“Маҳалла” хайрия жамоат фонди туман бўлинмасининг грант лойиҳаси доирасида тадбирлар ўтказилмоқда

“Маҳалла” хайрия  жамоат фонди туман бўлинмасининг Қорақалпоғистон Республикаси Жўқорғи Кенгеси ҳузуридаги ННТлар ва фуқаролик жамиятининг бошқа институтларини қўллаб-қувватлаш жамоат фонди томонидан “Маҳаллаларда ободликни таъминлаш, аҳоли ўртасида соғлом турмуш тарзини тарғиб қилиш, аҳолининг тиббий ва экологик маданиятини ошириш” мавзусида эълон қилинган танловда “Обод маҳалла” номли лойиҳаси ғолиб бўлган эди.

Лойиҳага кўра, тегишли ташкилотлар билан ҳамкорликда жамоатчилик экологик назоратини амалга ошириш, аҳолининг экологияга оид билимларини кенгайтириш мақсадида учрашувлар, давра суҳбатлари, танловлар ташкил қилиш, ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшиш ишлари олиб борилмоқда.

Ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини ошириш мақсадида “Тараққиёт кўзгуси” газетаси билан ҳамкорликда умумтаълим мактаблари ўқувчилари ўртасида иншолар танловлари ҳам ўтказилиб борилмоқда.

Лойиҳа иш режаси асосида “Яшил табиатни асраш – ўз қўлимизда”, “Табиат ва биз”, “Кўчат экиш – эзгу анъана”, “Мен эккан ниҳол”, “Маҳаллам шамоли”, “Ҳашар – элга ярашар”, “Мустақил юртимнинг обод маҳалласи”, “Табиат – бизнинг онамиз” мавзуларида иншолар танловлари ўтказилиб, бу танловларда мактаб ўқувчиларининг она табиат ва экология борасидаги билимлари оширилмоқда.

Қипчоқ ҳудудидаги мактаб ўқувчилари ўртасида ўтказилган “Яшил табиатни асраш – ўз қўлимизда” мавзусидаги иншолар танлови ҳам мактаб ўқувчиларининг она табиат, экология ҳақидаги билимлари,  тафаккури юқори даражада эканлигини намоён қилди. Мактаб  ўқувчилари ўз иншоларида табиат ва уни авайлаб-асраш, бу борадаги давлатимиз томонидан қабул қилинаётган янги қарорлар, амалга оширилаётган кенг кўламли ишлар фикрлар билдиришган.

Қипчоқ овулидаги 18-сонли мактаб биносида ўтказилган мазкур иншолар танловида ҳудуддаги 7 та умумтаълим мактабларидан 24 нафар ўқувчи иштирок этди.

Табиат билимдонлари томонидан ёзилган иншолар бири-биридан нафис, тўкис бўлганлиги туфайли ғолиб ва совриндорларни аниқлаш қийин кечди. Ҳайъат аъзоларининг фикрига кўра танловда 24-сонли мактабнинг 9-синф ўқувчиси Нигора Болтабоева “Она табиатни асрашга бўлган даъвати учун” 1- ўринга, 18-сонли мактабнинг 9-синф ўқувчиси Шодиёна Жабборберганова “Она табиат ҳақида билимдонлиги учун” 2-ўринга, 75-сонли мактабнинг 10-синф ўқувчиси Барно Кенжабоева “Она табиат ҳақида кенг тафаккури учун” 3-ўринга муносиб деб топилдилар.

Шунингдек, “Яшил табиатни асраш – ўз қўлимизда” мавзусидаги иншолар танловидаги “фаоллиги учун” 24-сонли мактабнинг 8-синф ўқувчиси Асалой Солийбоева, 47-сонли мактабнинг 11-синф ўқувчиси Маржона Жўллибоева, 65-сонли мактабнинг 8-синф ўқувчиси Севинч Ачилова, 11-сонли мактабнинг 8-синф ўқувчиси Озода Қаландаровалар ташкилотчиларнинг алоҳида рағбатига сазовор бўлдилар.

Иншолар танловлари ғолибларига ва совриндорларига “Маҳалла” хайрия жамоат фонди туман бўлинмаси томонидан тайёрланган совғалар ва “Мақтов ёрлиқлари” топширилди.

Ўрозали РЕЙИМОВ.