Амударё тумани Адлия бўлими томонидан “Очиқ эшиклар куни” ўтказилди

5 декабрь куни туман Давлат хизматлари маркази биносида “Очиқ эшиклар куни” ўтказилди. Тадбирда Адлия бўлими ва унинг таркибидаги тузилмалар ходимлари ҳамда ёшлар, кенг жамоатчилик вакиллари иштирок этишди.

Тадбир давомида сўзга чиққанлар кейинги йилларда мамлакатимиз давлат хизматлари кўрсатиш миллий тизими изчиллик билан такомиллаштирилаётганлиги аҳолининг ҳаёт сифати, ишчанлик муҳитини яхшилаш ва тадбиркорликни ривожлантиришда муҳим аҳамият касб этаётганлигини таъкидлашди.

Шунингдек, фуқаролар ва тадбиркорларга давлат хизматлари кўрсатиш тизими босқичма-босқич ислоҳ қилиниб, ортиқча бюрократик тўсиқларни бартараф этиш ҳамда давлат хизматлари кўрсатиш сифатини тубдан яхшилаш борасида тизимли чора-тадбирлар амалга оширилаётганлиги ҳамда жорий йилнинг 1 январидан айрим давлат хизматларини кўрсатишда ундириладиган давлат божлари, йиғимлар ва бошқа тўлов миқдорлари камайтирилганлигини айтиб ўтишди.

 “Очиқ эшиклар куни” тадбири доирасида иштирокчилар туман Давлат хизматлари маркази, Юридик хизмат кўрсатиш маркази, Фуқаролик ҳолати далолатномаларини ёзиш бўлими ва “Мадад” ҳуқуқий маслаҳат бюросида фуқаролар учун яратилган қулайликлар, хизмат кўрсатиш, шу билан биргаликда давлат хизматларини олиш жараёни билан яқиндан танишиш имконига эга бўлди.

Ундан ташқари, иштирокчилар Марказдаги ўз-ўзига хизмат кўрсатиш бурчагида мутахассислар ёрдамида керакли давлат хизматларидан мустақил фойдаланишди. Келажагимиз эгалари бўлган ёшларга давлат хизматларидан электрон шаклда фойдаланиш, my.gov.uz ягона интерактив давлат хизматлари портали ва унинг афзалликлари, фойдаланиш тартиблари тушунтирилди.

Таъкидланганидек, соҳада олиб борилаётган ислоҳотлар натижасида айрим давлат хизматлари соддалаштирилиб, марказлар томонидан қамраб олинган хизматларни кўрсатиш муддати ва талаб этиладиган ҳужжатлар сони ўртача икки баробарга қисқартирилди. Аҳолига замонавий технологиялар асосида ҳар томонлама қулай шарт-шароитда бу каби давлат хизматлари ва ҳуқуқий ёрдам кўрсатилаётгани эса жамиятда инсон қадри устуворлигининг муҳим омилларидан бири эканлигини кўрсатади.

Жорий йилнинг ўтган даври мобайнида туман Фуқаролик ҳолати далолатномаларини ёзиш бўлимида 4737 та туғилганлик, 1539 та никоҳ, 166 та ажрим, 908 та ўлим гувоҳномалари расмийлаштирилиб, 115 та далолатнома ёзувларига ўзгартириш ва қўшимчалар киритилган. Шунингдек, 35 нафар фарзандликка олинган болалар ҳужжатлари расмийлаштириб берилди ва 224 та никоҳ сайёр равишда қайд этилди.

Тадбир давомида шу каби маълумотларни бериш билан бирга Президентимизнинг 2022 йил 20 апрелдаги “Давлат хизматлари кўрсатишни соддалаштириш, бюрократик тўсиқларни қисқартириш ҳамда давлат хизматлари кўрсатиш миллий тизимини ривожлантиришнинг қўшимча чора-тадбирлари тўғрисида”ги 113-сонли Фармонига мувофиқ жорий этилган Mobil-ID тизими ҳақида тушунчалар берилди. Иштирокчилар ушбу тизимда рўйхатдан ўтиш, фойдаланиш тартиблари, тизимнинг афзалликлари ҳақида маълумотларга эга бўлдилар. Уларнинг бир қисми тадбир давомида Mobil-ID тизими орқали рўйхатдан ўтказилди.

Тадбирда ёшлар давлат хизматлари маркази ходимларининг фаолияти, улар учун яратилган шарт-шароитлар, ходимларни ижтимоий муҳофаза қилиш борасида амалга оширилаётган ишлар ва уларнинг вазифалари тўғрисида батафсил маълумотларга эга бўлишди. Шунингдек, тадбир сўнггида масъул ходимлар томонидан иштирокчиларга қизиқтирган масалалари юзасидан ҳуқуқий маслаҳатлар ҳам берилди.

О.Худойберганова.