ҲАРБИЙ ҚИСМДА ҲУҚУҚШУНОСЛАР ТАРҒИБОТ ТАДБИРИНИ ЎТКАЗИШДИ

Ўзбекистон Республикаси Президентининг 2018 йил 13 апрелдаги “Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида”ги Фармони билан ташкил этилган туман Адлия бўлимларининг асосий вазифалари – қабул қилинаётган қонунлар ва бошқа норматив-ҳуқуқий ҳужжатларнинг мазмун-моҳияти ва аҳамиятини туманлар тузилмаларидаги ижрочиларга етказиш, «республика — вилоят — туман — маҳалла» принципи бўйича ҳуқуқий тарғибот ва аҳолининг ҳуқуқий саводсизлигига барҳам беришдир.

Шунингдек бу борада ҳуқуқни муҳофаза қилувчи ва суд органлари билан биргаликда чора-тадбирларни амалга ошириш ҳам мазкур бўлимларнинг асосий вазифаларидан саналади.

Амударё тумани Адлия бўлими ходимлари ҳам бунингдек масъулиятли вазифани адо этишда тумандаги давлат органлари ва ташкилотлари билан ҳамкорлик ўрнатиб, биргаликда аҳолининг ҳуқуқий онги ва ҳуқуқий маданиятини юксалтириш, янгидан қабул қилинаётган норматив ҳуқуқий ҳужжатларни кенг аҳоли қатламига етказиш, уларнинг ҳуқуқий билимларини ошириш мақсадида тарғибот тадбирларини амалга ошириб келмоқда.

Жорий йилнинг 19 август куни туман Адлия бўлими ходимларининг туманимизда фаолият юритаётган Давлат хавфсизлик хизматига қарашли ҳарбий қисмда ҳарбий хизматчилар билан учрашуви ҳам шу мақсадга қаратилди.

Ҳарбийларнинг ҳуқуқий саводини оширишга кўмаклашиш, янгидан қабул қилинаётган норматив-ҳуқуқий ҳужжатларни, Ўзбекистон Республикаси Конституциясига киритилаётган ўзгартиришларни тарғиб этиш, мамлакатимизда коррупцияга қарши курашиш соҳасида амалга оширилаётган ишлар билан ҳарбий хизматчиларни таништириш мақсадида ўтказилган тарғибот тадбирига ҳарбий қисм хизматчилари иштирок этдилар.

Тадбир давомида ҳарбий хизматчилар Ўзбекистон Республикаси Конституциясига киритилаётган ўзгартиришлар билан таништирилди, шунингдек, “Коррупцияга қарши курашиш тўғрисида”ги қонун, мулк ҳуқуқи, Оила кодекси, шунингдек, фуқароларимизга чет давлатларда ҳарбий хизматга ёлланганлик учун жавобгарлик мавжудлиги хусусида, диний экстремизм ва терроризмнинг жамият тараққиётига таҳдиди, унга қарши кураши юзасидан мамлакатимизда олиб борилаётган ишлар хусусида тушунтиришлар берилди.

Тадбирда иштирокчилар мавзу юзасидан ўзларини қизиқтирган саволларига туман Адлия бўлими масъулларидан жавоблар олишди.

Шуни алоҳида эътироф этиш керакки, туман Адлия бўлими ходимлари ўзлари юридик хизмат кўсратадиган корхона-ташкилотлардан ташқари туманимизнинг барча ҳудудларида ҳам қонунийликни мустаҳкамлаш, янгидан қабул қилинаётган ҳуқуқий ҳужжатларнинг мазмун-моҳиятини тарғиб этишга бағишланган қатор тадбирлар ўтказиб, аҳолининг ҳуқуқий саводхонлигини оширишга ҳам ҳаракат қилмоқдалар.

Ж.Бекимбетов, туман Адлия бўлими бош маслаҳатчиси.