НУРОНИЙ ОНАХОНЛАР ХИВАГА САЁҲАТ ҚИЛИШДИ
Миллатнинг ўзига хос маънавиятини юксалтиришда аёлнинг ўрни ва таъсири алоҳидадир. Чунки инсоннинг илк ҳаётий тушунча ва тасаввурлари она тарбияси билан шаклланади. Беғубор гўдакни юқ ювиб, оқ тараб парваришлаб вояга етказгунича аёл қанча-қанча кун-тунларни беором ўтказмайди дейсиз? Оппоқ-ойдин орзуларига қоришган, меҳридан яралган аллалар ижодкори ҳам, ижрочиси ҳам аёл. Бир қўлида рўзғор, бир қўлида дунё ташвишларини кўтаргувчи, қайноқ меҳнати ила жамиятга наф келтирувчи ҳам аёлдир. Оила тинч-осойишталиги ва демакки, жамият тинч-осойишталиги учун фидойилик ҳам аёл фитратига хос.
Юртимизда мукаррама, муҳтарама ва улуғ зот - оналарга, аёл-қизларга юксак ҳурмат-эҳтиром кўрсатилиши олий қадриятларимиздандир.
Яқинда 8 март – Халқаро хотин-қизлар куни муносабати билан туман Маҳалла ва нуронийларни қўллаб-қувватлаш бўлими масъуллари саъй-ҳаракатлари билан туманимизда узоқ йиллар турли соҳаларда меҳнат қилиб, барчага ўрнак бўлган бир гуруҳ фидойи онахонларига юксак эҳтиром кўрсатилди. Кўнгилларда жўшқинлик, яшашга иштиёқ уйғотувчи фасли баҳорнинг илк кунида 50 нафар онахонлар қадимий ва ҳамиша навқирон Хива шаҳрига саёҳатга олиб борилди. Қулай ва юмшоқ ўриндиқли автобус харажати “Нуроний” жамғармаси Қорақалпоғистон бўлими томонидан тўланди. Кўпчилиги оиласи бағрида кексалик гаштини суриб яшаётган нуроний онахонлар, қарилик пенсиясига чиқиб ҳам фаолиятини давом эттираётган аёлларни ташкилотчилар келишувига мувофиқ малакали ва билимдон ГИД Сабоҳат Саъудаллева илиқ кутиб олди ва шаҳарнинг қадимий обидалари, ушбу обидаларни бунёд этган тарихий шахслар хусусида қизиқарли баён қилиб берди.
Саёҳатчиларга бепул тушлик ҳам ташкил этилди.
- Оналарини улуғлайдиган юртимдан ўргилай, - дейди саёҳатчилардан бири, ҳожи она Ўғилжон Ўрозова. – Оёғимизни ерга босмай юз чақиримча йўл босиб, шу муқаддас қадамжоларга олиб келишганини айтинг!
- Хивага олдин неча марта келган бўлсам ҳам, бугунгидай чуқур таассурот олмагандим. Саёҳат учун ГИД хизмати шу қадар муҳим эканлигини энди билдим, - дейди узоқ йиллар иқтисодчи бўлиб ишлаган Гулчеҳра опа Йўлдошева.
Саёҳат ҳаммада ҳам улкан таассуротлар қолдирди, туманимизнинг турли жабҳаларида меҳнат қилиб, нуроний ёшга етган 50 нафар онахонлар ҳам саёҳатдан, ҳам бир кунлик дийдорлашувдан хурсанд, туман Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев, ўринбосари Баҳодир Болтабоевлардан миннатдор бўлдилар.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
