Туман ҳокимлигининг нуронийлар, ёшлар ва барча амударёликларга “Яшил макон” умуммиллий дастури доирасидаги “долзарб 40 кунлик”ни муносиб тарзда ўтказиш бўйича МУРОЖААТИ
Ҳурматли юртдошлар!
Азал-азалдан ота-боболаримиз яхши ниятлар билан кўчат экишиб, фарзандларининг камолини шу экилган кўчатларнинг униб-ўсиши билан боғлашган. Неча минг йиллик ушбу қадриятларимиз бугунги кунда – иқлим ўзгаришлари, экологик муаммолар шароитида ҳар қачонгидан ҳам долзарблик касб этмоқда. Муҳтарам Президентимиз ташаббуси билан “Яшил макон” умуммиллий лойиҳаси доирасида бошланган “Яшил йиллик” умуммиллий тадбирлари ана шу минг йиллик қадриятларимиз давом этаётганининг, табиат олдидаги, келгуси авлодлар олдидаги бурчни ҳис қилишдек инсоний фазилатнинг амалдаги ифодасидир.
Президентимиз Шавкат Мирзиёев раислигида 11 октябрь куни ўтказилган видеоселектор йиғилишида “Яшил макон” умуммиллий лойиҳаси доирасида бу йил якунигача 75 миллион дона, келгуси йил баҳор ойларида яна 125 миллион дона мевали ва манзарали кўчатлар экиш вазифаси қўйилган эди.
20 октябрдан 1 декабргача кўчат экиш бўйича мамлакатимиз бўйлаб “долзарб 40 кунлик” эълон қилинди. Ушбу экологик лойиҳа доирасида ҳар йили 200 миллион туп дарахт ва бута кўчатини экиш, шу орқали мамлакатимиз яшил майдонларини амалдаги 8 фоиздан 30 фоизга ошириш режа қилинган.
Агар ҳар бир фуқаро, овул ва маҳалла аҳли, ҳар бир корхона, муассаса, давлат ва нодавлат ташкилоти ходими ушбу эзгу ишга ҳисса қўшса, юртимизда яшил ҳудудлар майдони янада кенгайиб, экологик ҳолат анча яхшиланади.
Азиз нуронийлар, отахону-онахонлар!
Аждодларимиз азалдан “Бирни кессанг, ўнни эк”, дея табиатни асрашга, яратувчиликка даъват этиб келган. Ҳар қандай эзгу ишда тарғиботнинг ўрни алоҳида. Шундай экан, дарахт экишнинг савобини, иқлим ўзгариши ва экологик фалокатларнинг олдини олишдаги аҳамиятини ёшларга, аҳолига тушунтириш орқали ушбу хайрли ишга ўзингиз бош-қош бўлишингизга ишонамиз!
Азиз онахонлар, қадрли аёл-қизлар!
Сиз миллат саломатлиги, авлодлар давомийлиги, фарзандларимиз келажаги ҳақида ҳаммадан ҳам кўпроқ қайғурасиз. Шундай экан, “Яшил макон” умуммиллий дастури доирасидаги “долзарб 40 кунлик”да фаол иштирок этиб, кўкаламзорлаштириш ва кўчат экиш ишларига ҳисса қўшинг. Зеро, соғлом фарзандлар дунёга келиши ҳамда уларнинг баркамол бўлиб вояга етиши атроф-муҳит мусаффолигига кўп жиҳатдан боғлиқ.
Азиз ёшлар!
Юртимиз равнақи Сиз каби ватанпарвар ёшлар қўлида. Юртбошимизнинг Сизга билдирган ишончини ҳар қадамда, ҳар жабҳада сидқидилдан оқлаш учун халқимизга камарбаста бўлмоғингиз лозим. Зеро ёшлар – улкан уммон, ёшлик куч-қудрат, ғайрат-шижоат палласидир.
Ишонамизки, Сиз ерга қадаган ҳар бир ниҳол кун келиб катта дарахтга айланади. Унинг мевасидан ёки соясидан одамлар, жонзотлар роҳат олса, қуёшда тобланган ям-яшил баргларидан атмосфера тозаланади, атроф-муҳит покланади, чуқур илдиз отган томиридан эса тупроқ мустаҳкамланади, намлиги сақланади.
Шундай экан, ҳар бирингиз мевали ва манзарали дарахт кўчатларини экиб, меҳр билан парваришланг. Эккан ниҳолларингиз ўзингиз билан баравар ўсиб, ривожланиб, азим дарахтларга айлансин!
Қадрли юртдошлар!
Кейинги пайтларда Ўзбекистонда кузатилган чанг бўронлари ва ноодатий об-ҳаво иқлим ўзгаришининг нишоналаридир. Бу эса дарахт экиш ва яшил ҳудудлар майдонини кўпайтиришнинг нақадар долзарблигини, бу хайрли ишга катта масъулият ва алоҳида эътибор билан ёндашиш зарурлигини кўрсатмоқда.
Ҳақиқатан ҳам, яшил ўрмонлар, дарахтзорлар ташкил этилиши Оролнинг қуриши оқибатида минтақамизда юзага келган оғир экологик муаммоларни юмшатишда, атроф-муҳит мусаффолигини сақлашда муҳим ўрин тутади.
Шундай экан, барчамиз бир ёқадан бош чиқариб, “Яшил макон” умуммиллий дастурида фаол иштирок этиб, ҳовлимиз, кўчамиз ва ишхонамиз атрофига, овул ёки маҳалламиз ҳудудига мевали ва манзарали дарахт кўчатларини экайлик!
Халқимизда “Яхшидан боғ қолади” деган ибора бежиз айтилмаган. Келгуси авлодлар сўлим боғлар, гўзал табиат ва мусаффо осмон учун биздан миннатдор бўлсин, азиз юртдошлар!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
