“УМИД НИҲОЛЛАРИ - 2022” СПОРТ МУСОБАҚАСИ ҒОЛИБЛАРИ МУНОСИБ ТАҚДИРЛАНДИ

Ёшларнинг спортга бўлган ҳавас ва интилишларини ошириш, уларни оммавий спортга жалб этиш орқали соғлом турмуш кўникмаларини шакллантириш, умидли спортчиларни танлаб олиш ва уларнинг маҳорат кўникмаларини ривожлантириш мақсадида умумтаълим мактаб ўқувчилари ўртасида ҳар йили “Умид ниҳоллари” спорт мусобақаларини ўтказиш яхши анъанага айланди. “Умид ниҳоллари – 2022” спорт мусобақалари Амударё туманида ҳам зўр уюшқоқлик билан ўтказилди.

Уч босқичли “Умид ниҳоллари – 2022” спорт мусобақасининг Қорақалпоғистон Республикаси финал босқичида амударёлик ўқувчи-ёшлар спортнинг баскетбол, гандбол, гимнастика, енгил атлетика, кураш, шахмат турлари бўйича иштирок этишиб, юқори натижаларни қўлга киритдилар.

Хусусан, спортнинг баскетбол тури бўйича 33- ва 52-сонли мактаблар терма жамоалари ўсмирлар ўртасида фахрли 1-ўринни, 19-, 33-, 53-мактабларнинг қизлар терма жамоалари 3-ўринни эгаллашди. Спортнинг гандбол тури бўйича бўлиб ўтган мусобақаларда 41-мактаб қизлар жамоаси 2-ўрин соҳиби бўлдилар.

Шунингдек, 20-сонли мактабнинг гимнастикачи қизлари Дилнура Давлатбоева ҳамда Барчиной Бахтиёровалар мусобақанинг 3-поғонасидан жой олдилар.

Спортнинг енгил атлетика тури бўйича бўлиб ўтган қизғин баҳоларда 100 метрга югуришда ўсмирлар ўртасида 1-мактаб ўқувчиси Сардор Раҳимов 1-ўринни, 200 ва 400 метрга югуришда 19-мактаб ўқувчиси Гулбону Ўринбоева 2-, ва 3-ўринларни, 800 метрлик масофада 35-мактаб ўқувчиси Динора Матёқубова, узунликка сакраш бўйича мусобақаларда 50-мактаб ўқувчиси Дилфуза Мамуродовалар 2-ўринларни эгаллашди.

Шунингдек, эстафетали югуриш ва кураш бўйича мусобақаларда ҳам амударёлик ўқувчи-ёшлар юқори натижаларга эришдилар.

Спортнинг шахмат тури бўйича мусобақалар янада қизиқарли ва таассуротларга бой бўлди. Унда 15 ёшгача бўлган қизлар ўртасида 56-мактаб ўқувчиси Умида Тўлибоева 2-ўрин соҳибаси бўлди. 13 ёшгача бўлган қизлар ўртасида 69-сонли мактаб ўқувчиси Холида Отажонова 3-ўринни, 17 ёшгача бўлган ўсмирлар ўртасида 46-мактаб ўқувчиси Азизбек Ражабов фахрли 2-ўринни эгалладилар.

Мазкур финал мусобақаларда ғолиб ва совриндор бўлган ҳар бир ёш спортчига спорт либослари жамланмаси, 1-ўринга ноутбук, 2-ўринга телевизор ва 3-ўринга велосипед совға қилинди.

Спортнинг шахмат тури бўйича 13 ёшгача бўлган ўсмир қизлар ўртасида 3-ўринни эгаллаган 69-сонли мактаб ўқувчиси Холидахон Отажонованинг спортдаги бу ютуғи нафақат оила аъзолари, балки 69-сонли мактаб педагогика жамоаси, устозлари ва мактабдошларига ҳам чексиз қувонч бағишлади.

Мактабда ўтказилган ғолиб спортчини тақдирлаш маросимида ёш спортчининг устозлари, мактабдош дўстлари сўзга чиқишиб, мамлакатимизда, қолаверса, туманимизда болалар спортини, ривожлантириш борасида амалга оширилаётган кенг кўламли ислоҳотлар ҳақида мамнуният билан сўз юритдилар.

Айни пайтда 69-сонли умумтаълим мактабида ўқувчи-ёшларнинг илм асосларини чуқур ўзлаштиришлари, ўзлари хоҳлаган фан йўналишлари бўйича қўшимча дарс-машғулотларида иштирок этишлари, спортнинг олимпиада турлари бўйича шуғулланишлари учун зарур шароит-шароитлар яратилиб, тўгараклар фаолияти йўлга қўйилганини, бу эса таълим-тарбия соҳасида юқори натижаларга эришиш учун зарур имконият эканлигини таъкидладилар. Ўз навбатида ёш шахматчи Холидахон Отажоновага келажакда кучли шахматчи бўлиб етишишида ютуқлар тиладилар.

Тақдирлаш маросимида Холида Отажоновага ғолиблик Дипломи, спорт формаси жамланмаси ва велосипед топширилди.

Шуни алоҳида қайд этиш керакки, “Умид ниҳоллари – 2022” спорт мусобақаларида совриндор бўлган ўқувчиларга таълим бераётган 7 нафар жисмоний тарбия фани ўқитувчиларига ҳам спорт либоси жамланмаси ва спорт сумкаси совға қилинди. Қувончлиси шундаки, “Умид ниҳоллари-2022” спорт мусобақасининг Қорақалпоғистон финал босқичида амударёлик спортчи-ўқувчилар 14 та олтин, 21 та кумуш ва 20 та бронза медал, жами 55 та медал билан умумжамоа ҳисобида фахрли 2-ўринни эгалладилар.

Робия ЙЎЛДОШЕВА.