HARBIY QISMDA HUQUQShUNOSLAR TARGʻIBOT TADBIRINI OʻTKAZIShDI

Oʻzbekiston Respublikasi Prezidentining 2018-yil 13-apreldagi “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida”gi Farmoni bilan tashkil etilgan tuman Adliya boʻlimlarining asosiy vazifalari – qabul qilinayotgan qonunlar va boshqa normativ-huquqiy hujjatlarning mazmun-mohiyati va ahamiyatini tumanlar tuzilmalaridagi ijrochilarga yetkazish, «respublika — viloyat — tuman — mahalla» printsipi boʻyicha huquqiy targʻibot va aholining huquqiy savodsizligiga barham berishdir.

Shuningdek bu borada huquqni muhofaza qiluvchi va sud organlari bilan birgalikda chora-tadbirlarni amalga oshirish ham mazkur boʻlimlarning asosiy vazifalaridan sanaladi.

Amudaryo tumani Adliya boʻlimi xodimlari ham buningdek masʼuliyatli vazifani ado etishda tumandagi davlat organlari va tashkilotlari bilan hamkorlik oʻrnatib, birgalikda aholining huquqiy ongi va huquqiy madaniyatini yuksaltirish, yangidan qabul qilinayotgan normativ huquqiy hujjatlarni keng aholi qatlamiga yetkazish, ularning huquqiy bilimlarini oshirish maqsadida targʻibot tadbirlarini amalga oshirib kelmoqda.

Joriy yilning 19-avgust kuni tuman Adliya boʻlimi xodimlarining tumanimizda faoliyat yuritayotgan Davlat xavfsizlik xizmatiga qarashli harbiy qismda harbiy xizmatchilar bilan uchrashuvi ham shu maqsadga qaratildi.

Harbiylarning huquqiy savodini oshirishga koʻmaklashish, yangidan qabul qilinayotgan normativ-huquqiy hujjatlarni, Oʻzbekiston Respublikasi Konstitutsiyasiga kiritilayotgan oʻzgartirishlarni targʻib etish, mamlakatimizda korruptsiyaga qarshi kurashish sohasida amalga oshirilayotgan ishlar bilan harbiy xizmatchilarni tanishtirish maqsadida oʻtkazilgan targʻibot tadbiriga harbiy qism xizmatchilari ishtirok etdilar.

Tadbir davomida harbiy xizmatchilar Oʻzbekiston Respublikasi Konstitutsiyasiga kiritilayotgan oʻzgartirishlar bilan tanishtirildi, shuningdek, “Korruptsiyaga qarshi kurashish toʻgʻrisida”gi qonun, mulk huquqi, Oila kodeksi, shuningdek, fuqarolarimizga chet davlatlarda harbiy xizmatga yollanganlik uchun javobgarlik mavjudligi xususida, diniy ekstremizm va terrorizmning jamiyat taraqqiyotiga tahdidi, unga qarshi kurashi yuzasidan mamlakatimizda olib borilayotgan ishlar xususida tushuntirishlar berildi.

Tadbirda ishtirokchilar mavzu yuzasidan oʻzlarini qiziqtirgan savollariga tuman Adliya boʻlimi masʼullaridan javoblar olishdi.

Shuni alohida eʼtirof etish kerakki, tuman Adliya boʻlimi xodimlari oʻzlari yuridik xizmat koʻsratadigan korxona-tashkilotlardan tashqari tumanimizning barcha hududlarida ham qonuniylikni mustahkamlash, yangidan qabul qilinayotgan huquqiy hujjatlarning mazmun-mohiyatini targʻib etishga bagʻishlangan qator tadbirlar oʻtkazib, aholining huquqiy savodxonligini oshirishga ham harakat qilmoqdalar.

J.Bekimbetov, tuman Adliya boʻlimi bosh maslahatchisi.