кунда битиш арафасида турган ушбу бинода ёнғинга қарши сув таъминоти, яъни 50 метр кубли 2 та усти ёпиқ сув сақлагичлар қуриб битказилган. Фасад қисмига ёнмайдиган маҳсулотлар билан ишлов берилган.

Бино 4 қаватли бўлиб, унда 1 дона иситиш қозонхонаси, 3 та зинапоя мавжуд. Лойиҳада 1 дона лифт ҳам кўрсатилган бўлиб, бинонинг умумий майдони 1217,3 метр квадратга тенг. Ҳозирги кунда қурилиш ишлари қизғин паллада давом этмоқда.

Тарғибот тадбири давомида ушбу қурилиш ишларида қатнашаётган ишчи-ходимларга техника хавфсизлиги, фуқаро муҳофазаси бўйича тушунчалар берилиб, эслатмалар ҳам тарқатилди.

С.Бедекеев, туман ФВБ бошлиғи ўринбосари.