“Янги йил” ва “Президент арчаси” байрам тадбирларида содир бўлиши мумкин бўлган фавқулодда вазиятларнинг олдини олиш бўйича махсус-тактик ўқув машқи ўтказилди

Янги йил байрамини ёрқин безатилган арчасиз тасаввур қилиш қийин. Бироқ, Янги йил арчаси ёнғин хавфсизлиги қоидаларига мувофиқ ўрнатилсагина, кўнгилсиз ҳолатларнинг олди олинади.

“Янги йил” ва “Президент арчаси” байрам тадбирлари давомида юзага келиши мумкин бўлган фавқулодда вазиятларнинг олдини олиш мақсадида 26 декабрь куни Амударё тумани Фавқулодда вазиятлар бўлими ҳамда Фавқулодда вазиятларнинг олдини олиш ва уларни бартараф этиш давлат қуйи тизими ходимлари ҳамкорлигида Олмазор маҳалласидаги Хотира майдонига ўрнатилган Янги йил арчаси атрофида кўргазмали махсус-тактик ўқув машқи ўтказилди.

Ўқув машқига Қорақалпоғистон Республикаси Фавқулодда вазиятлар бошқармаси бўлим бошлиғи майор Бахтияр Жиемуратов раҳбарлик қилди. Унда туман Фавқулодда вазиятлар давлат қуйи тизим раҳбарлар таркиби ҳамда ходимлари иштирок этишди.

Махсус-тактик ўқув машқида арчанинг мустаҳкам асосга ўрнатилгани, соз электр маржонлари билан безатилгани, енгил алангаланувчи ўйинчоқлар, пахта, шағам ва қоғозларнинг ишлатилмагани кўздан кечирилиб, Янги йил арчаси олдида содир бўлиши мумкин бўлган фавқулодда вазиятларга тўхталиб ўтилди.

Кўргазмали ўқув машқи 3 босқичда ўтказилди. Биринчи босқичда тумандаги телекоммуникация тармоғидан “йиғин” сигнали орқали туман фавқулодда вазиятлар давлат қуйи тизими хизматлари шахсий таркиби ва куч воситалари йиғилиб, саф кўриги ўтказилди.

Иккинчи босқичда табиий ва техноген хусусиятли фавқулодда вазиятлар, яъни кучли шамол натижасида “Президент арчаси” конструкциясининг қулаши оқибатида Фавқулодда вазиятлар давлат қуйи тизими хизматлари томонидан арча конструкцияси тагида қолган фуқаролар ва жабрланганларни эвакуация қилиш ҳамда биринчи тиббий ёрдам кўрсатиш ишлари амалда кўрсатиб берилди.

Махсус тактик-ўқув машқида кучли шамол оқибатида электр токи симларида қисқа туташув юз бериб, арчада ёнғин содир бўлганда Фавқулодда вазиятлар давлат қуйи тизими хизматлари томонидан аҳолини хавфсиз ҳудудга эвакуация қилиш, шунингдек, ёнғин-қутқарув экипажлари томонидан ёнғинларни ўчириш ва талофатларни бартараф этиш, арчага уланиб турган электр манбаларини ажратиш бўйича амалга оширилиши лозим бўлган чора-тадбирлар кўрсатиб берилди.

Учинчи босқичда эса “Янги йил” байрами ва “Президент арчаси” тадбири ўтказилаётган даврда содир бўлиши мумкин бўлган фавқулодда вазиятларда оммавий тартибсизликларнинг олдини олиш ҳамда ҳуқуқбузарликларни аниқлаш, тартиббузарларни қўлга олиш ва олиб кетиш, йўл ҳаракати хавфсизлигини таъминлаш бўйича туман Ички ишлар бўлими ҳамда Миллий гвардиянинг Қўриқлаш бўлими ҳаракатлари амалий тарзда кўрсатиб берилди.

Махсус-тактик ўқув машқига туман Фавқулодда вазиятлар давлат қуйи тизими хизматларининг жами 73 нафар ишчи-ходимлари, 13 та махсус техникалар жалб қилинди ва фавқулодда ҳолатларга “Чекланган тайёр” деб баҳоланди.

Х.Матякубов, Амударё тумани ФВБ бошлиғи подполковник