“Mahalla” xayriya jamoat fondi tuman boʻlinmasining grant loyihasi doirasida tadbirlar oʻtkazilmoqda

“Mahalla” xayriya  jamoat fondi tuman boʻlinmasining Qoraqalpogʻiston Respublikasi Joʻqorgʻi Kengesi huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan “Mahallalarda obodlikni taʼminlash, aholi oʻrtasida sogʻlom turmush tarzini targʻib qilish, aholining tibbiy va ekologik madaniyatini oshirish” mavzusida eʼlon qilingan tanlovda “Obod mahalla” nomli loyihasi gʻolib boʻlgan edi.

Loyihaga koʻra, tegishli tashkilotlar bilan hamkorlikda jamoatchilik ekologik nazoratini amalga oshirish, aholining ekologiyaga oid bilimlarini kengaytirish maqsadida uchrashuvlar, davra suhbatlari, tanlovlar tashkil qilish, hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshish ishlari olib borilmoqda.

Yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida “Taraqqiyot koʻzgusi” gazetasi bilan hamkorlikda umumtaʼlim maktablari oʻquvchilari oʻrtasida insholar tanlovlari ham oʻtkazilib borilmoqda.

Loyiha ish rejasi asosida “Yashil tabiatni asrash – oʻz qoʻlimizda”, “Tabiat va biz”, “Koʻchat ekish – ezgu anʼana”, “Men ekkan nihol”, “Mahallam shamoli”, “Hashar – elga yarashar”, “Mustaqil yurtimning obod mahallasi”, “Tabiat – bizning onamiz” mavzularida insholar tanlovlari oʻtkazilib, bu tanlovlarda maktab oʻquvchilarining ona tabiat va ekologiya borasidagi bilimlari oshirilmoqda.

Qipchoq hududidagi maktab oʻquvchilari oʻrtasida oʻtkazilgan “Yashil tabiatni asrash – oʻz qoʻlimizda” mavzusidagi insholar tanlovi ham maktab oʻquvchilarining ona tabiat, ekologiya haqidagi bilimlari,  tafakkuri yuqori darajada ekanligini namoyon qildi. Maktab  oʻquvchilari oʻz insholarida tabiat va uni avaylab-asrash, bu boradagi davlatimiz tomonidan qabul qilinayotgan yangi qarorlar, amalga oshirilayotgan keng koʻlamli ishlar fikrlar bildirishgan.

Qipchoq ovulidagi 18-sonli maktab binosida oʻtkazilgan mazkur insholar tanlovida hududdagi 7 ta umumtaʼlim maktablaridan 24 nafar oʻquvchi ishtirok etdi.

Tabiat bilimdonlari tomonidan yozilgan insholar biri-biridan nafis, toʻkis boʻlganligi tufayli gʻolib va sovrindorlarni aniqlash qiyin kechdi. Hayʼat aʼzolarining fikriga koʻra tanlovda 24-sonli maktabning 9-sinf oʻquvchisi Nigora Boltaboyeva “Ona tabiatni asrashga boʻlgan daʼvati uchun” 1- oʻringa, 18-sonli maktabning 9-sinf oʻquvchisi Shodiyona Jabborberganova “Ona tabiat haqida bilimdonligi uchun” 2-oʻringa, 75-sonli maktabning 10-sinf oʻquvchisi Barno Kenjaboyeva “Ona tabiat haqida keng tafakkuri uchun” 3-oʻringa munosib deb topildilar.

Shuningdek, “Yashil tabiatni asrash – oʻz qoʻlimizda” mavzusidagi insholar tanlovidagi “faolligi uchun” 24-sonli maktabning 8-sinf oʻquvchisi Asaloy Soliyboyeva, 47-sonli maktabning 11-sinf oʻquvchisi Marjona Joʻlliboyeva, 65-sonli maktabning 8-sinf oʻquvchisi Sevinch Achilova, 11-sonli maktabning 8-sinf oʻquvchisi Ozoda Qalandarovalar tashkilotchilarning alohida ragʻbatiga sazovor boʻldilar.

Insholar tanlovlari gʻoliblariga va sovrindorlariga “Mahalla” xayriya jamoat fondi tuman boʻlinmasi tomonidan tayyorlangan sovgʻalar va “Maqtov yorliqlari” topshirildi.

Oʻrozali REYIMOV.