ЭЛ МЕҲРИНИ ҚОЗОНГАН АЁЛ

Олимлар аёлларнинг юраги эркакларникига қараганда тез уришини аниқлашибди. Қизиқ, эҳтимол бу аёл зотининг оила, рўзғор, фарзанд ташвишларига фидойилиги, куюнчаклигидандир? Чор-атрофимизга нафар солсак, булардан ҳам ортиб муаллима, шифокор, давлат  ва жамоат ишларида ҳам намуна бўлиб фаолият юритаётган аёллар кўплигини кўрамиз. Ҳа, аёл оиланинггина эмас, жамиятнинг ҳам гултожи. Аёл нафақат умр йўлдоши ва оиласига, балки касбига ҳам садоқатли, фидойи.

Т

ошёп овул фуқаролар йиғини раиси Гулшод Собирова ана шундайлар сирасидан. У мактабни тугатганидан сўнг, НДПИнинг бадиий графика факультетида ўқиб, чизмачилик ва тасвирий санъат ўқитувчиси мутахассислигига  эга бўлди. Меҳнат   фаолиятини 1990 йилда Манғит шаҳар Кенгаши мутахассиси бўлиб ишлашдан бошлади, 1993-2016 йилларда 40-сонли мактабда ўқитувчилик қилди. 2016 йилда эса Тошёп овул фуқаролар йиғинининг диний маърифат, маънавий-ахлоқий тарбия масалалари бўйича маслаҳатчиси лавозимида ишлай бошлади. 2019 йил 14 май куни ўтказилган овул фуқаролар йиғини раиси сайловида эса тошёпликларнинг энг кўп овозига эга бўлиб, йиғин раиси бўлиб сайланди.

Бу унинг эл ишончини қозона олгани, уларнинг қувонч-у ташвишларига елка тутиб, шу эл ободлиги, тинчлиги учун вақт билан ҳисоблашмай қилган меҳнатлари самараси эди.

Масъулиятли вазифани сидқидилдан адо этаётгани боис, иккинчи муддатга ҳам сайланди. Бу ишончни у энг олий мукофот деб билади, шунга яраша ишлашга интилади.

Бугунги кунда овулда 596 та хонадонда  701 та оила истиқомат қилади. 68 та кўчада ўзбек, қорақалпоқ, қозоқ, қирғиз, рус ва бошқа миллатларга мансуб 3505 нафар аҳоли ҳамжиҳатликда яшайди. Уларнинг 227 нафари турли корхона-ташкилотларда ишлайди, 22 нафари тадбиркорлик, 5 нафари савдо-сотиқ билан, 12 нафари касаначилик, 12 нафари миллий ҳунармандчилик, 422 нафари чорвачилик, паррандачилик, 320 нафари  мавсумий ишлар билан банд.

ОФЙ раисининг асосий иш вақти эл оралаб юриб, одамларнинг аҳволи билан танишиш, турмушидаги муаммоларига тезкор ечим топиш, ишсиз, ишга лаёқатли фуқароларни тадбиркорликка жалб қилиш, ўз-ўзини банд қилиб, оиласида даромад манбалари яратишга жалб қилиш билан ўтади. Шунингдек, овулдаги 47 нафар ногиронлиги бўлган, боқувчисини йўқотган оилалардан ҳам хабар олиш, қўллаб-қувватлаш унинг эътиборидан четда қолмайди. Овулдаги хотин-қизлар фаоли, ёшлар етакчиси, профилактика инспектори ва овулнинг нуроний кексалари кўмагида оилаларда маънавий муҳитни яхшилаш, фаровон яшашга интилишни кенг тарғиб этгани сабабли 2022 йилда оилавий ажрим қайд этилмади, профилактик ҳисобда турувчилар йўқ, 8 та ўзаро келишмовчиликка борган оилалар яраштирилди.

Овулда деярли барча хонадонларда томорқа ер, 383 та хонадонда қўшимча томорқа ер, 11 хонадон томорқасида иссиқхона мавжудлиги ва улардан самарали фойдаланилаётганлиги оилалар иқтисоди яна ҳам юксалишига замин бўлаётир.

Овулнинг меҳнаткаш, меҳр-оқибатли халқи жорий йил баҳорини ҳам эзгу ниятлар билан қарши олиб, кўкламги ишларни бошлаб юборишди. Дониёр Холманов турмуш ўртоғи Малоҳат Қурбонбоева билан биргаликда ўзлари бунёд этган мўъжазгина иссиқхонасида гул етиштиришни йўлга қўйишди ва оиласида даромад манбасини яратишди. “Аёллар дафтари”га киритилган Шаҳодат Юсуповага тадбиркорлик  фаолиятини бошлаши учун кредит олишга кўмак берилди ва у тикув машинаси  олиб, оиласи бағрида даромад топаяпти.

Аҳоли фаровонлигини таъминлашда уларнинг бандлигини таъминлаш муҳим ўрин тутади. Шу боисданда Г.Собированинг кундалик режасида ишсиз фуқароларни аниқлаш, бандлигини таъминлашга ҳаракат қилиш муҳим ўрин тутади. Овул аҳолиси эса кичкина жуссасида ҳам бир олам ғайрат-шижоат, интилиш мужассам, ғамхўр раис аёлнинг  фаолиятидан мамнун. ОФЙ раиси уларнинг бирига қиз, бирига опа, бирига сингилдай азиз. Зеро, ҳалол меҳнат келтирган бундай шараф улкан бахтдир. Гулшод Собирова эса эл меҳри сабабли ўзини чинакам бахтиёр санайди.

Ойгул РАЖАБОВА.