AMUDARYo TUMAN IIBDA HISOBOT YIGʻILIShI BOʻLIB OʻTDI

Har yilgi anʼanaga koʻra, joriy yilning 24-yanvar sanasida Amudaryo tuman Ichki ishlar boʻlimida oʻtgan 2022-yilda Ichki ishlar boʻlimi xodimlari tomonidan amalga oshirilgan ishlarga bagʻishlangan hisobot yigʻilishi boʻlib oʻtdi.

Yigʻilishda Qoraqalpogʻiston Respublikasi Ichki ishlar vazirining oʻrinbosari Gʻulomjon Eshimbetov, Amudaryo tuman Ichki ishlar boʻlimi boshligʻining birinchi oʻrinbosari Rahim Jumaboyev, Ichki ishlar boʻlimi xodimlari, joylarga birkitilgan profilaktika inspektorlari va ommaviy axborot vositalari vakillari ishtirok etdilar.

Hisobot yigʻilishi avvalida Oʻzbekiston Respublikasi Prezidentining 2023-yil 20-yanvardagi “Ichki ishlar organlarini xalqchil professional tuzilmaga aylantirish va aholi bilan yanada yaqin hamkorlikda ishlashga yoʻnaltirish boʻyicha qoʻshimcha chora-tadbirlar toʻgʻrisida”gi Qarori mazmun-mohiyatini shaxsiy tarkibga tushuntirish maqsadida Qoraqalpogʻiston Respublikasi Ichki ishlar vazirining oʻrinbosari Gʻulomjon Eshimbetovning maʼruzasi tinglandi.

Gʻulomjon Eshimbetov oʻz maʼruzasida Prezidentimizning mazkur Qarorini hayotga izchil tatbiq etish va undan kutiladigan natijalar xususida batafsil soʻz yuritdi. Ichki ishlar organlarining xalqqa yaqinligini taʼminlashda aholi bilan doimiy hamkorlikda ish olib borish, IIB xodimlari bilan xalq diplomatiyasi orqali yuz berishi mumkin boʻlgan jinoyatlarning, huquqbuzarliklarning oldini olish boʻyicha qimmatli fikrlarini bayon etdi.

Shuningdek, ushbu Qaror bilan tasdiqlangan toʻrtta ilovada belgilangan keng koʻlamli vazifalarga toʻxtalib, IIB xodimi uchun oʻta muhim hisoblangan birinchi ilovadagi asosiy talablar, ichki ishlar organlari xodimlarining kasbiy madaniyati, xizmat intizomi boʻyicha Kodeksi ham tasdiqlangani toʻgʻrisida zarur tushunchalar va maʼlumotlar berdi.

Shundan soʻng, hisobot yigʻilishi kun tartibidagi asosiy masala – “2022-yil davomida Amudaryo tuman Ichki ishlar boʻlimi tomonidan jinoyatchilikning oldini olish, huquqbuzarliklar profilaktikasini tashkil qilish borasida amalga oshirilgan ishlar va yoʻl qoʻyilgan kamchiliklar” yuzasidan Amudaryo tumani Ichki ishlar boʻlimi boshligʻining birinchi oʻrinbosari Rahim Jumaboyev hisobot maʼruzasi qildi.

Hisobot maʼruzasida taʼkidlanganidek, oʻtgan 2022-yil davomida IIBning sohaviy xizmatlari boʻyicha oʻz faoliyatlarida xato va kamchiliklarga yoʻl qoʻygan xodimlari keskin tanqid qilinib, ularning oʻz xizmat vazifalarini bajarishda zamon talablaridan kelib chiqib, oʻzgarishlarga erishishlari uchun zarur taklif va tavsiyalar berildi. Xususan, yuqoridagi Prezident Qarorida qayd etilganidek, ichki ishlar organlarini xalqchil professional tuzilmaga aylantirish va xalq bilan doimiy hamkorlikda ishlashga yoʻnaltirish yuzasidan masalahat va yoʻl-yoʻriqlar berildi.

Yigʻilish davomida xizmat vazifalarini sidqidildan ado etib, oʻz faoliyatlarida ijobiy natijalarga erishayotgan, ayniqsa, hududlarga birkitilgan profilaktika inspektorlarining saʼy-harakatlari bilan jinoyatchilikning, huquqbuzarlik holatlarining oldi olinib, aholi bilan hamkorlikni yaxshi yoʻlga qoʻyish orqali muvaffaqiyatlarni qoʻlga kiritayotgan xodimlarga minnatdorchilik bildirilib, maʼnaviy ragʻbatlantirildilar.

Shuningdek, hisobot yigʻilishida Amudaryo tuman Ichki ishlar boʻlimi tomonidan 2023-yilda amalga oshirilishi belgilangan ishlar, profilaktik tadbirlar, jinoyatchilik va huquqbuzarlik holatlarining oldini olishga qaratilgan reja ham tasdiqlab olindi.

Robiya YOʻLDOShEVA.