ТУМАН ҲОКИМИ МАКТАБ ДИРЕКТОРЛАРИ БИЛАН УЧРАШИБ, ТАЪЛИМ СИФАТИНИ ОШИРИШ МАСАЛАСИНИ МУҲОКАМА ҚИЛДИ

Ўзбекистон Республикаси Президентининг “2022-2026 йилларда халқ таълимини ривожлантириш бўйича миллий дастурни тасдиқлаш тўғрисида”ги Фармонида мактаб ўқувчиларининг билими ва кўникмаларини шакллантириш, уларни миллий ҳамда умуминсоний қадриятларга содиқлик руҳида тарбиялаш, ўқитувчи касби нуфузини ва педагогларнинг сифат таркибини ошириш борасидаги вазифалар белгилаб берилган.

Ушбу вазифаларни амалга ошириш механизмлари Президентнинг “Халқ таълимини ривожлантиришга оид қўшимча чора-тадбирлар тўғрисида”ги Қарорида ўз аксини топган. Эндиликда қарорга асосан умумий ўрта таълим муассасаларида маънавий-маърифий ишлар самарадорлигини ошириш ва бу борада мактаб директори, ота-оналар ва маҳалла раислари маъсулиятини кучайтириш мақсадида республикамизнинг барча туман, шаҳарлари кесимида рейтинги шакллантирилади. Бунда умумий ўрта таълим муассасаларида олиб борилаётган маънавий-маърифий ишлар ҳолати ҳар йили ўқув йили якунида Халқ таълими вазирлиги томонидан тасдиқланган мезонлар бўйича баҳоланади. Муассасалар рейтинг кўрсаткичларига кўра “Яшил”, “Сариқ” ва “Қизил” тоифаларга ажратилади.

Қарорда шунингдек туман, шаҳар ҳокимликларига таълим сифатини ошириш, ўқувчилар билим олишлари учун қулай шароитларни яратиш, ўзини ўзи бошқариш органлари билан биргаликда интилувчан, намунали ўқувчиларни рағбатлантириб бориш вазифаси ҳам юкланган.

Мазкур вазифаларнинг ижросини таъминлаш мақсадида 13 декабрь куни Маҳалла ва нуронийларни қўллаб-қувватлаш бўлими мажлислар хонасида туман ҳокими Султонбой Йўлдашев туман Халқ таълим бўлими ходимлари, тумандаги мактаблар директорлари билан йиғилиш ўтказди.

Йиғилишда туман ҳудудидаги умумий ўрта таълим мактабларида таълим-тарбия ишларининг бориши, таълим сифатини янада ошириш борасида туман ҳокими Султонбой Йўлдашев ўз фикр-мулоҳазаларини билдирди.

Таъкидланганидек, жамият тараққиёти, миллий фаровонлик ҳамиша ёш авлоднинг таълим-тарбияси билан боғлиқ бўлиб келган. Кекса авлод эришган ютуқларга, улар тўплаган тажрибаларга таянган ҳолда ёшларни таълимга доир энг илғор замонавий усулларда ўқитиш, Янги Ўзбекистоннинг юксак маънавиятли, мустақил фикрлашга қодир, мамлакатимиз, миллатимиз тарихини яхши биладиган, бугунгидай тинч-осойишта, бахтиёр кунларни қадрлайдиган ва уни асрай оладиган қилиб камол топтириш муҳим вазифадир.

Бу борада туманимизда ўқувчилари фан, санъат, адабиёт, спорт соҳасида ўз иқтидорларини намоён этаётган мактаблар тилга олинди. Шунингдек, мактабларда ўқитувчиларнинг касбий маҳоратини ошириш, ўқувчиларга ўз фанини чуқур ўргатишда муайян ютуқларга эришаётган устоз-муаллимларни рағбатлантириб бориш, қўллаб-қувватлаш борасида ҳам фикр алмашилди.

Таълим ва тарбия уйғунлиги – тараққиётга эришиш кафолатидир. Соҳага қаратилаётган эътибор, ажратилаётган маблағлар, яратилаётган шароитлардан кўзланган мақсад ҳам баркамол авлодни камолга етказишга қаратилгани билан аҳамиятлидир.

Йиғилишда Халқ таълими бўлими масъуллари ва мактаблар директорлари таълим масканларида сифат ва самарадорликни ошириш бўйича режаларини баён қилдилар.

Ойгул РАЖАБОВА.