Amudaryo tumani Adliya boʻlimi tomonidan “Ochiq eshiklar kuni” oʻtkazildi

5-dekabr kuni tuman Davlat xizmatlari markazi binosida “Ochiq eshiklar kuni” oʻtkazildi. Tadbirda Adliya boʻlimi va uning tarkibidagi tuzilmalar xodimlari hamda yoshlar, keng jamoatchilik vakillari ishtirok etishdi.

Tadbir davomida soʻzga chiqqanlar keyingi yillarda mamlakatimiz davlat xizmatlari koʻrsatish milliy tizimi izchillik bilan takomillashtirilayotganligi aholining hayot sifati, ishchanlik muhitini yaxshilash va tadbirkorlikni rivojlantirishda muhim ahamiyat kasb etayotganligini taʼkidlashdi.

Shuningdek, fuqarolar va tadbirkorlarga davlat xizmatlari koʻrsatish tizimi bosqichma-bosqich isloh qilinib, ortiqcha byurokratik toʻsiqlarni bartaraf etish hamda davlat xizmatlari koʻrsatish sifatini tubdan yaxshilash borasida tizimli chora-tadbirlar amalga oshirilayotganligi hamda joriy yilning 1-yanvaridan ayrim davlat xizmatlarini koʻrsatishda undiriladigan davlat bojlari, yigʻimlar va boshqa toʻlov miqdorlari kamaytirilganligini aytib oʻtishdi.

 “Ochiq eshiklar kuni” tadbiri doirasida ishtirokchilar tuman Davlat xizmatlari markazi, Yuridik xizmat koʻrsatish markazi, Fuqarolik holati dalolatnomalarini yozish boʻlimi va “Madad” huquqiy maslahat byurosida fuqarolar uchun yaratilgan qulayliklar, xizmat koʻrsatish, shu bilan birgalikda davlat xizmatlarini olish jarayoni bilan yaqindan tanishish imkoniga ega boʻldi.

Undan tashqari, ishtirokchilar Markazdagi oʻz-oʻziga xizmat koʻrsatish burchagida mutaxassislar yordamida kerakli davlat xizmatlaridan mustaqil foydalanishdi. Kelajagimiz egalari boʻlgan yoshlarga davlat xizmatlaridan elektron shaklda foydalanish, my.gov.uz yagona interaktiv davlat xizmatlari portali va uning afzalliklari, foydalanish tartiblari tushuntirildi.

Taʼkidlanganidek, sohada olib borilayotgan islohotlar natijasida ayrim davlat xizmatlari soddalashtirilib, markazlar tomonidan qamrab olingan xizmatlarni koʻrsatish muddati va talab etiladigan hujjatlar soni oʻrtacha ikki barobarga qisqartirildi. Aholiga zamonaviy texnologiyalar asosida har tomonlama qulay shart-sharoitda bu kabi davlat xizmatlari va huquqiy yordam koʻrsatilayotgani esa jamiyatda inson qadri ustuvorligining muhim omillaridan biri ekanligini koʻrsatadi.

Joriy yilning oʻtgan davri mobaynida tuman Fuqarolik holati dalolatnomalarini yozish boʻlimida 4737 ta tugʻilganlik, 1539 ta nikoh, 166 ta ajrim, 908 ta oʻlim guvohnomalari rasmiylashtirilib, 115 ta dalolatnoma yozuvlariga oʻzgartirish va qoʻshimchalar kiritilgan. Shuningdek, 35 nafar farzandlikka olingan bolalar hujjatlari rasmiylashtirib berildi va 224 ta nikoh sayyor ravishda qayd etildi.

Tadbir davomida shu kabi maʼlumotlarni berish bilan birga Prezidentimizning 2022-yil 20-apreldagi “Davlat xizmatlari koʻrsatishni soddalashtirish, byurokratik toʻsiqlarni qisqartirish hamda davlat xizmatlari koʻrsatish milliy tizimini rivojlantirishning qoʻshimcha chora-tadbirlari toʻgʻrisida”gi 113-sonli Farmoniga muvofiq joriy etilgan Mobil-ID tizimi haqida tushunchalar berildi. Ishtirokchilar ushbu tizimda roʻyxatdan oʻtish, foydalanish tartiblari, tizimning afzalliklari haqida maʼlumotlarga ega boʻldilar. Ularning bir qismi tadbir davomida Mobil-ID tizimi orqali roʻyxatdan oʻtkazildi.

Tadbirda yoshlar davlat xizmatlari markazi xodimlarining faoliyati, ular uchun yaratilgan shart-sharoitlar, xodimlarni ijtimoiy muhofaza qilish borasida amalga oshirilayotgan ishlar va ularning vazifalari toʻgʻrisida batafsil maʼlumotlarga ega boʻlishdi. Shuningdek, tadbir soʻnggida masʼul xodimlar tomonidan ishtirokchilarga qiziqtirgan masalalari yuzasidan huquqiy maslahatlar ham berildi.

O.Xudoyberganova.