ИШЧИ ГУРУҲ “ЯШИЛ МАКОН” УМУММИЛЛИЙ ЛОЙИҲАСИ ДОИРАСИДА АМАЛГА ОШИРИЛАЁТГАН ИШЛАР БИЛАН ТАНИШДИ

2021 йилнинг 2 ноябрь куни давлатимиз раҳбари томонидан ўтказилган видеоселектор йиғилишида “Яшил макон” умуммиллий лойиҳасини амалга ошириш, мазкур лойиҳа доирасида мамлакат бўйича йилига 200 миллион туп дарахтлар ва буталар кўчатларини экиш белгиланган эди. Лойиҳадан кўзланган мақсад республика ҳудудида яшил майдонлар ҳудудини кўпайтиришдир. Лойиҳани амалга ошириш бўйича қабул қилинган “Республикада кўкаламзорлаштириш ишларини жонлантириш, дарахтлар муҳозафасини янада самарали ташкил этиш чора-тадбирлари тўғрисида”ги Президент Фармони эса дарахтларни экиш ва парвариш қилиш соҳасидаги, ҳудудларнинг тупроқ-иқлим ва бошқа хусусиятларини аниқлашга қаратилган тадқиқот ва таҳлилларни ўтказиш шу асосда экиладиган кўчатларни танлаш, кўчатхоналарни кўпайтириш соҳасидаги вазифалар белгилаб берилган.

Амударё туманида ҳам лойиҳа доирасида ҳудудимиз иқлим шароитига мос мевали ва манзарали дарахтлар кўчатлари, гул ва буталар кўчатлари экиш, парваришлар борасида муайян ишлар амалга оширилмоқда.

Халқ депутатлари туман Кенгашининг тегишли қарорига асосан 2022 йил куз мавсумида лойиҳа доирасидаги кўчат экиш ишларига жами 500 миллион сўм пул маблағи ажратилган. Туман Ободонлаштириш бошқармаси томонидан 320 миллион, туман Халқ таълими бўлимига қарашли муассасалар томонидан 100 миллион, туман Мактабгача бўлим томонидан 80 миллион сўмлик кўчатлар экилган.

Шунингдек, жорий йилнинг баҳорида туманимиз ҳудудига 770 минг дона мевали ва манзарали дарахтлар, буталар, гуллар кўчатларини экиш режаштирилган. Шунинг 8 минг тупи умумфойдаланишдаги йўллар бўйларига, 48 минг тупи қишлоқ хўжалиги ерларида иҳота дарахтзорлар барпо этиладиган ерларга, 210 минг тупи фермер хўжаликларининг экин майдонлари четларига, қолганлари таълим, соғлиқни сақлаш ва бошқада муассасалар, идоралар атрофларига экилиши белгиланган.

Бу борадаги ишларнинг бориши билан танишиш мақсадида Қорақалпоғистон Республикаси Жўқорғи Кенгесида тузилган ишчи гуруҳ туманимизга ташриф буюрди.

Ишчи гуруҳ аъзолари дастлаб тумандаги умумфойдаланишдаги йўллар четларига, корхона-ташкилотлар ҳудудларига экилган мевали, манзарали дарахтларнинг ўсиши, муҳофаза қилиниши, суғориш тизимларининг йўлга қўйилиши аҳволи билан танишдилар.

Кейинги манзил Қипчоқ давлат ўрмон хўжалигида бунёд этилаётган яшил майдонлар бўлди. Ишчи гуруҳ аъзолари хўжаликда ўтган йилларда экилган дарахтлар кўчатларининг ҳолати билан танишдилар. Кейин хўжалик кўчатхонасида кўчат етиштириш ишларининг бориши билан қизиқдилар.

Эътироф этиш жоизки, мазкур хўжаликда туманимизда яшил майдонларни кўпайтириш учун очиқ ва иссиқхона шароитида кўчат етиштириш йўлга қўйилган. Жийда, тут, терак, қайроғоч, арча ва бошқада кўпгина дарахтларнинг ҳамда кўпйиллик гулларнинг кўчатлари мазкур хўжалик кўчатхоналарида етиштирилаяпти.

Ҳозирги кунда туманимиз ҳудудида иқлим шароитимизга мос виргин арчаси, шарқ туяси, япон сафораси, катальпа, шумтол, жийда, тут, заранг, акация, терак, ёнғоқ, узум қаламчаларини экиш ишлари бошланиб кетди.

Ишчи гуруҳ аъзолари туманимизда “Яшил макон” умуммиллий лойиҳаси доирасида амалга оширилаётган ишларга юқори баҳо бердилар.

Ойгул РАЖАБОВА.