Муддатли ҳарбий хизматга чақирилувчилар сараланмоқда

Ўзбекистон Республикаси Қуролли Кучлар сафини ҳар томонлама етук, соғлом, жисмонан бақувват, интеллектуал салоҳиятли чақирилувчилар билан тўлдириш муҳим аҳамиятга эга. Шу мақсадда, Республикамиз бўйлаб муддатли ҳарбий хизматга чақирилувчиларни саралаш жараёнлари давом этмоқда. Шунингдек, саралаш ишлари давомида чақирилувчилар онгида миллий ғурур, она юртга садоқат, ватанпарварлик ва миллатпарварлик туйғусини кучайтириш борасида ҳам тарғибот тадбирлари олиб борилмоқда.

Шу кунларда бутун Республикамизда бўлгани сингари Амударё туманида ҳам Ўзбекистон Республикасининг “Умумий ҳарбий мажбурият ва ҳарбий хизмат тўғрисида”ги қонуни ҳамда Ўзбекистон Республикаси Вазирлар Маҳкамасининг 2019 йил 9 апрель кунги “Чақирилувчиларни танлаб олиш тўғрисида”ги 291-сонли қарори асосида тузилган танлов Кенгаши томонидан Мудофаа ишлари бўлими билан ҳамкорликда фуқароларни 2023 йилги ҳарбий хизмат чақирувига саралаб олиш мақсадида танлов тадбирлари олиб борилмоқда.

Муддатли ҳарбий хизматга танлов тадбирлари 2022 йилнинг 10 август санасидан 2023 йилнинг 10 февраль кунига қадар олиб борилади. Танлов тадбирларида, 18 ёшдан 27 ёшгача бўлган яъни 1996-2005 йилларда туғилган ва илгари ҳарбий хизматни ўтамаган йигитлар қатнашдилар. Ушбу танлов тадбирларида қўйилган синовлардан муваффақиятли равишда ўтган йигитлар муддатли ҳарбий хизматга жўнатилади.

Танловлар 2 та йўналиш бўйича олиб борилади. Дастлаб, чақирилувчиларнинг жисмоний тайёргарлик даражаси баҳоланади. Шундан сўнг, якка тартибдаги суҳбат бўлиб ўтади. Суҳбат натижалари эълон қилингандан сўнг чақирилувчилар тиббий кўрикдан ўтказилади. Тиббий кўрик натижаларига кўра, жисмонан соғлом ва бақувват йигитлар ҳарбий хизматга юборилади.

Туманимизда ҳам чақирилувчиларнинг жисмоний тайёргарлик даражасини аниқлаш учун тўсиққа тортилиш, 100 метрлик ҳамда 3000 метрли масофага югириш бўйича синовлар бўлиб ўтди. Ушбу синовларда муваффақиятли қатнашган, белгиланган шартларни ўз вақтида эпчиллик билан бажарган йигитлар суҳбатга қатнашиш имкониятига эга бўлишди.

Туман Мудофаа ишлари бўлими биносида бўлиб ўтган якка тартибдаги суҳбат жараёнида чақирилувчиларнинг сиёсий билимлари билан биргаликда маърифий билимлари ҳам синовдан ўтказилди.

Она Ватан – улуғ ва муқаддас даргоҳ. Унинг буюк келажаги ва бахту иқболи учун жон куйдириш энг олий саодат бўлса, тинчлик-осойишталигини сақлаш учун садоқат билан хизмат қилиш юксак шарафдир.

Ушбу эзгу ниятни дилига жо қилиб, ўз йигитлик бурчини сидқидилдан бажаришни олдига мақсад қилиб қўйган туманимизнинг мард ва жасур ўғлонларига омад ёр бўлишини тилаймиз.

Ватанимиз тинчлиги ва осойишталигига ҳисса қўшиш, юртимизга хизмат қилиш ҳар бир йигитнинг бурчи ва қонуний мажбуриятидир. Шундай экан, чиқирув ёшида бўлган йигитларни туман мудофаа ишлари бўлимига келиб, танловларда иштирок этишга чақирамиз. Ватан олдидаги ўз йигитлик бурчингизни адо қилиш имкониятини қўлга чиқарманг, азиз ёшлар!

Шу ўринда ота-оналарга шуни эслатиб ўткамизки, белгиланган тартибда ҳарбий хизматни ўташ мажбурийдир. Чақирувга ўз вақтида келмаслик эса жавобгарликка сабаб бўлишини унутманг!

Туман ҳокимлигининг Ахборот хизмати.