Қумёпда ободонлаштириш, кўкаламзорлаштириш ишлари қизғин давом этмоқда

Ўзбекистон Республикаси Президенти Ш.Мирзиёев раҳбарлигида жорий йилнинг 15  январида “Маҳаллабай” ишлаш ва камбағалликни қисқартириш ҳамда аҳоли бандлигини таъминлаш бўйича 2022 йилда амалга ошириладиган устувор вазифалар”га бағишланган кенгайтирилган видеоселектор йиғилиши ўтказилган эди. Унда “маҳаллабай” ишлаш ва камбағалликни қисқартириш мақсадида  аҳолини иш билан таъминлаш, аҳолининг уйлари атрофларида ободонлаштириш ва кўкаламзорлаштириш ишларини олиб бориш каби хайрли ишларни амалга ошириш вазифалари белгилаб берилган эди. Ушбу топшириқларнинг ижросини таъминлаш мақсадида Амударё туманида ҳам режалар ишлаб чиқилиб, амалга оширилмоқда.

Хусусан, туманнинг қолоқ ва шароити оғир овул, маҳаллалари аниқланиб, ушбу ҳудудларда қурилиш, аҳолининг уйи атрофларида ободонлаштириш ва кўкаламзорлаштириш ишлари олиб борилмоқда. Бу ишлар учун ажратилаётган маблағлар мақсадли сарфланиб, ишлар самарали амалга оширилаётир.

Туманимизнинг чекка ҳудуди – Қангли овулидаги Қумёп маҳалласида ҳам ушбу йўналишда ободонлаштириш, кўкаламзорлаштириш ишлари кенг кўламда олиб бориляпти.

Хусусан, шу йилнинг 27 августидан 15 сентябригача 1,2 километр узунликдаги 3 та кўча асоси тупроқ билан кўтарилиб, тош-шағал тўкишга тайёрланди. 20 та кўчанинг 7,8 километр узунликдаги қисмига тош-шағал ётқизилди. 330 та уй-жойларнинг фасад қисми тартибга келтирилиб, ободонлаштирилди ва деворлари бўялди.

Маҳалла ҳудудидаги асосий автомобил йўлининг 1 километрига тунги ёритиш чироқлари ўрнатилди. Маҳалла фуқаролар йиғини биноси ҳомийлар маблағлари ҳисобидан капитал таъмирланмоқда. Шунингдек, ҳудуддаги 44-сонли давлат мактабгача таълим ташкилоти маҳаллий бюджетнинг 248,5 миллион сўм маблағи ҳисобига таъмирланмоқда. Таъмирлаш ишлари пудратчи ташкилот “Камолов эшиклари” масъулияти чекланган жамияти қурувчи усталари томонидан сифатли амалга оширилаётир.

Ҳудуддаги 74-сонли мактаб биноси ҳам таъмирталаб аҳволга келиб қолганлиги инобатга олиниб, бинода ўқувчилар учун муносиб шароитлар яратиш мақсадида маҳаллий бюджетнинг 435 миллион сўмдан зиёд маблағи ҳисобига сифатли таъмирланмоқда. Бу ишларни “Манғит инвест максимум” масъулияти чекланган жамияти қурувчилари адо этишмоқда.

Маҳалла ўсмир-ёшларининг бўш вақтларини мазмунли ўтказиш, уларни спорт машғулотларига жалб қилиш, спортнинг оммавийлигига эришиш мақсадида спорт майдончаси бунёд этилди. Шунингдек, “ташаббусли бюджет” маблағлари ҳисобидан 1 та трансформатор ва 34 та таянч устунлар ўрнатилиб, электр таъминоти сифати яхшиланди, 2 километрлик  узунликда  электр линияси тортилди.

Мамлакатимизда аҳоли турмуши сифатини ошириш, инсон қадрини юксалтириш борасида амалга оширилаётган сай-ҳаракатлар энг чекка ҳудудларда ҳам яққол намоён бўлаётгани кишини қувонтиради, эртанги кунга ишончини оширади. Буни туманимизнинг Қумёп маҳалласи мисолида ҳам кўришимиз мумкин. Қумёпда ободонлаштириш, кўкаламзорлаштириш ишлари шу кунларда ҳам қизғин давом эттирилмоқда.

Ойгул Ражабова