“Меҳр дафтари”га киритилган 3 нафар амударёлик ёшларга Нукус шаҳридан янги хонадонлар совға қилинди

Юртимизда келажак эгалари бўлган ёш авлоднинг комил инсонлар бўлиб вояга етишларига алоҳида эътибор қаратилиб, кенг имкониятлар яратилмоқда. Шу ўринда вояга етмаганлар давлатимиз ҳимоясига олинганини, бу Конституция ва Қонунлар билан мустаҳкамлаб қўйилганини эътироф этиш жоиз. Вояга етмаганлар учун уларнинг ота-оналари, васий ёки ҳомийлари ғамхўрлик қиладилар. Бевосита, Конституциямизнинг 45-моддасида ҳам вояга етмаганлар, меҳнатга лаёқатсизлар ва ёлғиз кексаларнинг ҳуқуқлари қонун ҳимоясидалиги келтириб ўтилган. Вояга етмаганларнинг ҳуқуқлари билан боғлиқ муносабатлар бугунги кунда давлатимиздаги долзарб масалалардан бирига айланган.

Амударё тумани ҳокимлигининг Болаларни ҳимоя қилиш шўъбаси томонидан ҳам етим болалар ва ота-она қарамоғидан маҳрум бўлган болаларнинг муаммолари ўрганиб чиқилиб, уларни ҳал қилиш борасида қатор ишлар амалга оширилиб келинмоқда.

Президентимизнинг 2021 йилги 9 августдаги тегишли Қарорига кўра “Меҳр дафтари”га киритилган, 18 ёшга тўлган етим ва ота-она қарамоғидан маҳрум бўлган 3 нафар ёшларнинг ҳар бирига хонадонлар харид қилингани ҳам бу борадаги амалий ишларга ёрқин мисолдир.

2 декабрь куни туман ҳокимлигида ўтказилган йиғилишда мазкур хонадонларнинг калитлари ва ҳужжатлари ўз эгаларига тантанали равишда топширилди. Ҳар бирининг қиймати 130 млн. сўм бўлган ушбу хонадонлар Нукус шаҳрида жойлашган. Шахсий ёки мерос қолдирилган уй-жойи бўлмаган, шунингдек, жорий йилда уй-жойга муҳтож фуқаро сифатида рўйхатга олинган ёшларга хонадонлар калити ва ҳужжатлари туман ҳокими Султонбой Йўлдашев томонидан тантанали равишда топширилди.

“Нуронийлар” жамоатчилик Кенгаши раиси ўринбосари Бекман Аллаберганов, ҳокимликнинг Болаларни ҳимоя қилиш шўъбаси раҳбари Жаҳонгир Холмуродов ва бошқалар ёшни янги хонадон билан табриклаб, уларнинг келгуси ишларида омадлар ёр бўлишини тилашди.

Таъкидланганидек, туман ҳокимлигининг Болаларни ҳимоя қилиш шўъбаси томонидан шакллантирилган “Меҳр дафтари” рўйхатида турган болаларнинг муаммоларини ўрганиш мақсадида улар яшаётган хонадонларга мунтазам равишда борилиб, ҳолидан хабар олиниб турилади. Ўтган давр мобайнида “Меҳр дафтари” жамғармаси ҳисобидан рўйхатда турган 9 нафар боланинг ҳар бирига 650 минг, жами 5 миллион 850 минг сўмлик мактаб формалари ва ўқув қуроллари берилди. Шунингдек, жамғарма маблағлари ҳисобидан 1 нафар бола замонавий ноутбук ва 1 нафар қиз тикув машинаси билан таъминланди.

Ота-онаси йўқлиги учун васий қарамоғига олинган, айни пайтда 18 ёшга тўлган, уй-жойга муҳтож Азизбек Жумабоев, Озода Бобожонова ва Фарида Иноятоваларнинг ҳар бирига алоҳида совға қилинган хонадонлар зарур мебеллар билан ҳам жиҳозланган. Шунингдек, янги хонадон эгаларига туманимиздаги саховатпеша тадбиркорлар томонидан беғараз ҳомийлик ёрдами асосида телевизор, уй-рўзғор буюмлари ва бошқа маиший буюмлар ҳам совға қилинди.

Туман ҳокими Султонбой Йўлдошев саҳоватпеша тадбиркорларга алоҳида миннатдорчилик билдирди.

Ўзларининг алоҳида уйларига эга бўлган ёшлар ота-онасидек ғамхўрлик кўрсатган давлатимиздан, қолаверса, туман ҳокими, Болаларни ҳимоя қилиш шўъбаси масъулларидан жуда мамнун эканликларини айтиб, миннатдорчилик изҳор этдилар.

О.Худойберганова.