ЯНГИ КИТОБЛАРНИ ЎҚИНГ

Туманимизда фаолият юритаётган “Жайҳун илҳомлари” нодавлат нотижорат ташкилоти томонидан ёшларнинг маънавиятини юксалтириш, иқтидорли ёшларнинг ижодий ишларини оммага таништириш, уларни турли зарарли иллатлардан ишончли ҳимоя қилишда кенг кўламли ишлар олиб борилмоқда.

Турли лойиҳалар доирасида  болалар ва ёшлар маънавиятини юксалтириш, дунёқарашини кенгайтиришга кўмаклашиш мақсадида ташкилотимиз қошида 10 минг дона китоб жамғармасига эга кутубхона ташкил этилди.

Ҳозирги кунда кутубхонамизнинг аъзолари бўлган мактаб ўқувчилари, ёшлар, катта ёшдаги фуқаролар кутубхонамиздан турли жанрлардаги китобларни олиб ўқиб, улкан ҳаёт сирларидан баҳраманд бўлмоқдалар.

Кутубхонанинг китоб жамғармасини кенгайтириш ҳам муваффақиятли амалга ошириб келинмоқда. Бу ишларда  “Тараққиёт кўзгуси” газетаси таҳририяти ҳомийлик қилмоқда.

Яқинда кутубхонамизга 253 дона янги бадиий китоблар олиб келинди. Олиб келинган чет эл муаллифлари қаламига мансуб адабиётлар, ўзбек адабиётининг дарғалари томонидан битилган назм ва шеърият дурдоналари, мумтоз адабиёт намуналари, детектив қиссалар ҳеч бир китобхонни бефарқ қолдирмайди, албатта.

Мамлакатимиздаги таниқли ноширларнинг беминнат хизматлари туфайли туманимиз китобхонларига яхши таниш бўлган машҳур чет эл ёзувчиларидан Ги Де Мопассан, Артур Конан Дойл, Жеймс Хедли Чейз, Дейл Карнеги, Эрнест Хемингуэй, ўзбек адабиёти намоёндаларидан Алишер Навоий, Абдулла Қодирий, Ойбек, Одил Ёқубов, Асқад Мухтор, Пиримқул Қодиров асарлари кутубхонамизнинг китоблар жавонидан ўрин олди.

Ҳалима Худойбердиеванинг 4 жилдлик сайланма тўплами  шеърият ихлосмандлари учун улкан совға бўлди.

Бундан ташқари, Сирожиддин Саййид, Эшқобил Шукур, Бобур Бобомурод ва бошқа шоирларнинг янги шеърий тўпламлари ҳам китобхонларимизни бефарқ қолдирмайди, деб ишонамиз.

Кутубхонамизнинг мумтоз адабиётлар жавони ҳам янги, камёб адабиётлар билан бойиди.

Шунингдек, “Уруш кўрган ёзувчилар” туркумидан Қўчқор Норқобилнинг “Бу ерларда ҳаёт бошқача”, “Дарё ортидаги йиғи” асарлари ҳар бир ўқувчини ўзига тортади. Бу китобларда Афғонистон тупроғида бўлиб ўтган урушларда юртдошларимизнинг  бошидан кечирган жанговар ҳаёт йўли ишончли тарзда ҳикоя қилинган.

Айнан шу мавзудаги “Афғон шамоли” деб номланган 12 та тўплам ҳам бири-биридан қизиқарли воқеаларга бой.

Қизиқарли китобларни олиб ўқишга қизиқсангиз, кутубхонамизга келинг.

Маънавият дурдоналари бўлган адабиётлар билан танишиб, баҳра олинг.

Ўрозали РЕЙИМОВ,

“Жайхун илҳомлари” ННТ раиси.