Туман Адлия бўлимига йил бошидан шу кунга қадар жами 237 та ариза ва шикоятлар келиб тушган

Юртимизда фуқароларнинг ҳуқуқ ва эркинликларини ишончли ҳимоя қилиш, қонун устуворлигини таъминлашга йўналтирилган жамият ва давлат қурилиши соҳасида норма ижодкорлиги, ҳуқуқни қўллашда ягона давлат сиёсатини изчил амалга ошириш мақсадида ташкил этилган адлия органлари ўзининг бу борадаги вазифаларини самарали бажариб келмоқда. Шу билан бир қаторда давлатимиз томонидан адлия органлари фаолиятига алоҳида эътибор қаратилиб, соҳа фаолиятини такомиллаштиришга доир бир қатор ислоҳотлар амалга оширилмоқда.

Маълумки, шу йил 17 мартдаги “Фуқароларнинг ҳуқуқ ва эркинликларини таъминлаш ҳамда ҳуқуқий хизмат кўрсатишда адлия органлари ва муассасалари фаолияти самарадорлигини янада ошириш чора-тадбирлари тўғрисида”ги Президент Фармонига мувофиқ адлия тизимида ягона бошқарувни жорий қилиш учун Давлат хизматлари агентлиги бевосита Адлия вазирлигига, уларнинг ҳудудий тузилмалари эса ҳудудий адлия органларига қўшилиб, уларнинг фаолияти янада такомиллашди.

Ушбу ислоҳотлар доирасида фаолият кўрсатиб келаётган Амударё тумани Адлия бўлимига жорий йил бошидан бугунги кунга қадар жами 237 та ариза ва шикоят келиб тушган. Ушбу мурожаатларнинг 194 тасини ариза, 43 тасини шикоят ташкил қилди. Келиб тушган мурожаатларнинг 225 таси ҳал қилинди. Шундан қаноатлантирилган ариза ва шикоятлар 189 тани, ҳуқуқий тушунтириш берилган мурожаатлар 36 тани ташкил қилди.

Бўлимга қарашли Давлат хизматлари марказида 10 нафар ходим ишлайди. Шу кунгача кўрсатилган давлат хизматлари 40 минг 487 тани ташкил қилади. Сайёр давлат хизматлари 1417 тага етди. Шунингдек, 863 та тадбиркорлик субъектларини давлат рўйхатидан ўтказилди. Шундан 243таси юридик шахслар, 620 нафари якка тартибдаги тадбиркорлик билан шуғулланишни бошлаган жисмоний шахслардир. Қайта давлат рўйхатидан ўтказилган тадбиркорлик субъектлари сони 263тани ташкил қилди. Ундан ташқари, Давлат хизматлари маркази филиаллари томонидан кўрсатилган давлат хизматлари сони 4712 тага, интернет орқали кўрсатилган хизматлар сони 529 тага етди.

2022 йилнинг 3-чорагида бевосита Адлия бўлими масъулларининг шахсий қабулида жами 218 нафар, сайёр қабулларда 19 нафар фуқаро қабул қилинган. Бўлим томонидан 2022 йил 3 чорак давомида судларга 61 нафар фуқаронинг манфаатида аризалар киритилиб, шундан 46 таси қаноатлантирилди. 15 та фуқаролик иши кўриб чиқилиш жараёнида.

Даъво аризаларнинг 52 таси фуқаролик судларга, 9 таси маъмурий судларга киритилган. Даъво аризалари натижасида фуқароларга жами 188 млн. сўм иш ҳақлари ундириб берилган. Маъмурий судлар томонидан 6 та мансабдор шахсларнинг қарорлари ва хатти-ҳаракатлари ғайриқонуний деб топилди.

Бўлим томонидан 3-чорак давомида инсон ҳуқуқларини ҳимоя қилиш соҳасида мониторинг ва ўрганишлар ўтказилди. Ўтказилган ўрганиш ва мониторинглар давомида идора ва ташкилотлар томонидан инсон ҳуқуқлари соҳасида қатор қонунбузилиш ҳолатлари аниқланди.

Мазкур ўрганиш ва мониторинглар давомида ҳамда фуқаролардан келиб тушган мурожаатлар асосида аниқланган қонунбузилиш ҳолатлари бўйича идора ва ташкилотларга инсон ҳуқуқлари соҳасида тақдимномалар ва огоҳномалар киритилди.

Киритилган тақдимномаларга асосан қонунбузилиш ҳолатига йўл қўйган шахслар интизомий жавобгарликка тортилди, бюджетга ва фуқароларга 263 млн. сўм пул маблағлари қайта тўланди. Шунингдек, ўрганишлар ва фуқаролардан тушган мурожаатлар асосида ўтган тўққиз ой давомида Адлия бўлими томонидан 6 нафар мансабдор шахсга нисбатан тўғридан-тўри маъмурий баённома расмийлаштирилди, идора ва ташкилотларнинг 41 нафар ходимига нисбатан маъмурий жавобгарликка тортиш юзасидан таклифлар берилди.

Соҳадаги ислоҳотлар давлат хизматларини кўрсатишнинг жадал ривожланишига, соддалашишига, шаффофликни таъминлашга ва аҳолининг давлатга нисбатан ишончи ошишига хизмат қилади.

Ўзбекистон Республикаси ўз олдига демократик давлат ва адолатли фуқаролик жамияти қуришни бош мақсад қилган экан, адлия бўлимлари учун ягона давлат ҳуқуқий сиёсатини, жумладан ҳуқуқ ижодкорлиги фаолиятини сифатли ташкил этиш, идора ва ташкилотларда изчил ва бир хил ҳуқуқни қўллаш амалиётини шакллантириш, инсон ҳуқуқ ва эркинликларининг самарали ҳимоя қилинишини таъминлаш ҳамда аҳолининг ҳуқуқий маданиятини янада ошириш асосий вазифа бўлиб қолаверади.

Б.Собиров, туман Адлия бўлими етакчи маслаҳатчиси.