Истеъдодли ёшлар Ўзбекистоннинг ёрқин келажаги

Бугунги ёшлар мустақил Ўзбекистонимизнинг таянчи ва келажаги ҳисобланади. Ҳар томонлама кучли, соғлом ҳамда маънавий жиҳатдан етук ёш авлод Ватанимизнинг ифтихори ва фахридир.

Ёшларнинг жамиятда муносиб ўрин эгаллашга бўлган иштиёқи ва эришаётган ютуқлари кишини қувонтиради.  Улар ўзларининг креатив ғоялари, ўзига хос лойиҳалари ва аниқ мақсадлари билан ташаббус кўрсатиб, юртимиз равнақига муносиб ҳисса қўшиб келмоқда.

Туманимизнинг Олмазор маҳалласида истиқомат қилувчи Севара Исмоилова ҳам мана шундай интилувчан ёшлардан бири.  Мактаб ўқувчиси вақтидаёқ ижод намуналари ўқувчиларга манзур бўлган эди.

У ҳозирда Қорақалпоқ Давлат Университети қорақалпоқ филологияси ва журналистика факультети битирувчи курс талабаси. Севара шу кунга қадар 20 дан зиёд халқаро ҳамда Республика танловларида муваффақиятли қатнашиб, ғолиб, совриндор бўлди. Хусусан, Ажиниёз номидаги Нукус давлат педагогика институти, "Seience box" МЧЖ ҳамда Ўзбекистон инновацион таълимни ривожлантириш Асоссацияси ташаббуси билан ўтказилган "Учинчи ренессанс ёшлари Нукусда" мавзусидаги илмий-амалий 1-республика кўп тармоқли онлайн конференциясида "Журналистика современной информационной эпохи" мавзусидаги мақоласи учун, Ўзбекистон Республикаси олий ва ўрта махсус таълим вазирлиги ҳузуридаги олий таълимни ривожлантириш тадқиқотлари ва илғор технологияларни татбиқ этиш маркази томонидан ўтказилган "Олий таълим ислоҳотлари: ютуқлар, муаммолар, ечимлар" мавзусидаги республика танловида қатнашгани учун махсус сертификатлар билан тақдирланди.

Жорий йилда "Беш ташаббус олимпиадаси" доирасида ўтказилган танловнинг адабиёт йўналишида туманда ғолиб бўлиб, Қорақалпоғистон босқичида фаол қатнашди. Шунингдек, Амударё телевидениесида  ёшларни маънавий-ахлоқий қадриятлар руҳида тарбиялашга қаратилган муаллифлик кўрсатувларини тайёрлаб, томошабинлар эътиборини қозонмоқда. Унинг шеър, ҳикоялари "Тараққиёт кўзгуси" , "Ғунчадан гуллар очилар" тўпламларида, Қорақалпоғистондаги бошқа нашрларда ёритилган.

Шу йилнинг 24-25 сентябрь кунлари С.Исмоилова “Best Publication” Халқаро илмий тадқиқотлар ва ёшларни қўллаб-қувватлаш маркази томонидан ташкил этилган “Ташаббускор ислоҳотчи” халқаро танловида муваффақиятли қатнашиб, илмий иши маъқулланди ва “Ташаббускор ислоҳотчи” кўкрак нишони, сертификат, диплом, ташаккурнома ва қимматбаҳо совғалар билан тақдирланди. Бугунги кунда юртимизда ёшларга яратиб берилаётган имкониятлар кўлами ниҳоятда кенг.

Ёшлардан фақатгина ушбу имкониятлардан самарали фойдаланиш талаб этилади холос. Улар истиқлолнинг энг бахтли фарзандлари. Демак, олдинда уларни бундан-да, улкан ғалабалар кутяпти.

Фотима Эшимбетова.