Qumyopda obodonlashtirish, koʻkalamzorlashtirish ishlari qizgʻin davom etmoqda

Oʻzbekiston Respublikasi Prezidenti Sh.Mirziyoyev rahbarligida joriy yilning 15  yanvarida “Mahallabay” ishlash va kambagʻallikni qisqartirish hamda aholi bandligini taʼminlash boʻyicha 2022-yilda amalga oshiriladigan ustuvor vazifalar”ga bagʻishlangan kengaytirilgan videoselektor yigʻilishi oʻtkazilgan edi. Unda “mahallabay” ishlash va kambagʻallikni qisqartirish maqsadida  aholini ish bilan taʼminlash, aholining uylari atroflarida obodonlashtirish va koʻkalamzorlashtirish ishlarini olib borish kabi xayrli ishlarni amalga oshirish vazifalari belgilab berilgan edi. Ushbu topshiriqlarning ijrosini taʼminlash maqsadida Amudaryo tumanida ham rejalar ishlab chiqilib, amalga oshirilmoqda.

Xususan, tumanning qoloq va sharoiti ogʻir ovul, mahallalari aniqlanib, ushbu hududlarda qurilish, aholining uyi atroflarida obodonlashtirish va koʻkalamzorlashtirish ishlari olib borilmoqda. Bu ishlar uchun ajratilayotgan mablagʻlar maqsadli sarflanib, ishlar samarali amalga oshirilayotir.

Tumanimizning chekka hududi – Qangli ovulidagi Qumyop mahallasida ham ushbu yoʻnalishda obodonlashtirish, koʻkalamzorlashtirish ishlari keng koʻlamda olib borilyapti.

Xususan, shu yilning 27-avgustidan 15-sentyabrigacha 1,2 kilometr uzunlikdagi 3 ta koʻcha asosi tuproq bilan koʻtarilib, tosh-shagʻal toʻkishga tayyorlandi. 20 ta koʻchaning 7,8 kilometr uzunlikdagi qismiga tosh-shagʻal yotqizildi. 330 ta uy-joylarning fasad qismi tartibga keltirilib, obodonlashtirildi va devorlari boʻyaldi.

Mahalla hududidagi asosiy avtomobil yoʻlining 1 kilometriga tungi yoritish chiroqlari oʻrnatildi. Mahalla fuqarolar yigʻini binosi homiylar mablagʻlari hisobidan kapital taʼmirlanmoqda. Shuningdek, hududdagi 44-sonli davlat maktabgacha taʼlim tashkiloti mahalliy byudjetning 248,5 million soʻm mablagʻi hisobiga taʼmirlanmoqda. Taʼmirlash ishlari pudratchi tashkilot “Kamolov eshiklari” masʼuliyati cheklangan jamiyati quruvchi ustalari tomonidan sifatli amalga oshirilayotir.

Hududdagi 74-sonli maktab binosi ham taʼmirtalab ahvolga kelib qolganligi inobatga olinib, binoda oʻquvchilar uchun munosib sharoitlar yaratish maqsadida mahalliy byudjetning 435 million soʻmdan ziyod mablagʻi hisobiga sifatli taʼmirlanmoqda. Bu ishlarni “Mangʻit invest maksimum” masʼuliyati cheklangan jamiyati quruvchilari ado etishmoqda.

Mahalla oʻsmir-yoshlarining boʻsh vaqtlarini mazmunli oʻtkazish, ularni sport mashgʻulotlariga jalb qilish, sportning ommaviyligiga erishish maqsadida sport maydonchasi bunyod etildi. Shuningdek, “tashabbusli byudjet” mablagʻlari hisobidan 1 ta transformator va 34 ta tayanch ustunlar oʻrnatilib, elektr taʼminoti sifati yaxshilandi, 2 kilometrlik  uzunlikda  elektr liniyasi tortildi.

Mamlakatimizda aholi turmushi sifatini oshirish, inson qadrini yuksaltirish borasida amalga oshirilayotgan say-harakatlar eng chekka hududlarda ham yaqqol namoyon boʻlayotgani kishini quvontiradi, ertangi kunga ishonchini oshiradi. Buni tumanimizning Qumyop mahallasi misolida ham koʻrishimiz mumkin. Qumyopda obodonlashtirish, koʻkalamzorlashtirish ishlari shu kunlarda ham qizgʻin davom ettirilmoqda.

Oygul Rajabova