Tuman hokimligining nuroniylar, yoshlar va barcha amudaryoliklarga “Yashil makon” umummilliy dasturi doirasidagi “dolzarb 40 kunlik”ni munosib tarzda oʻtkazish boʻyicha MUROJAATI

Hurmatli yurtdoshlar!

Azal-azaldan ota-bobolarimiz yaxshi niyatlar bilan koʻchat ekishib, farzandlarining kamolini shu ekilgan koʻchatlarning unib-oʻsishi bilan bogʻlashgan. Necha ming yillik ushbu qadriyatlarimiz bugungi kunda – iqlim oʻzgarishlari, ekologik muammolar sharoitida har qachongidan ham dolzarblik kasb etmoqda. Muhtaram Prezidentimiz tashabbusi bilan “Yashil makon” umummilliy loyihasi doirasida boshlangan “Yashil yillik” umummilliy tadbirlari ana shu ming yillik qadriyatlarimiz davom etayotganining, tabiat oldidagi, kelgusi avlodlar oldidagi burchni his qilishdek insoniy fazilatning amaldagi ifodasidir.

Prezidentimiz Shavkat Mirziyoyev raisligida 11-oktyabr kuni oʻtkazilgan videoselektor yigʻilishida “Yashil makon” umummilliy loyihasi doirasida bu yil yakunigacha 75 million dona, kelgusi yil bahor oylarida yana 125 million dona mevali va manzarali koʻchatlar ekish vazifasi qoʻyilgan edi.

20-oktyabrdan 1-dekabrgacha koʻchat ekish boʻyicha mamlakatimiz boʻylab “dolzarb 40 kunlik” eʼlon qilindi. Ushbu ekologik loyiha doirasida har yili 200 million tup daraxt va buta koʻchatini ekish, shu orqali mamlakatimiz yashil maydonlarini amaldagi 8 foizdan 30 foizga oshirish reja qilingan.

Agar har bir fuqaro, ovul va mahalla ahli, har bir korxona, muassasa, davlat va nodavlat tashkiloti xodimi ushbu ezgu ishga hissa qoʻshsa, yurtimizda yashil hududlar maydoni yanada kengayib, ekologik holat ancha yaxshilanadi.

Aziz nuroniylar, otaxonu-onaxonlar!

Ajdodlarimiz azaldan “Birni kessang, oʻnni ek”, deya tabiatni asrashga, yaratuvchilikka daʼvat etib kelgan. Har qanday ezgu ishda targʻibotning oʻrni alohida. Shunday ekan, daraxt ekishning savobini, iqlim oʻzgarishi va ekologik falokatlarning oldini olishdagi ahamiyatini yoshlarga, aholiga tushuntirish orqali ushbu xayrli ishga oʻzingiz bosh-qosh boʻlishingizga ishonamiz!

Aziz onaxonlar, qadrli ayol-qizlar!

Siz millat salomatligi, avlodlar davomiyligi, farzandlarimiz kelajagi haqida hammadan ham koʻproq qaygʻurasiz. Shunday ekan, “Yashil makon” umummilliy dasturi doirasidagi “dolzarb 40 kunlik”da faol ishtirok etib, koʻkalamzorlashtirish va koʻchat ekish ishlariga hissa qoʻshing. Zero, sogʻlom farzandlar dunyoga kelishi hamda ularning barkamol boʻlib voyaga yetishi atrof-muhit musaffoligiga koʻp jihatdan bogʻliq.

Aziz yoshlar!

Yurtimiz ravnaqi Siz kabi vatanparvar yoshlar qoʻlida. Yurtboshimizning Sizga bildirgan ishonchini har qadamda, har jabhada sidqidildan oqlash uchun xalqimizga kamarbasta boʻlmogʻingiz lozim. Zero yoshlar – ulkan ummon, yoshlik kuch-qudrat, gʻayrat-shijoat pallasidir.

Ishonamizki, Siz yerga qadagan  har bir nihol kun kelib katta daraxtga aylanadi. Uning mevasidan yoki soyasidan odamlar, jonzotlar rohat olsa, quyoshda toblangan yam-yashil barglaridan atmosfera tozalanadi, atrof-muhit poklanadi, chuqur ildiz otgan tomiridan esa tuproq mustahkamlanadi, namligi saqlanadi.

Shunday ekan, har biringiz mevali va manzarali daraxt koʻchatlarini ekib, mehr bilan parvarishlang. Ekkan nihollaringiz oʻzingiz bilan baravar oʻsib, rivojlanib, azim daraxtlarga aylansin!

Qadrli yurtdoshlar!

Keyingi paytlarda Oʻzbekistonda kuzatilgan chang boʻronlari va noodatiy ob-havo iqlim oʻzgarishining nishonalaridir. Bu esa daraxt ekish va yashil hududlar maydonini koʻpaytirishning naqadar dolzarbligini, bu xayrli ishga katta masʼuliyat va alohida eʼtibor bilan yondashish zarurligini koʻrsatmoqda.

Haqiqatan ham, yashil oʻrmonlar, daraxtzorlar tashkil etilishi Orolning qurishi oqibatida mintaqamizda yuzaga kelgan ogʻir ekologik muammolarni yumshatishda, atrof-muhit musaffoligini saqlashda muhim oʻrin tutadi.

Shunday ekan, barchamiz bir yoqadan bosh chiqarib, “Yashil makon” umummilliy dasturida faol ishtirok etib, hovlimiz, koʻchamiz va ishxonamiz atrofiga, ovul yoki mahallamiz hududiga mevali va manzarali daraxt koʻchatlarini ekaylik!

Xalqimizda “Yaxshidan bogʻ qoladi” degan ibora bejiz aytilmagan. Kelgusi avlodlar soʻlim bogʻlar, goʻzal tabiat va musaffo osmon uchun bizdan minnatdor boʻlsin, aziz yurtdoshlar!