АМУДАРЁ ТУМАН ИИБДА ҲИСОБОТ ЙИҒИЛИШИ БЎЛИБ ЎТДИ

Ҳар йилги анъанага кўра, жорий йилнинг 24 январь санасида Амударё туман Ички ишлар бўлимида ўтган 2022 йилда Ички ишлар бўлими ходимлари томонидан амалга оширилган ишларга бағишланган ҳисобот йиғилиши бўлиб ўтди.

Йиғилишда Қорақалпоғистон Республикаси Ички ишлар вазирининг ўринбосари Ғуломжон Эшимбетов, Амударё туман Ички ишлар бўлими бошлиғининг биринчи ўринбосари Раҳим Жумабоев, Ички ишлар бўлими ходимлари, жойларга биркитилган профилактика инспекторлари ва оммавий ахборот воситалари вакиллари иштирок этдилар.

Ҳисобот йиғилиши аввалида Ўзбекистон Республикаси Президентининг 2023 йил 20 январдаги “Ички ишлар органларини халқчил профессионал тузилмага айлантириш ва аҳоли билан янада яқин ҳамкорликда ишлашга йўналтириш бўйича қўшимча чора-тадбирлар тўғрисида”ги Қарори мазмун-моҳиятини шахсий таркибга тушунтириш мақсадида Қорақалпоғистон Республикаси Ички ишлар вазирининг ўринбосари Ғуломжон Эшимбетовнинг маърузаси тингланди.

Ғуломжон Эшимбетов ўз маърузасида Президентимизнинг мазкур Қарорини ҳаётга изчил татбиқ этиш ва ундан кутиладиган натижалар хусусида батафсил сўз юритди. Ички ишлар органларининг халққа яқинлигини таъминлашда аҳоли билан доимий ҳамкорликда иш олиб бориш, ИИБ ходимлари билан халқ дипломатияси орқали юз бериши мумкин бўлган жиноятларнинг, ҳуқуқбузарликларнинг олдини олиш бўйича қимматли фикрларини баён этди.

Шунингдек, ушбу Қарор билан тасдиқланган тўртта иловада белгиланган кенг кўламли вазифаларга тўхталиб, ИИБ ходими учун ўта муҳим ҳисобланган биринчи иловадаги асосий талаблар, ички ишлар органлари ходимларининг касбий маданияти, хизмат интизоми бўйича Кодекси ҳам тасдиқлангани тўғрисида зарур тушунчалар ва маълумотлар берди.

Шундан сўнг, ҳисобот йиғилиши кун тартибидаги асосий масала – “2022 йил давомида Амударё туман Ички ишлар бўлими томонидан жиноятчиликнинг олдини олиш, ҳуқуқбузарликлар профилактикасини ташкил қилиш борасида амалга оширилган ишлар ва йўл қўйилган камчиликлар” юзасидан Амударё тумани Ички ишлар бўлими бошлиғининг биринчи ўринбосари Раҳим Жумабоев ҳисобот маърузаси қилди.

Ҳисобот маърузасида таъкидланганидек, ўтган 2022 йил давомида ИИБнинг соҳавий хизматлари бўйича ўз фаолиятларида хато ва камчиликларга йўл қўйган ходимлари кескин танқид қилиниб, уларнинг ўз хизмат вазифаларини бажаришда замон талабларидан келиб чиқиб, ўзгаришларга эришишлари учун зарур таклиф ва тавсиялар берилди. Хусусан, юқоридаги Президент Қарорида қайд этилганидек, ички ишлар органларини халқчил профессионал тузилмага айлантириш ва халқ билан доимий ҳамкорликда ишлашга йўналтириш юзасидан масалаҳат ва йўл-йўриқлар берилди.

Йиғилиш давомида хизмат вазифаларини сидқидилдан адо этиб, ўз фаолиятларида ижобий натижаларга эришаётган, айниқса, ҳудудларга биркитилган профилактика инспекторларининг саъй-ҳаракатлари билан жиноятчиликнинг, ҳуқуқбузарлик ҳолатларининг олди олиниб, аҳоли билан ҳамкорликни яхши йўлга қўйиш орқали муваффақиятларни қўлга киритаётган ходимларга миннатдорчилик билдирилиб, маънавий рағбатлантирилдилар.

Шунингдек, ҳисобот йиғилишида Амударё туман Ички ишлар бўлими томонидан 2023 йилда амалга оширилиши белгиланган ишлар, профилактик тадбирлар, жиноятчилик ва ҳуқуқбузарлик ҳолатларининг олдини олишга қаратилган режа ҳам тасдиқлаб олинди.

Робия ЙЎЛДОШЕВА.