“ЁШ КИТОБХОН” КЎРИК-ТАНЛОВИНИНГ АМУДАРЁ ТУМАН БОСҚИЧИ ҒОЛИБЛАРИ АНИҚЛАНДИ

Спорт, санъат, компьютер саводхонлиги, бадиий ҳунармандчилик ва китобхонлик йўналишлари бўйича зукко, билимдон ёшларни бирлаштирган “Беш ташаббус олимпиадаси” доирасида ўтказилаётган маънавий-маърифий тадбирлар қамрови тобора кенгайиб, энг чекка қишлоқ ва маҳаллалар ёшларининг ижтимоий-маънавий фаоллигини оширишга хизмат қилмоқда. Айни пайтда бутун мамлакатимиз бўйлаб “Беш ташаббус олимпиадаси” доирасидаги тадбирларнинг иккинчи мавсуми муваффақиятли тарзда давом этмоқда.

Жорий йилнинг 31 октябрь санасида Амударё туман Маҳалла бўлими биносида мазкур олимпиаданинг иккинчи мавсуми доирасидаги “Ёш китобхон” Республика кўрик-танловининг туман босқичи бўлиб ўтди.

Кўрик-танлов ўтказиладиган Маҳалла бўлимининг фойеси маънавий-маърифий мавзудаги шиорлар, ўзбек ва жаҳон адабиёти буюк намоёндаларининг инсон камолоти, ақл-идрок, меҳнатсеварлик, она Ватанга муҳаббат, инсонпарварлик ҳақидаги фикрлари битилган лавҳалар билан безатилди. Ҳар бир иштирокчи кўрик-танловда ўзини эмин-эркин тутиши, фикрларини равон баён этишларини таъминлаш мақсадида кўрик-танлов Низоми ва тартиб-таомиллари билан олдиндан танишишлари учун шароит яратилди.

Кўрик-танловда 10-14, 15-19, 20-30 ёш тоифасида секторлар бўйича 1-2-3-ўринларни эгаллаган ёш китобхонлар ўз билимларини синовдан ўтказдилар.

Кўрик-танлов шартларига кўра, ҳар бир ёш тоифасидаги китобхон ёшлар ўзлари ўқиган китобларнинг қаҳрамонлари, асар ғояси, улардаги диалогларнинг тарбиявий аҳамияти, асарнинг ёшлар ҳаётида тутган ўрни ҳақида батафсил маълумот бердилар.

Қизғин баҳс-мунозаралар, бири-биридан қизиқарли савол-жавоблар тарзида ўтган беллашувларда 10-14 ёшли китобхонлар орасида 1-ўрин Дурунки маҳалласи зукко китобхони Райҳон Ибрагимовага, 2-ўрин Янгиобод маҳалласидан Малика Норбоевага, 3-ўрин эса Динорахон Машариповага насиб этди.

Кўрик-танловнинг 15-19 ёшли китобхонлар баҳсларида барча савол-топшириқларни аъло ва мукаммал даражада бажарган Қипчоқ овулидан Нилуфар Туркманбоева 1-ўрин соҳибаси бўлди. 2-ўринни Янгиобод маҳаллалик иқтидорли китобхон Ирода Норбоева, 3-ўринни Оқ олтин овулидан Шаҳзода Олимбоевалар эгаллашди.

Дўстона ва самимий руҳда ўтган беллашувларда 20-30 ёшлилар янада фаол иштирок этишди. Ғолиблик учун бўлган баҳсларда ёшлар ўзларининг ҳақиқий китобхон, билимга интилувчанликларини намоён этишди. Якуний натижага кўра, мазкур ёш тоифасидаги китобхонлар баҳсида Бобур номли овулдан Маҳлиё Қўзибоева 1-ўринни, Бўз солма маҳалласидан Гулсара Отамуродова 2-ўринни, Босув маҳалласидан Мафтуна Ражаббоева 3-ўринни эгалладилар.

Ёшлар маънавиятини юксалтириш, уларнинг дунёқарашини янада кенгайтириш, зукко ва билимдон инсонлар қилиб тарбиялашга қаратилган “Беш ташаббус олимпиадаси”нинг иккинчи мавсуми доирасида ўтказилган “Ёш китобхон” Республика кўрик-танловининг Амударё туман босқичи таассуротларга бой, қизиқарли тарзда ўтказилди ва ғолиблар маънавий рағбатлантирилиб, уларга мазкур кўрик-танловнинг Қорақалпоғистон Республикаси босқичига йўлланмалар берилди.

Робия ЙЎЛДОШЕВА.